ដោយ៖ ឡាយ សាមាន
ថ្ងៃអាទិត្យ ទី24 សីហា 2014
http://vodhotnews.com
ក្រុមសហជីព លើកឡើងថា ករណីកម្មករដួលសន្លប់ គឺដោយសារកត្តាប្រាក់បៀរវត្ស៍នៅមានកម្រិតទាប និងរោងចក្រភាគច្រើនមិនបានរៀបចំទៅតាមស្តង់ដារអន្តរជាតិ។
ការលើកឡើងនេះជាការឆ្លើយតបទៅនឹង មន្ត្រីក្រសួងការងារ និងបណ្តុះបណ្តាលវិជ្ជាជីវៈ និងអគ្គលេខារងនៃសមាគមរោងចក្រកាត់ដេរនៅកម្ពុជា ដែលលើកឡើងនៅក្នុងកម្មវិធីតុមូលរបស់មជ្ឈមណ្ឌលកម្ពុជា ដើម្បីប្រព័ន្ធផព្វផ្សាយឯករាជ្យ នៅថ្ងៃនេះថា កម្មករដួលសន្លប់បណ្តាលមកពីការធ្វើការថែមម៉ោង ការបរិភោគ និងកម្តៅក្នុងរោងចក្រ។
ប្រធានសហព័ន្ធសហជីពចលនាកម្មករ លោក ប៉ាវ ស៊ីណា មានប្រសាសន៍ថា មូលហេតុចម្បងបណ្តាលឲ្យកម្មករដួលសន្លប់ គឺកត្តាប្រាក់ឈ្នួលទាប និងកម្តៅក្នុងរោងចក្រ។ លោកបន្តថា កត្តាប្រាក់ឈ្នួលទាបនេះហើយ ដែលបង្ខំចិត្តឲ្យកម្មករនិយោជិត ធ្វើការថែមម៉ោង និងមិនមានលទ្ធភាពបរិភោគអាហារដែលមានវីតាមីន។ លោកបន្ថែមថា បញ្ហាបរិស្ថានក្នុងរោងចក្រ មិនមានលក្ខណៈស្តង់ដារ ដូចជា ក្លិន បរិយាកាស និងកម្តៅ គឺជាធាតុផ្សំឲ្យកម្មករដួលសន្លប់។
ទោះជាយ៉ាងលោក ប៉ាវ ស៊ីណា បញ្ជាក់ថា លោកប្រកាន់ជំហរទាមទារប្រាក់ឈ្នួលឲ្យកម្មករអប្បបរមា ១៧៧ ដុល្លារ ដើម្បីឲ្យជីវភាពកម្មករមានភាពប្រសើរឡើង ហើយលោកព្រមានថា បាតុកម្មនឹងផ្ទុះឡើងនៅចុងឆ្នាំនេះ ប្រសិនបើមិនមានដំណោះស្រាយសមរម្យ។
យល់ឃើញស្រដៀងគ្នានេះដែរ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា លោក អាត់ ធន់ យល់ថា ប្រាក់បៀវត្សទាប ជាកត្តានាំឲ្យកម្មករធ្វើការថែមម៉ោង បរិភោគមិនគ្រប់គ្រាន់ និង ស្នាក់នៅកន្លែងមិនមានផាសុភាព។ លោកបន្តថា ជាពិសេសថៅកែរោងចក្រភាគច្រើននៅកម្ពុជា មិនបានគោរពតាមច្បាប់ការងារ និងស្តង់ដារសុវត្ថិភាព ដោយសារថៅកែទាំងនោះមានអ្នកមានអំណាចចាំជួយ។ លោកបន្ថែមថា ទោះបីក្រសួងការងារបង្កើតគណៈកម្មការទប់ស្កាត់ករណីសន្លប់ក៏ដោយ ក៏គ្មានន័យដែរ ព្រោះគណៈកម្មការចុះពិនិត្យតែក្រោយពេលដែលកម្មករសន្លប់តែប៉ុណ្ណោះ។ លោកក៏ជំរុញឲ្យក្រសួងការងារ ចាត់វិធានការក្តៅទៅលើរោងចក្រណា ដែលមិនគោរពតាមច្បាប់ការងារដើម្បីជាការព្រមានដល់រោងចក្រដទៃ។
ផ្អែកតាមរបាយការណ៍របស់ក្រសួងការងារ និងបណ្ដុះបណ្ដាលវិជ្ជាជីវៈឲ្យដឹងថា ក្នុងរយៈពេល ៦ខែដើមឆ្នាំ២០១៤ ចំនួនកម្មករដួលសន្លប់បានកើនដល់ ៩០០នាក់ ដែលចំនួននេះកើន២ដងខ្ពស់ជាងឆ្នាំ២០១៣។
សូមសរសេរមកកាន់លោក ឡាយ សាមាន តាមរយៈ samean@vodhotnews.com