Thu, 1 January 2015
ភ្នំពេញប៉ុស្តិ៍
ភ្នំពេញ: រ៉ឺម៉កដើរដោយថាមពលព្រះអាទិត្យដំបូងគេនៅកម្ពុជាបានចាប់ផ្ដើមចរាចរណ៍តាមដងវិថីនានាក្នុងរាជធានីភ្នំពេញ។
អង្គការ Aziza’s Place កាលពីខែមុនបានចាប់ផ្ដើមប្រើរ៉ឺម៉កដែលផលិតក្នុងប្រទេសកម្ពុជាដោយក្រុមហ៊ុនអូស្ដ្រាលី Star 8 ជារទេះលក់កាហ្វេចល័ត ដោយជួលបុគ្គលិកនារីដែលធ្លាប់ធ្វើការនៅលើគំនរសំរាមដ៏គ្រោះថ្នាក់។
រ៉ឺម៉កកាហ្វេ Aziza’s Coffee ពណ៌ខៀវផ្ទៃមេឃបានធ្វើដំណើរនៅម្ដុំទួលទំពូងលើវិថី១៥៥ ចន្លោះផ្លូវ៤៥៤ និង៤៥៦ ដែលមានលក់កាហ្វេទឹកកក តែទឹកកក នំប៉័ងរសជាតិចេក ញាំមីខ្ចប់ស្លឹកចេក ទឹកខ្ញី និងទឹកក្រូចឆ្មារ។
អ្នកនាំពាក្យឲ្យអង្គការ Aziza’s Place អ្នកនាង Aimee Cheung បាននិយាយថា៖ «ជម្រើសរបស់យើងគឺការចំណាយប្រាក់ច្រើនជាងមុន និងឆក់យកឱកាសបង្កើតភាពប្រឌិត ព្រមទាំងជួយដល់បរិស្ថាន។ បើមិនដូច្នោះទេ ពេលយើងចំណាយតិចពីដំបូង និងត្រូវចាយវាយលើថ្លៃសាំងច្រើន វាមិនខុសពីរ៉ឺម៉កទូទៅដែលបញ្ចេញឧស្ម័នពុលទៅក្នុងទីក្រុងកង្វក់ស្រាប់នោះទេ»។
បន្ទះសូឡារបស់រ៉ឺម៉កស្ថិតនៅលើកដំបូល និងប្រើអាគុយ៥។ បើបានសាកភ្លើងពី៦ទៅ៨ម៉ោង រ៉ឺម៉កអាចរត់មានចម្ងាយផ្លូវពី៨០ទៅ១០០គីឡូម៉ែត្រអាស្រ័យលើទម្ងន់ផ្ទុក។
រ៉ឹម៉កមួយគ្រឿងត្រូវប្រើបុគ្គលិកនារី៣នាក់ដែល២នាក់ជាអ្នកបម្រើភ្ញៀវ ហើយម្នាក់ទៀតជាអ្នកឆុងកាហ្វេ និងធ្វើម្ហូប។ ជាមធ្យម បុគ្គលិកនីមួយៗគួរតែរកចំណូលប្រមាណជា២០០ដុល្លារក្នុងមួយខែ។
បុគ្គលិកម្នាក់គឺជាស្ដ្រីមេម៉ាយកូន៥នាក់ វីន សឿន វ័យ៤០ឆ្នាំ ដែលដើររើសអេតចាយ និងតែងតែគ្មានប្រាក់ចិញ្ចឹមកូន បានសម្ដែងចំណាប់អារម្មណ៍ថា៖ «ឥឡូវ ខ្ញុំមានការងារធ្វើសមរម្យហើយ។ ខ្ញុំរីករាយខ្លាំងណាស់ ហើយខ្ញុំមានមោទនភាពចំពោះខ្លួនឯងមែនទែន»។
មិនមែនមានតែរ៉ឺម៉ក អង្គការ Aziza’s Coffee ទេដែលប្រើថាមពល សូឡា ប៉ុន្ដែរ៉ឺម៉កស្ទួយបរិស្ថាន នេះក៏បានប្រើក្រដាសខ្ចប់នំ ជំនួសប្លាស្ទីក និងបានបញ្ចុះតម្លៃ៥០០រៀលចំពោះការប្ដូរដបប្លាស្ទីក និងកំប៉ុងអាលុយមីញ៉ូមមកច្នៃប្រើវិញ។
អ្នកនាំពាក្យរូបនេះ បានបន្ដថា អង្គការ Aziza’s Place មានក្ដីសង្ឃឹមថា ថ្ងៃណាមួយ ខ្លួននឹងពង្រីកសេវាកម្មរ៉ឺម៉កកាហ្វេថាមពលសូឡាបន្ថែមទៀតដើម្បីផ្ដល់ឱកាសឲ្យបុគ្គលិកនារីបានចូលធ្វើការច្រើន។
គោលបំណងនេះគឺត្រូវមានមូលនិធិមីក្រូហ្វាញណានសម្រាប់ឲ្យបុគ្គលិកអាចធ្វើជាម្ចាស់អាជីវកម្មដោយខ្លួនឯងបាន៕ HR
Louisa Wright
សូមអបអរសាទរ ដល់ ការបង្កេីន ការងារសមរម្យ ដល់ ស្ត្រីខ្មែរ ដែលខ្វះមធ្យោបាយ ក្នុងការឧបត្ថម្ភជីវិត និង គ្រួសារ។
សូមអរគុណ។
សំនៀង