ដោយ សុជីវី
2024.06.12
RFA
ស្ដាប់ ឬទាញយកសំឡេង
កម្មករនៅរោងចក្រ សេង បូ ហ្គាមិន (Sheng Bo Garment) ប្រមូលផ្ដុំគ្នានៅមុខតុលាការខេត្តកំពង់ស្ពឺ នៅថ្ងៃទី១២ ខែមិថុនា ឆ្នាំ២០២៤ ដើម្បីទាមទារក្រុមហ៊ុនឱ្យយកប្រធានសហជីពពួកគេ គឺលោកស្រី រឿន កូលាប ចូលធ្វើការវិញ។ រូប៖ ហ្វេសប៊ុកសហព័ន្ធសហជីពសេរីកម្មករ នៃព្រះរាជាណាចក្រកម្ពុជា
កម្មករនៅរោងចក្រ សេង បូ ហ្គាមិន (Shengbo Garment) ប្រមូលផ្ដុំគ្នានៅមុខតុលាការខេត្តកំពង់ស្ពឺ ដើម្បីតវ៉ា ទាមទារឱ្យប្រធានសហជីពពួកគេ គឺលោកស្រី រឿន កូលាប ចូលធ្វើការវិញ ក្រោយពីក្រុមហ៊ុនបានបញ្ឈប់ ពីការងារអស់រយៈពេលជាច្រើនខែមកហើយ។ ពួកគាត់ថា ការបញ្ឈប់ លោកស្រី រឿន កូលាប គឺជាការរើសអើងសហជីពក្នុងកន្លែងការងារ។
កម្មករ-កម្មការិនីចំនួន ២៥នាក់ ដែលធ្វើការនៅរោងចក្រកាត់ដេរ សេង បូ ហ្គាមិន (Shengbo Garment) បានប្រមូលផ្ដុំគ្នា និងលើកបដា នៅមុខតុលាការ ខេត្តកំពង់ស្ពឺ នៅថ្ងៃទី១២ ខែមិថុនា ដើម្បីទាមទារឱ្យក្រុមហ៊ុនគោរពសិទ្ធិសហជីព និងផ្ដល់យុត្តិធម៌ ដល់លោកស្រី រឿន កូលាប។
ការតវ៉ារបស់កម្មករទាំងនោះធ្វើឡើង ដោយសារតែលោកស្រី រឿន កូលាប ត្រូវឡើងសវនាការ នៅថ្ងៃទី១២ ខែមិថុនា ជុំវិញករណីមេសហជីពរូបនេះ ប្ដឹងរោងចក្រថា បានរើសអើងសហជីពនៅកន្លែងការងារ។ តែយ៉ាងណា សវនាការលើកទី២ នេះ ត្រូវបានផ្អាក ដោយសារតែចៅក្រមសាកសួរមានបញ្ហាសុខភាពមិនអាចចូលរួមបាន។
នៅពីមុខតុលាការឯណោះវិញ ឃើញមានកម្មករ-កម្មការិនី កាន់បដាពណ៌ស ដោយភ្ជាប់ជាមួយនឹងអក្សរថា សូមបញ្ឈប់ការរើសអើងសហជីពក្នុងវិស័យកាត់ដេរ, សហជីពមិនមែនជាសត្រូវរបស់និយោជកឡើយ និងពាក្យថា សូមឱ្យតុលាការសម្រេចផ្ដល់យុត្តិធម៌ ដល់លោកស្រី រឿន កូលាប ប្រកបដោយគតិបណ្ឌិត។
ប្រធានសហជីពប្រចាំរោងចក្រ សេង បូ ហ្គាមិន លោកស្រី រឿន កូលាប ប្រាប់វិទ្យុអាស៊ីសេរីនៅថ្ងៃទី១២ ខែមិថុនាថា លោកស្រីមកមុខតុលាការខេត្តកំពង់ស្ពឺ ដើម្បីចូលរួមសវនាការ ប៉ុន្តែ សោកស្ដាយដែលតុលាការលើកពេល។ លោកស្រីចាត់ទុក ការបញ្ឈប់លោកស្រីពីការងារ ដោយនិយោជក គឺជារឿងអយុត្តិធម៌។
លោកស្រី រឿន កូលាប៖ «ខាងក្រុមហ៊ុនគាត់មានការរើសអើងសហជីព មិនចង់ឱ្យមានសហជីពទេ ព្រោះនៅក្នុងរោងចក្រហ្នឹង មានការកៀបសង្កត់ កម្មករ តាំងពីប្រាក់ខែ តាំងពីច្បាប់សុំសម្រាក ហើយ តាំងពីធ្វើការ ដាក់កំហិតឱ្យគេ ដូចថា ១ម៉ោងឱ្យគ្នា ដេរបាន ២០ ឬក៏៣០ អាវ សម្រាប់ថ្ងៃហ្នឹងយើងដេរ បានដល់ពេលស្អែកឡើងថែមលើសហ្នឹងទៀត។ អាហ្នឹង ហើយជាការរំលោភសិទ្ធិការងារ។»
ប្រធានសហជីពប្រចាំរោងចក្រ សេង បូ ហ្គាមិន (Shengbo Garment) លោកស្រី រឿន កូលាប ត្រូវបានរោងចក្របញ្ឈប់ពីការងារក្រោយបង្កើតសហជីព កាលពីចុងខែ មិថុនា ឆ្នាំ២០២៣។
