ខេត្តកំពង់ឆ្នាំង: អគ្គិភ័យបានឆាបឆេះឃ្លាំងស្តុកអេតចាយដ៏ធំមួយ ស្ថិតនៅចំកណ្តាលក្រុងកំពង់ឆ្នាំង កាលពីវេលាម៉ោង ៣ និង ២០ នាទី រសៀលថ្ងៃទី១០ ខែវិច្ឆិកា ឆ្នាំ២០១២។ ប៉ុន្តែហេតុការណ៍នេះ មិនបណ្តាលអោយមនុស្សរងគ្រោះថ្នាក់ឡើយ។
ថ្ងៃទី 11 វិច្ឆិកា 2012
ដោយ: បរិបូរណ៍
CEN
នៅក្នុងហេតុការណ៍នេះ គេង្កេតឃើញរថយន្តពន្លត់អគ្គិភ័យចំនួនពីរគ្រឿង របស់ស្នងការដ្ឋាននគរបាលខេត្តកំពង់ឆ្នាំង រួមនិងកម្លាំងប៉ូលិសរាប់សិបនាក់ បានចេញជួយអន្តរាគមន៍ បាញ់ទឹកពន្លត់ភ្លាមៗផងដែរ ទើបភ្លើងរលត់ មិនអាចឆេះ រាលដាលទៅដល់លំនៅដ្ឋាន របស់ប្រជាពលរដ្ឋដែលស្ថិតនៅជុំវិញនោះ។
លោក លុយ ឌីណា ប្រធានការិយាល័យអគ្គិភ័យ នៃស្នងការដ្ឋាននគរបាល ខេត្តកំពង់ឆ្នាំង បានអោយដឹងថា ករណីគ្រោះអគ្គីភ័យនេះ កើតឡើង គឺបណ្តាលមកពីម្ចាស់ទីតាំងអេតចាយនោះ គ្រីបកំប៉ុងស្ព្រាយ ដែលមាននៅសល់ហ្គ្រាស មិនបានប្រុងប្រយ័ត្ន បណ្តាលអោយផ្ទុះ ចេញជាអណ្តាតភ្លើង ឆាបឆេះសន្ធោសន្ធៅតែម្តង។
ប្រជាពលរដ្ឋនៅក្នុងក្រុងកំពង់ឆ្នាំង បានសំដែងនូវការព្រួយបារម្ភ និងបានសំណូំមពរដល់អាជ្ញាធរ និងសមត្ថកិច្ច អោយជួយធ្វើការអប់រំណែនាំដល់ម្ចាស់ឃ្លាំងអេតចាយមួយនេះផង ពីព្រោះកន្លងទៅតាមការសង្កេតឃើញ ការទុកដាក់របស់របរអេតចាយ មានភាពរញ៉េរញ៉ៃ ដែលអាចងាយនឹងបង្កអោយមានអគ្គិភ័យកើតឡើង៕
អគ្គិភ័យឆាបឆេះឃ្លាំងស្តុកអេតចាយមួយ កណ្តាលក្រុងកំពង់ឆ្នាំង
