Friday, 28 March 2014
ផាក់ ស៊ាងលី
ភ្នំពេញ ប៉ុស្តិ៍
កោះកុងៈ បន្ទាប់ពីមិនមានការឆ្លើយតបវិជ្ជាមានណាមួយពីអាជ្ញាធរ និងក្រុមហ៊ុនក្នុងអំឡុងពេលតវ៉ាជាង ១០ថ្ងៃ មកនេះប្រជាសហគមន៍ អារ៉ែង ២០០នាក់ នឹងជិះម៉ូតូ ១០០ គ្រឿងហែក្បួនដាក់ញត្តិទៅសាលាខេត្ត និងស្ថាប័នពាក់ព័ន្ធផ្សេងៗនៅថ្ងៃចន្ទសប្តាហ៍ក្រោយ ដើម្បីស្នើសុំឲ្យបញ្ឈប់គម្រោងសាងសង់ទំនប់វារីអគ្គិសនីស្ទឹង អារ៉ែង របស់ក្រុមហ៊ុន ចិន Sinohydro។
គិតត្រឹមថ្ងៃព្រហស្បតិ៍ម្សិលមិញ ប្រជាសហគមន៍ជនជាតិដើមភាគតិចជងនៅតំបន់ស្ទឹង អារ៉ែង ក្នុង ស្រុកថ្មបាំង បានធ្វើការតវ៉ាទប់ស្កាត់គ្រឿងចក្រក្រុមហ៊ុន ចិន មិនឲ្យចូលទៅតំបន់នោះអស់រយៈពេល ១៤ ថ្ងៃហើយ។ នៅនឹងច្រកចូលនោះប្រជាពលរដ្ឋបានឈរលើកបដាដែលសរសេរថា «ទំនប់វារីអគ្គិសនី អារ៉ែង បំផ្លាញជីវភាពរស់នៅជនជាតិដើមយើង» «អ្នកចេះពឹងលើប្រាជ្ញា អ្នកស្រែចម្ការពឹងលើដី និងការអភិរក្ស» និង «ទំនប់វារីអគ្គិសនីអារ៉ែង បំផ្លាញធនធានធម្មជាតិ» ជាដើម។
លោក វ៉ែន វ៉ន អាយុ ៣៥ឆ្នាំ តំណាងសហគមន៍ជនជាតិដើម បានឲ្យដឹងថា ប្រជាសហគមន៍បានឆ្លាស់វេនគ្នាយាមនៅច្រកចូលទាំងយប់ទាំងថ្ងៃ។ ដោយសារតែពុំមានការឆ្លើយតបវិជ្ជមានណាមួយពីសំណាក់អាជ្ញាធរនិងក្រុមហ៊ុន ចិន ប្រជាសហគមន៍ បណ្តាញព្រះសង្ឃឯករាជ្យ ក្រុមយុវជន និងអង្គការមាតាធម្មជាតិ នឹងហែក្បួនយកញត្តិទៅដាក់នៅសាលាខេត្ត មន្ទីរបរិស្ថានជលផល កសិកម្ម និងមន្ទីររ៉ែ និងថាមពលនៅថ្ងៃចន្ទសប្តាហ៍ក្រោយ។
លោក វ៉ែន វ៉ន បញ្ជាក់ថា៖ «ពួកយើង ២០០ នាក់នឹងជិះម៉ូតូ ១០០ គ្រឿងហែក្បួនចំនួន ៩០ គីឡូម៉ែត្រទៅខេត្តដើម្បីដាក់ញត្តិសុំឲ្យបញ្ឈប់គម្រោងធ្វើទំនប់វារីអគ្គិសនីនៅ អារ៉ែង តែម្តង»។
លោកថ្លែងថា គម្រោងសង់ទំនប់ អារ៉ែង ប៉ះពាល់ដល់ប្រជាសហគមន៍ស្រែចម្ការ ធនធានធម្មជាតិរាប់រយប្រភេទ ជាពិសេសគឺប្រភេទសត្វកម្រជិតផុតពូជ ដូចជា ត្រីនាគ និងក្រពើភ្នំជាដើម។ កាលពីថ្ងៃពុធមន្រ្តីបីនាក់របស់អង្គការសហប្រជាជាតិប្រចាំនៅ កម្ពុជា ដែលរួមមានបុរសបរទេសម្នាក់ និងខ្មែរពីរនាក់បានចុះទៅអង្កេតនៅហ្នឹងកន្លែងពលរដ្ឋកំពុងតវ៉ានោះ ហើយក៏បានជួយពន្យល់ពីសិទ្ធិរបស់ប្រជាពលរដ្ឋ។
លោក វ៉ន បានថ្លែងដូច្នេះថា៖ «យើងជាជនជាតិដើមនៅដាច់ស្រយាលមិនសូវចេះដឹងពីរឿងសិទ្ធិអីនោះទេ។ អ៊ីចឹងហើយចេះតែខ្លាចគេគំរាមដេញចេញ។ តែឥឡូវបាន UN ចុះមកជួយពន្យល់ប្រាប់ពីសិទ្ធិរបស់យើងទើបយើងបានយល់ដឹងខ្លះ»។
លោក នាង បូរ៉ាទីណូ អ្នកសម្របសម្រួលអង្គការសិទ្ធិមនុស្ស អាដហុក ខេត្តកោះកុង បានសង្កេតឃើញថា ចាប់តាំងពីពលរដ្ឋធ្វើការតវ៉ាមកអាជ្ញាធរបានព្យាយាមសម្រុះសម្រួលជាមួយនឹងសហគមន៍ដែរដើម្បីឲ្យក្រុមហ៊ុនបានចូលទៅតំបន់ អារ៉ែង នោះ។ ប៉ុន្តែសហគមន៍មិនយល់ព្រមហើយទាមទារឲ្យបញ្ឈប់គម្រោងនោះតែម្តង។
លោក បូរ៉ាទីណូ ថ្លែងថា៖ «ការហែក្បួនដាក់ញត្តិជាសិទ្ធិរបស់ពលរដ្ឋឲ្យអាជ្ញាធរថ្នាក់ខេត្ត ជាតិ និងអន្តរជាតិបានដឹងពីទុក្ខកង្វល់របស់ពួកគាត់ហើយរកដំណោះស្រាយ»។ ទោះយ៉ាងណាលោកបានលើកឡើងថា ក្រុមហ៊ុន ចិន ដែលធ្វើវិនិយោគនៅ កម្ពុជា ភាគច្រើនមិនងាយនឹងបោះបង់គម្រោងរបស់គេចោលនោះទេ។
លោក អ៊ូច ទូច នាយករដ្ឋបាលសាលា ខេត្តកោះកុង ថ្លែងថា អាជ្ញាធរមិនទាន់បានដឹងពីគម្រោងហែក្បួនដាក់ញត្តិរបស់ពលរដ្ឋនោះទេ។ ទោះយ៉ាងណាសាលាខេត្តនឹងទទួលយកញត្តិរបស់ពួកគាត់។
លោក អ៊ូច ទូច បានបញ្ជាក់ថា៖ «តាមទម្លាប់យើងមិនដែលបដិសេធមិនទទួលយកនោះទេ តែកម្រិតនៃការដោះស្រាយយ៉ាងណានោះ គឺវាអាស្រ័យលើគោលនយោបាយ និងច្បាប់របស់រដ្ឋាភិបាល»៕