ដោយ វិទ្យុអាស៊ីសេរី
2024.02.25
RFA
រូបត្លុកនយោបាយ៖ បោះឆ្នោតព្រឹទ្ធសភាអាណត្តិទី៥ សម្តេចទាំង៥អស់អំណាច រូប៖ RFA
ការបោះឆ្នោតជ្រើសតាំងសមាជិកព្រឹទ្ធសភា កាលពីថ្ងៃអាទិត្យ ទី២៥ ខែកុម្ភៈ ធ្វើឡើងដើម្បីធ្វើឱ្យស្របច្បាប់ និងបំពេញមហិច្ឆតាបន្តក្រាញអំណាចផ្តាច់មុខគ្មានដែនកំណត់របស់អតីតនាយករដ្ឋមន្ត្រី ហ៊ុន សែន។ លោកនឹងមកធ្វើជាប្រធានព្រឹទ្ធសភាជំនួសឱ្យលោក សាយ ឈុំ ដែលត្រូវអស់អំណាច។ ការណ៍នេះនឹងនាំឱ្យត្រកូល «ហ៊ុន» អាចគ្រប់គ្រងអំណាចកំពូលៗរបស់ជាតិដោយចំហ និងគ្មានការលាក់លៀមតទៅទៀតឡើយ។ លោក ហ៊ុន ម៉ាណែត ជាកូនគ្រប់គ្រងអំណាចនីតិប្រតិបត្តិក្នុងនាមជានាយករដ្ឋមន្ត្រី, លោក ហ៊ុន ម៉ានី ជាកូនប្រុសពៅឡើងធ្វើជាឧបនាយករដ្ឋមន្ត្រី, ខណៈឪពុកនឹងគ្រប់គ្រងអំណាចនីតិប្បញ្ញត្តិក្នុងនាមជាប្រធានព្រឹទ្ធសភា ដែលតម្រូវឱ្យលោក ហ៊ុន សែន ក្លាយជាប្រមុខរដ្ឋស្តីទីក្នុងពេលអវត្តមានព្រះមហាក្សត្រ ចាំចុះហត្ថលេខាប្រថាប់ត្រាឱ្យកូនលើព្រះរាជក្រឹត្យ និងព្រះរាជក្រម។
ការវិលមកច្បាមអំណាចព្រឹទ្ធសភារបស់លោក ហ៊ុន សែន បែបនេះ ក៏ឆ្លុះបញ្ចាំងពីការបាត់បង់អំណាចជាអចិន្ត្រៃយ៍របស់សម្តេចទាំង៥ ដែលសុទ្ធតែជាមេៗគ្រាក់ៗក្នុងគណបក្សប្រជាជនកម្ពុជា ហើយធ្លាប់ជាអតីតមិត្តរួមអាវុធរបស់លោក ហ៊ុន សែន។ សម្តេចទាំង៥ ដែលត្រូវអស់អំណាចជាស្ថាពរ មានដូចជា សម្តេច ហេង សំរិន, សម្តេច សាយ ឈុំ, សម្តេច ស ខេង, សម្តេច ទៀ បាញ់, និងសម្តេច ម៉ែន សំអន។ ដើមទុននយោបាយដែលសម្តេចទាំងនេះ បានសន្សំទុកអស់ស្ទើរពេញមួយជីវិតរបស់ពួកគេ ទំនងជាត្រូវយកមកចាក់ចោលនាពេលនេះ ខណៈត្រកូល «ហ៊ុន» ដណ្តើមយកមកគ្រប់គ្រងស្ទើរតែទាំងស្រុង។ គ្មានឡើយឱកាសដែលពួកគេអាចវិលត្រលប់មករក្សាតុល្យភាពអំណាចក្នុងជួរបក្សវិញបានស្របពេលដែលលោក ហ៊ុន ម៉ាណែត ក៏ត្រូវគេរំពឹងថាកំពុងត្រៀមឡើងក្លាយជាប្រធានគណបក្សប្រជាជនកម្ពុជាជំនួសឪ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។