វិទ្យុអាស៊ីសេរីពុំអាចទាក់ទងតំណាងក្រុមហ៊ុន រោងចក្រ សេង បូ ហ្គាមិន និងអ្នកនាំពាក្យក្រសួងការងារ និងបណ្ដុះបណ្ដាល វិជ្ជាជីវៈ លោក កត្តា អ៊ន បានទេ នៅថ្ងៃទី១២ ខែមិថុនា ដោយហៅទូរស័ព្ទ ចូលតែគ្មានអ្នកទទួល។
ប៉ុន្តែ អតីតប្រធានផ្នែករដ្ឋបាល នៃរោងចក្រ សេងបូ ហ្គាមិន លោក អាំ មន្នី ធ្លាប់ប្រាប់អាស៊ីសេរីថា ការបញ្ឈប់លោកស្រី រឿន កូលាប នេះមិនជាប់ពាក់ព័ន្ធនឹងការរើសអើងសហជីពនោះទេ ប៉ុន្តែ ដោយសារតែ លោកស្រី រឿន កូលាប ធ្វើការមិនគ្រប់ចំនួនតាម គោលការណ៍របស់ក្រុមហ៊ុន។
ទោះជាយ៉ាងណា ក្រៅ ពីលោកស្រី រឿន កូលាប រោងចក្រកាត់ដេរ ដែលមានម្ចាស់ជាជនជាតិចិន នេះ ធ្លាប់បានបញ្ចប់កិច្ចសន្យាការងារលើថ្នាក់ដឹកនាំសហជីពជាបន្តបន្ទាប់ ដូចជាប្រធានសហជីព លោក ហាក់ ហៀង លោក ថុង ធី និងអនុប្រធានម្នាក់ទៀត គឺលោក សៀក ថុង ជាដើមក្រោយពីពួកគាត់ជាប់ឆ្នោតជាថ្នាក់ដឹកនាំសហជីព។
ទាក់ទិនរឿងនេះ អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU) លោក អាត់ ធន់ សង្កេតឃើញថា ការរំលោភសិទ្ធិការងារ និងការបញ្ឈប់កម្មករដោយខុសច្បាប់ពីសំណាក់ថៅកែនៅតែបន្តកើតមានដោយគ្មាន កិច្ចអន្តរាគមន៍ពីក្រសួងការងារ។ លោកបន្តថា អាជ្ញាធរពាក់ព័ន្ធគួរតែពន្លឿនការដោះស្រាយបញ្ហាឱ្យកម្មករប្រកបដោយតម្លាភាព ដើម្បីកុំឱ្យមានការរិះគន់ពីពលរដ្ឋ។
លោក អាត់ ធន់៖ «ខ្ញុំគិតថា ដើម្បីឱ្យកម្មករនិយោជិកទទួលបានយុត្តិធម៌ ទទួលបានសេវាកម្មដោះស្រាយឱ្យបានល្អដាច់ខាត ត្រូវតែរដ្ឋាភិបាលត្រូវពិនិត្យមើលបទដ្ឋានផ្សេងៗ ហើយអនុវត្តច្បាប់ឱ្យមានតម្លាភាព និងពេញលេញដើម្បីធានាកុំឱ្យនិយោជក និងជនខិលខូចមានឱកាសធ្វើបាបដល់កម្មករនិយោជិក»។
អ្នកឃ្លាំមើលបញ្ហាសិទ្ធិការងារលើកឡើងថា ការគោរពសិទ្ធិ និងសេរីភាពសហជីព នៅកម្ពុជានាពេលបច្ចុប្បន្នបន្តធ្លាក់ចុះខ្លាំង ស្របពេលដែលអាជ្ញាធរពាក់ព័ន្ធ ជាពិសេសក្រសួងការងារដែលជាអាណាព្យាបាលក្នុងការសម្របសម្រួលដោះស្រាយវិវាទនេះ លំអៀងទៅរកថៅកែក្រុមហ៊ុន ជាជាងរកដំណោះស្រាយជូនកម្មករ ឬក្រុមសហជីពឱ្យបានត្រឹមត្រូវ។
កាលពីចុងឆ្នាំ២០២៣ មន្ត្រីអង្គការសង្គមស៊ីវិល និងសហជីពចំនួន ១២ស្ថាប័ន បានដាក់លិខិតទៅក្រសួងការងារ ដើម្បីស្នើសុំឱ្យក្រសួងការងារពិនិត្យឡើងវិញ នូវចំណុចមួយចំនួន ដែលរឹតត្បិតទៅដល់សេរីភាពសហជីព ការរំលោភសិទ្ធិការងារ និងការគំរាមកំហែងលើថ្នាក់ដឹកនាំសហជីព រហូតដល់មេដឹកនាំសហជីពខ្លះ ជាប់បណ្ដឹងនៅតុលាការ និងខ្លះទៀត ជាប់ពន្ធនាគារដល់បច្ចុប្បន្ន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។