ក្រុមហ៊ុន​ប្រមូល​សំរាម៨០០ ស៊ូភើ ហ្គា​ព្រម​ទទួល​យក​តំណាង​សហជីព​ចូល​ធ្វើការ​វិញ ក្រោយ​កម្មករ​ចេញ​តវ៉ា

ដោយ នៅ វណ្ណារិន
2025.01.21
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

ក្រុមហ៊ុន​ប្រមូល​សំរាម៨០០ ស៊ូភើ ហ្គា​ព្រម​ទទួល​យក​តំណាង​សហជីព​ចូល​ធ្វើការ​វិញ ក្រោយ​កម្មករ​ចេញ​តវ៉ា

ទិដ្ឋភាពកម្មករ​តវ៉ានៅ​មុខ​ក្រុមហ៊ុន​ប្រមូល​សំរាម​ឈ្មោះ ៨០០ ស៊ូភើ ហ្គា (800Super-GAEA Cambodia) កាលពីថ្ងៃទី២០ មករា ២០២៥។ រូប៖ CTWUF Cambodia


ក្រុមហ៊ុន​ប្រមូល​សំរាម​ឈ្មោះ ៨០០ ស៊ូភើ ហ្គា (800Super-GAEA Cambodia) យល់​ព្រម​ទទួល​យក​តំណាង​សហជីព​ចំនួន​៤នាក់ ឲ្យ​ចូល​ធ្វើការ​វិញ និង​សន្យា​ទូទាត់​ប្រាក់​អតីតភាព​ការងារ ក្រោយ​កម្មករ​ប្រមាណ​៣រយ​នាក់​បាន​ធ្វើ​កូដកម្ម​នៅ​មុខ​ក្រុមហ៊ុន នៅ​ថ្ងៃទី២០ ខែ​មករា។

ក្រុមហ៊ុន​ប្រមូល​សំរាម​ឈ្មោះ ៨០០ ស៊ូភើ ហ្គា (800Super-GAEA Cambodia) យល់​ព្រម​ទទួល​យក​ថ្នាក់ដឹកនាំ​សហជីព​ទាំង​៤នាក់ ឲ្យ​ចូល​បម្រើ​ការងារ​ឡើង​វិញ និង​សន្យា​ទូទាត់​ប្រាក់​បំណាច់​អតីតភាព​ការងារ​ជូន​កម្មករ ក្នុង​ពេល​ចរចា​ស្វែងរក​ដំណោះស្រាយ​វិវាទ​ការងារ​រួម​ជាមួយ​កម្មករ ដែល​មាន​ការ​ចូលរួម​ពី​មន្ត្រី​នៃ​ក្រសួងការងារ និង​អាជ្ញាធរ​មូលដ្ឋាន។

ការ​ចូល​តុ​ចរចា​នេះ ធ្វើ​ឡើង​បន្ទាប់​ពី​កម្មករ​ក្រុមហ៊ុន​ប្រមូល​សំរាម និង​អ្នក​បើកបរ​ឡាន​ដឹក​សំរាម ប្រមាណ​៣រយនាក់ កាល​ពី​ថ្ងៃទី១៩ និង​នៅ​ព្រឹក​ថ្ងៃទី២០ មករា បាន​ជួបជុំ​គ្នា​ធ្វើកូដកម្ម ដោយ​ពហិការ​មិន​ចូល​បម្រើ​ការងារ និង​លើក​បដា​នៅ​មុខ​ក្រុមហ៊ុន ដែល​មាន​ទីតាំង​ស្ថិតនៅ​ក្នុង​សង្កាត់​ព្រែក​ព្នៅ ខណ្ឌ​ព្រែកព្នៅ រាជធានី​ភ្នំពេញ ដើម្បី​ទាមទារ​ឲ្យ​ក្រុមហ៊ុន​ទទួលយក​ថ្នាក់ដឹកនាំ​សហជីព និង​ទូទាត់​ប្រាក់​បំណាច់​អតីតភាព​ការងារ​ជូន​ពួកគាត់។

ការ​ធ្វើ​កូដកម្ម​នេះ ធ្វើឡើង​បន្ទាប់​ពី​ក្រុមហ៊ុន​ប្រមូល​សំរាម​នៅ​រាជធានី​ភ្នំពេញ ឈ្មោះ ៨០០ ស៊ូភើ ហ្គា (800Super-GAEA Cambodia) កាល​ពី​សប្ដាហ៍​មុន បាន​បញ្ឈប់​ថ្នាក់ដឹកនាំ​សហជីព​ចំនួន​៤នាក់ ពី​កន្លែង​ការងារ ក្រោយ​ពី​ពួកគាត់​ចូលរួម​បង្កើត​សហជីព ។ ថ្នាក់ដឹកនាំ​ទាំង​៤​នាក់​នោះ មាន​ប្រធាន​សហជីព លោក រ៉ង សារ៉ាយ អនុ​ប្រធាន​សហជីព លោក ស្វាយ ឡាំវិច្ឆិកា លេខាធិការ​សហជីព លោក សេង សុថាវង្ស និង​ហិរញ្ញិក លោក គង់ សុរិន។

