កម្ពុជា
15/03/2025 – 09:14
ដោយ៖ អ៊ឹង ប៊ុនថន
RFI
លោក ហ៊ុន សែន ក្នុងឋានៈជាប្រមុខរដ្ឋស្តីទី បានថ្លែងចំអកឲ្យ លោក សម រង្ស៊ី ដែលកំពុងធ្វើទស្សនកិច្ចនៅអាមេរិកថា ចេះតែធ្វើទៅរួច ខណៈមេដឹកនាំបក្សប្រឆាំងរូបនេះធ្លាប់រិះគន់មិនសំចៃមាត់ ចំពោះលោក ដូណាល់ ត្រាំ កាលនៅជាបេក្ខជនប្រធានាធិបតីអាមេរិក។ លោក សម រង្ស៊ី វិញ បានថ្លែងថា នៅក្នុងដំណើរទស្សនកិច្ចរបស់លោកនៅអាមេរិកលើកនេះ លោកបានជួបមន្ត្រីជាន់ខ្ពស់របស់លោក ដូណាល់ ត្រាំ មួយចំនួនដើម្បីស្នើសុំឲ្យអាមេរិកជួយស្តារឡើងវិញនូវលិទ្ធិប្រជាធិបតេយ្យនៅកម្ពុជានិងចូលរួមប្រឆាំងនឹងការជួញដូរ រួមទាំងឧក្រិដ្ឋកម្មឆបោករបស់ចិននៅកម្ពុជា។
លោក ហ៊ុន សែន ចំអក ឲ្យលោក សម រង្ស៊ី ដែលទៅស្នើសុំឲ្យអាមេរិកស្តារប្រជាធិបតេយ្យកម្ពុជា
ថ្លែងនៅក្នុងពិធីពិសាភោជនាហារសាមគ្គីគ្រួសារសមាគមឧកញ៉ាកម្ពុជា នៅល្ងាចថ្ងៃទី១៤ ខែមីនា ឆ្នាំ២០២៥ ប្រមុខរដ្ឋស្តីទី លោក ហ៊ុន សែន យល់ថា វត្តមានរបស់ លោក សម រង្ស៊ី នៅអាមេរិកមានគោលដៅស្នើឲ្យអាមេរិកដាក់ទណ្ឌកម្មលើកម្ពុជា ប៉ុន្តែ លោក ហ៊ុន សែន យល់ថា វាមិនអាចធ្វើទៅរួចនោះឡើយ។
លោក ហ៊ុន សែន មានប្រសាសន៍យ៉ាងដូច្នេះ បន្ទាប់ពី លោក សម រង្ស៊ី កាលពីថ្ងៃទី១៤ ខែមីនា ម្សិលមិញនេះ បានបង្ហោះវីដេអូនៅលើទំព័រហ្វេសប៊ុករបស់លោកដែលថា នៅក្នុងទស្សនកិច្ចរបស់លោកនៅលើទឹកដីអាមេរិកលើកនេះ លោកបានជួបជាមួយមន្ត្រីជាន់ខ្ពស់របស់រដ្ឋបាល លោក ដូណាល់ ត្រាំ និងបានស្នើសុំឲ្យសហរដ្ឋអាមេរិកជួយស្តារឡើងវិញនូវលិទ្ធិប្រជាធិបតេយ្យ សិទ្ធិមនុស្សនៅកម្ពុជា និងចូលរួមប្រឆាំងនឹងការជួញដូរ មនុស្សឧក្រិដ្ឋកម្មឆបោករបស់ចិននៅកម្ពុជា៕