ភ្នំពេញ: ក្រុមគ្រូពេទ្យជាតិ និងអន្តរជាតិ ផ្នែកវិកលវិទ្យា ដែលជាអ្នកជំនាញ ក្នុងការវាយតម្លៃលើអាការៈជំងឺរបស់លោកស្រី អៀង ធីរិទ្ធ អាយុ ៨០ ឆ្នាំ ជាអតីតរដ្ឋមន្ត្រីក្រសួងសង្គមកិច្ច សម័យខ្មែរក្រហម បានលើកឡើងថា ស្ថានភាពជំងឺវង្វេងវង្វាន់របស់លោកស្រី អៀងធីរិទ្ធ នៅពេលនេះ មិនបានធូរស្រាលទេ។ ក៏ប៉ុន្តែសាក្សី ដែលជាវេជ្ជបណ្ឌិតផ្នែកវិកលវិទ្យា ជាគ្រូពេទ្យកម្ពុជា បានយល់ឃើញផ្ទុយពីនេះ។
ថ្ងៃទី 30 សីហា 2012
ដោយ: សុខ ភក្តី
CEN
ក្នុងបន្ទប់សវនាការ នៅតុលាការខ្មែរក្រហម នាព្រឹកថ្ងៃទី៣០ ខែសីហា ឆ្នាំ២០១២ លោកវេជ្ជបណ្ឌិត ស៊ីណា ហ្វាហ្សែល ( Seena Fazel ) អ្នកជំនាញឯកទេស វាយតម្លៃជំងឺរបស់លោកស្រី អៀង ធីរិទ្ធ ដែលមានវេជ្ជបណ្ឌិត ៤ រូប បានលើកឡើងថា ការវាយតម្លៃជាថ្មីរបស់ក្រុមវេជ្ជបណ្ឌិត អ្នកជំនាញវិកលចរិក និងជំនាញមនុស្សចាស់ បានលើកឡើងថា មកដល់ពេលនេះ អាការៈជំងឺរបស់លោកស្រី អៀង ធីរិទ្ធ គ្មានការធូរស្រាលណាមួយទេ ទោះបីជាមានការព្យាបាលអស់រយៈពេល ៦ ខែមកហើយក៏ដោយ។
ក៏ប៉ុន្តែលោកស្រី ចក់ ធីតា វេជ្ជបណ្ឌិត ឯកទេសវិកលវិទ្យា និងជាអនុប្រធានមន្ទីរពេទ្យមិត្តភាពខ្មែរ-សូវៀត ក្នុងទីក្រុងភ្នំពេញ បានលើកឡើងថា លោកស្រី អៀង ធីរិទ្ធ មិនបានបង្ហាញរោគសញ្ញាណាមួយ ដែលជាជំងឺវង្វេងវង្វាន់នោះទេ។
អំណះអំណាងរបស់ក្រុមវេជ្ជបណ្ឌិត ជាអ្នកជំនាញ និងសាក្សីខាងលើនេះ បានធ្វើឡើង ក្នុងសវនាការសាជាថ្មី របស់អង្គជំនុំជម្រះសាលាដំបូង របស់តុលាការខ្មែរក្រហម លើកាយសម្បទា និងបញ្ញាស្មារតី លោកស្រី អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ចខ្មែរក្រហម។
អង្គសវនាការរយៈពេលពីរថ្ងៃ ចាប់ពីថ្ងៃទី៣០ និងថ្ងៃទី៣១ ខែសីហា ឆ្នាំ២០១២ ធ្វើឡើង ដើម្បីស្តាប់ការវាយតម្លៃរបស់អ្នកជំនាញវេជ្ជសាស្ត្រ លើស្ថានភាពកាយសម្បទា និងបញ្ញាស្មារតីរបស់លោកស្រី អៀង ធីរិទ្ធ នៅក្នុងការចូលរួមការជំនុំជម្រះក្តី។