បន្ទាប់​ពី​បញ្ចប់​កិច្ច​ចរចា​នៅ​ព្រឹក​ថ្ងៃទី២០ ខែ​មករា អនុប្រធាន​សហជីព លោក ស្វាយ ឡាំ​វិច្ឆិកា ថ្លែង​ប្រាប់​អាស៊ីសេរី​ថា លោក​អាច​ទទួល​យក​បាន​ចំពោះ​លទ្ធផល​នៃ​ការ​ចរចា​នេះ ដោយ​ក្រុមហ៊ុន​ព្រម​ទទួល​យក​ថ្នាក់ដឹកនាំ​ទាំង​៤នាក់ ឲ្យ​ចូល​ធ្វើការ​វិញ ហើយ​រក្សា​តួនាទី​ឲ្យ​នៅ​ដដែល និង​សន្យា​ទូទាត់​ប្រាក់​បំណាច់​អតីត​ភាព​ការងារ​នៅ​ថ្ងៃទី ២៥ មករា ខាង​មុខ​នេះ។

លោក ស្វាយ ឡាំវិច្ឆិកា៖ «ចុង​ក្រោយ​ខ្ញុំ​សូម​ថ្លែងអំណរគុណ បងប្អូន​ទាំង​អស់​គ្នា ដែល​មាន​ការ​ជឿជាក់ និង​គាំទ្រ​លើ​ថ្នាក់ដឹកនាំ​ទាំង​បួន​នាក់ ដូច្នេះ​ពួក​ខ្ញុំ ដែល​ជា​តំណាង​របស់​បងប្អូន​នឹង​ធ្វើការ​ជាមួយ​បងប្អូន បើសិនជា​បងប្អូន​មាន​បញ្ហា​អ្វី សូម​ឲ្យ​បងប្អូន​មក​ជួយ​ជាមួយ​យើង​ខ្ញុំ​ទាំង​៤​នាក់ ដែល​ជា​តំណាង ដើម្បី​រក​វិធី​ដោះស្រាយ និង​ពិភាក្សា​ជាមួយ​ក្រុមហ៊ុន ដើម្បី​ជា​ផលប្រយោជន៍​យើង​ទាំងអស់គ្នា និង​ជា​ផល​ប្រយោជន៍​រួម»

ប្រធាន​សហព័ន្ធ​សហជីព​កម្មករ​និយោជិត​វិស័យ​ទេសចរណ៍​កម្ពុជា លោក ទូច កុសល មាន​ប្រសាសន៍​ថា លោក​ចង់​ឃើញ ក្រុមហ៊ុន និង​កម្មករ លើក​យក​បញ្ហា​មក​ដោះស្រាយ​ដោយ​សន្តិវិធី។

លោក ទូច កុសល៖ «ចុង​ក្រោយ​ក្នុង​នាម​សហព័ន្ធ​ក៏​ចង់​ឃើញ​ទាំង​សហជីព ទាំង​ក្រុមហ៊ុន​ពេល​ចូល​ធ្វើ​ការងារ​វិញ គឺ​កុំ​ឲ្យ​មាន​ការ​គុំកួន​គ្នា និង​ចេះ​ដោះស្រាយ​ដោយ​សន្តិវិធី បើសិនជា​មាន​បញ្ហា​អ្វី ត្រូវ​យក​បញ្ហា​ដាក់​លើ​តុ ហើយ​ជជែក​គ្នា​ទៅ ។ ពី​មុន​យើង​អត់​មាន​សហជីព អីចឹង​ដោយ​សារ​តែ​អត់​មាន​សហជីព​ហ្នឹង​ហើយ ទើប​បងប្អូន​ឃើញ​បាត់​តំណាង​របស់​ពួកគាត់ ពួកគាត់​ឆោឡោ ហើយ​ធ្វើ​កូដកម្ម ។ ឥឡូវ​ក្រុមហ៊ុន​បាន​អនុញ្ញាត​ឲ្យ​ពួកគាត់​ចូល​ធ្វើការ​នៅ​កន្លែង​ដើម​ហើយ ខ្ញុំ​សង្ឃឹម​ថា បងប្អូន​នឹង​ចូល​ធ្វើការ​រៀងៗខ្លួន»

ក្រុមហ៊ុន​ប្រមូល​សំរាម ៨០០ ស៊ូភើ ហ្គា (800Super-GAEA Cambodia) ជា​ក្រុមហ៊ុន​ប្រមូល​សំរាម​មួយ ក្នុង​ចំណោម​ក្រុមហ៊ុន​ប្រមូល​សំរាម​ចំនួន៣ ដែល​ទទួល​បាន​សិទ្ធិ​ផ្ដល់​សេវា​ប្រមូល និង​ដឹក​ជញ្ជូន​សំរាម ក្នុង​ខណ្ឌ​ចំនួន​៥ នៅ​រាជ​ធានី​ភ្នំពេញ ក្នុង​រយៈពេល​១០​ឆ្នាំ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment