ដោយ៖ ពេជ្រ សុធារី\
ថ្ងៃចន្ទ ទី23 ខែធ្នូ ឆ្នាំ2013
http://vodhotnews.com
គណបក្សសង្គ្រោះជាតិ បានបង្ហាញមហាវិថី និងរុក្ខវិថីមួយចំនួន ដែលក្រុមបាតុករគាំទ្រគណបក្សត្រូវហែក្បួនបាតុកម្ម នៅរសៀលថ្ងៃចន្ទ ទី២៣ ខែធ្នូនេះ។
យោងសេចក្ដី ជូនដំណឺងរបស់លោក សម រង្ស៊ី ប្រធានគណបក្សសង្គ្រោះជាតិ ដែលមានការបង្ហាញផែនទីតម្រាយផ្លូវហែក្បួន ក្នុងបណ្តាញទំនាក់ទំនងសង្គមហ្វេសប៊ុក បានឲ្យដឹងថា ចេញពីទីលានប្រជាធិបតេយ្យ តាមផ្លូវ១០៨ រហូតដល់កែងផ្លូវ៥១ បត់ស្តាំ រហូតដល់កែងផ្លូវ ៣១០ បត់ស្តាំ រហូតដល់កែងវិថីព្រះត្រសក់ផ្អែម (៦៣) បត់ឆ្វេង រហូតដល់កែងមហាវិថីម៉ៅសេទុង បត់ស្តាំ រហូតកែងមហាវិថីព្រះមុនីវង្ស បត់ឆ្វេង រហូតដល់ស្តុបក្បាលថ្នល់ បត់ស្តាំ តាមផ្លូវ (២៧១) រហូតដល់កែងផ្លូវ ១៩៩ បត់ស្តាំ ឆ្លងកាត់មហាវិថីម៉ៅសេទុង រហូតដល់ស្តុបផ្សារអូឡាំពិក បង់ស្តាំ តាមមហាវិថីព្រះមុនីវង្ស រហូតដល់កែងវិថីព្រះត្រសក់ផ្អែម បត់ឆ្វេង ឆ្ពោះទៅផ្សារធំថ្មី រួចបត់ទៅទីលានប្រជាធិបតេយ្យវិញ។
ថ្ងៃទី២៣ ខែធ្នូនេះ ជាថ្ងៃទី៩ហើយ ដែលគណបក្សសង្គ្រោះជាតិ បានចេញដើរក្បួនការតវ៉ាតាមដងផ្លូវនានា នៅរាជធានីភ្នំពេញ ដើម្បីទាក់ទាញការចាប់អារម្មណ៍របស់អ្នកធ្វើ ដំណើរ អ្នករស់នៅក្នុងរាជធានីភ្នំពេញ ដើម្បីចូលរួមគាំទ្រចលនាមហាបាតុកម្ម ដែលគណបក្សនេះ ហៅថា ការទាមទារឲ្យមានការបោះឆ្នោតឡើងវិញ និងទាមទារឲ្យលោកនាយករដ្ឋមន្ត្រី ហ៊ុន សែន ចុះចេញពីតំណែង ខណៈគណបក្សប្រឆាំងនេះ មិនទទួលស្គាល់លទ្ធផលបោះឆោ្នតនៅថ្ងៃទី២៨ ខែកក្កដា ដោយចោទថា មានការលួចបន្លំតួលេខសន្លឹកឆ្នោតពីគណបក្សកាន់អំណាច៕
សូមសរសេរមកកាន់ កញ្ញា ពេជ្រ សុធារី តាមរយៈ sotheary@vodhotnews.com