ដោយ៖ ថុល ស្រីលក្ខណ៍
ថ្ងៃចន្ទ ទី23 ខែធ្នូ ឆ្នាំ2013
http://vodhotnews.com
សម្ព័ន្ធសហជីព និងសហព័ន្ធសហជីព៤ បានយកញត្តិដែលមានស្មាមមេដៃរបស់កម្មករជាង៧ម៉ឺននាក់ទាមទារតម្លើងប្រាក់ខែដល់១៥៤ដុល្លារ ទៅស្ថាប័នចំនួន២ ខណៈក្រសួងការងារនឹងប្រជុំសម្រេចពីការកំណត់ដំឡើងប្រាក់ឈ្នួលរបស់កម្មករនៅថ្ងៃស្អែកនេះ។
ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក អាត់ ធន់ មានប្រសាសន៍ថា នេះជាលើកទី៣ហើយដែលក្រុមសហជីពដាក់ញត្តិទៅដាក់នៅសមាគមរោងចក្រកាត់ដេរកម្ពុជា និងក្រសួងការងារ។ លោកថាការដាក់ញត្តិជាថ្មីទៀតនេះ ដើម្បីបង្ហាញពីការចង់បានប្រាក់ខែគោលរបស់កម្មករជាទុនក្នុងការពិភាក្សាគ្នានៅថ្ងៃស្អែក។ លោកបញ្ជាក់ថា ពេលដាក់ញត្តិស្ថាប័នទាំង២នេះស្វាគមន៍ ហើយសន្យាថានឹងយកទៅពិភាក្សាគ្នាជាមួយថ្នាក់លើ។
ក្នុងញត្តិ ដាក់ជូនសមាគមរោងចក្រកាត់ដេរកម្ពុជា និងក្រសួងការងារនោះ ទាមទារចំនួន៦ចំណុច រួមមាន ទាមទារប្រាក់ឈ្នួលកម្មកររហូតដល់១៥៤ដុល្លារក្នុង១ខែ បញ្ឈប់ការប្រើប្រាស់កិច្ចសន្យារយៈ ពេលខ្លី តម្កល់ប្រាក់អតីតភាពកម្មករនៅធនាគារ ស្នើរមិនឲ្យមានអ្នកមានអំណាចកាងពីក្រោយក្រុមហ៊ុន ដោះស្រាយបញ្ហាកម្មកររោងចក្រSL និងទាមទារប្រាក់ថ្លៃអាហារ៣ពេលដល់កម្មករ។
បើតាមសហជីពបានឲ្យដឹងថា នៅថ្ងៃស្អែកនេះនឹងមានកម្មករប្រមាណជា៣០០ទៅ៥០០នាក់ តំណាងឲ្យសហជីពតាមខេត្តមកជួបជុំគ្នានៅខាងមុខក្រសួងការងារ ដើម្បីស្តាប់លទ្ធផលចរចារវាងសហជីព តំណាងថៅកែរោងចក្រ និងក្រសួងពាក់ព័ន្ធពីការដំឡើងប្រាក់ឈ្នួលកម្មករ៕
សូមសរេសេរមកកាន់អ្នកនាងថុល ស្រីលក្ខណ៍ sreyleak@vodhotnews.com