ដោយ៖ ថុល ស្រីលក្ខណ៍ និង នួនបូរិន
ថ្ងៃអង្គារ៍ ទី24 ខែធ្នូ ឆ្នាំ2013
http://vodhotnews.com
ក្រុមគ្រូបង្រៀនគ្រប់កម្រិតសិក្សានៅខេត្តឧត្តរមានជ័យ ទទូចសុំក្រសួងអប់រំ ឬស្ថាប័នពាក់ព័ន្ធ ជួយផ្ដល់ប្រាក់ខែដែលមន្ទីរអប់រំខេត្តនេះបានជំពាក់ សម្រាប់ ខែវិច្ឆិកា ឆ្នាំ២០១៣ ចំនួន១០ម៉ឺនរៀលម្នាក់ៗ ត្រឡប់មកឲ្យពួកគាត់ ខណៈដែលគ្រូបង្រៀនទាំងនោះ រិះគន់ថា ប្រាក់តិចហើយ ឆ្លៀតបើកប្រាក់ជំពាក់ពួកគាត់ទៀត ។
តំណាងគ្រូបង្រៀនខេត្តឧត្តរមានជ័យ លោក ញ៉ន សារុន បានឲ្យVODដឹងថា ក្រសួងបានបើកប្រាក់ខែឲ្យគ្រូបង្រៀនគ្រប់កំរិតនៅក្នុងខេត្តនេះមិនគ្រប់ចំនួន ដោយជំពាក់ម្នាក់១០ម៉ឺនរៀលសម្រាប់ខែវិច្ឆិកា។ លោកបញ្ជាក់ថា បញ្ហានេះធ្វើឲ្យប៉ះពាល់យ៉ាងខ្លាំងដល់ជីវភាពគ្រូបង្រៀនដែលមានប្រាក់ខែតិច តួចនេះ។
គ្រូបឋមសិក្សាតាដេវ នៅឃុំត្រពាំងសាវ ស្រុកអន្លង់វែង របស់ខេត្តនេះគឺ លោក ធឿន ធារិន មានប្រសាសន៍ថា ការបើកប្រាក់ខែយឺត និងជំពាក់នេះធ្វើឲ្យប៉ះពាល់យ៉ាងខ្លាំងដល់ជីវភាពគ្រូ និងគុណភាពអប់រំ។ លោកថា រដ្ឋាភិបាលគួរតែដោះស្រាយបញ្ហានេះឲ្យបានឆាប់។
មន្ត្រីរតនាគារខេត្តឧត្តមានជ័យដែលសុំមិនបញ្ចេញឈ្មោះមានប្រសាសន៍ថា បញ្ហានេះដោយសាររដ្ឋាភិបាលទើបតែប្រកាសដំឡើងកម្មប្រាក់ដល់មន្ត្រីរាជការ ទៅតាមកំរិត ទើបធ្វើឲ្យមានការខ្វះខាតថវិកា ។តែលោកថាប្រាក់ខែទាំងនោះ នឹងបញ្ចូលឲ្យគ្រូបង្រៀនវិញនៅពេលបើកប្រាក់សម្រាប់ខែក្រោយ។
VODនៅមិនទាន់សុំការបំភ្លឺករណីនេះពីមន្ត្រី មន្ទីរអប់រំរបស់ខេត្ត ឧត្តរមានជ័យ បានទេនៅ ថ្ងៃនេះ ។
កាលពីថ្ងៃទី១៨ខែធ្នូ គ្រូបង្រៀនគ្រប់កម្រិតសិក្សាមានចំនួនជាង ១ពាន់នាក់ មកពី៥ក្រុង-ស្រុក ក្នុងខេត្តឧត្តរមានជ័យ ពួកគាត់ទទួលបានប្រាក់បៀវត្សសម្រាប់ខែវិច្ឆិកា ពីមន្ទីរអប់រំ បន្ទាប់ពីពួកគាត់ទទូចដល់រដ្ឋមន្ត្រីក្រសួងអប់រំ ជាពិសេសប្រមុខដឹកនាំរដ្ឋាភិបាល ជួយអន្តរាគមន៍ដល់ផ្នែកពាក់ព័ន្ធឲ្យបើកប្រាក់ខែជូនពួកគាត់ឲ្យបានឆាប់ប៉ុន្តែ ចំពោះប្រាក់១០ម៉ឺនរៀលដែលជំពាក់គ្រូបង្រៀន សម្រាប់ខែវិច្ឆិកានៅតែ ជំពាក់ នៅឡើយ ដែលជាហេតុធ្វើឲ្យពួកគាត់បានបន្តការតវ៉ាដូចនេះ៕
សូមសរសេរមកកាន់អ្នកនាងថុល ស្រីលក្ខណ៍ sreyleak@vodhotnews.com