ក្នុងបន្ទប់សវនាការរបស់តុលាការខ្មែរក្រហម នៅព្រឹកថ្ងៃទី៣០ ខែសីហា ឆ្នាំ២០១២ រួមមាន៖ ភាគីសហព្រះរាជអាជ្ញា ភាគីមេធាវីដើមបណ្តឹងរដ្ឋប្បវេណី ការពារជនរងគ្រោះ និងភាគីមេធាវីការពារលោកស្រីអៀងធីរិទ្ធ។
អ្នកជំនាញវេជ្ជសាស្ត្រជាតិ និងអន្តរជាតិ ៣ រូប គឺលោកវេជ្ជបណ្ឌិត ហួត លីនណា លោកវេជ្ជបណ្ឌិត ស៊ីណា ហ្វាហ្សែល ( Seena Fazel ) និងលោកសាស្ត្រាចារ្យជំនាញមនុស្សចាស់ ចន ខាំប៊ែល ( John Campbell ) បានបង្ហាញខ្លួន ក្នុងបន្ទប់សវនាការ ដើម្បីផ្តល់នូវរបាយការណ៍វាយតម្លៃរបស់ខ្លួន លើអាការជំងឺរបស់លោកស្រី អៀង ធីរិទ្ធ។
អង្គុយចំពោះមុខអង្គការសវនាការ នៅព្រឹកនេះ ក៏មានសាក្សីម្នាក់ គឺលោកស្រី ចក់ ធីតា ជា វេជ្ជបណ្ឌិត ឯកទេសវិកលវិទ្យា និងជាអនុប្រធានមន្ទីរពេទ្យមិត្តភាពខ្មែរ-សូវៀត ក្នុងទីក្រុងភ្នំពេញ ដើម្បីផ្តល់នូវសក្ខីកម្ម អំពីស្ថានភាពជំងឺរបស់លោកស្រី អៀង ធីរិទ្ធ ផងដែរ។ លោកស្រីវេជ្ជបណ្ឌិត ចក់ ធីតា បានចូលរួមពិនិត្យអាការជំងឺរបស់លោកស្រី អៀង ធីរិទ្ធ ចាប់តាំងពីខែកុម្ភៈ ឆ្នាំ២០១១។
ចំណែកលោកស្រី អៀង ធីរិទ្ធ រួមទាំងលោកអៀងសារី ដែលជាស្វាមីរបស់លោកស្រី មិនបានបង្ហាញខ្លួន ក្នុងបន្ទប់សវនាការទេ តែពួកគាត់ទាំងពីរ ដែលកំពុងមានជំងឺ ត្រូវបានគេអះអាងថា កំពុងតាមដានសវនាការនៅថ្ងៃនេះដែរ តែធ្វើឡើងតាមរយៈកញ្ចក់ទូរទស្សន៍ ដែលមានការផ្សាយបន្តផ្ទាល់ ចេញពីបន្ទប់សវនាការ។
មានអាយុ ៨០ ឆ្នាំ លោកស្រី អៀង ធីរិទ្ធ ត្រូវបានក្រុមគ្រូពេទ្យជាតិ និងអន្តរជាតិ បានអះអាងកាលពីចុងឆ្នាំ២០១១ ថា លោកស្រី មានជំងឺវង្វេងវង្វាន់ ឬអាចជាជំងឺបាត់ការចងចាំ ដែលមិនអាចនាំមកកាត់ទោស ក្នុងសំណុំរឿង០០២ ជាមួយនឹងលោក អៀង សារី លោកខៀវសំផន និងលោក នួនជា បានឡើយ។
ក៏ប៉ុន្តែក្រោយមក អង្គជំនុំជម្រះរបស់តុលាការកំពូល នៅតុលាការខ្មែរក្រហម បានកំណត់ឲ្យមានការព្យាបាលជំងឺរបស់លោកស្រី អៀង ធីរិទ្ធ រយៈពេល ៦ ខែ គិតមកដល់ពេលនេះ។ ដូច្នេះនៅថ្ងៃទី៣០ ខែសីហា ឆ្នាំ២០១២ ក្រុមគ្រូពេទ្យ និងអ្នកជំនាញ ត្រូវបង្ហាញរបាយការណ៍ថ្មីចុងក្រោយពីស្ថានភាពរបស់ជំងឺលោកស្រី អៀង ធីរិទ្ធ៕