លោក គីម សាន រងការចោទបង្ហោះរូបអាក្រាត ម៉ូនីកា។ រូបថត សហការី
Tue, 21 July 2015
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: ថ្មីៗនេះ អ្នកនាង វណ្ណ ម៉ូនីកា តារាសម្តែងល្បីមធ្យមបានប្រកូកប្រកាសប្រាប់សារព័ត៌មានថា នាងបានតាមវែកមុខជនដែលបង្ហោះរូបស្រាតនាងឃើញហើយ។ ជាមួយនឹងសម្ដីអះអាងថា រូបស្រាតនោះជារូបថតកាត់ត តារាសម្តែង វណ្ណ ម៉ូនីកា បញ្ជាក់ថា៖ «ជននោះឈ្មោះពិត គីម សាន។ គេបានបង្កើតហ្វេសប៊ុកក្លែងក្លាយបង្ខូចកិត្តិយសរបស់ខ្ញុំដាក់ឈ្មោះ សូភី សូ»។
ប៉ុន្តែពេលនេះ បុរសវ័យក្មេងរូបនេះ ចេញមុខមកបដិសេធថា ខ្លួនមិនដែលមានរឿងអ្វីទាំងអស់ ស្រាប់តែរងគ្រោះក្រោមការចោទប្រកាន់នេះ។
មុននេះក្នុងគណនីហ្វេសប៊ុកមួយដាក់ឈ្មោះ Sophea So មានបង្ហោះរូបអាក្រាតល្វែងខាងលើជាច្រើនសន្លឹកដែលបង្ហាញពីទម្រង់មុខវណ្ណ ម៉ូនីកា។
បន្ថែមលើរូបស្រាតនេះ មានសរសេរសារខ្លីថា៖ «បែកធ្លាយតារាសម្តែងស្រី វណ្ណ ម៉ូនីកា ថតអាក្រាតកាយ»។
មិនដឹងពីចេតនាអ្នកបង្ហោះរូបនោះយ៉ាងណាទេ ហើយក៏គ្មាននរណាដឹងថា ម្ចាស់គណនីបង្ហោះរូបស្រាត វណ្ណ ម៉ូនីកា ជានរណា និងមានមុខមាត់យ៉ាងណាទេ។
ប៉ុន្តែដោយមានការអះអាងពីអ្នកនាង វណ្ណ ម៉ូនីកា ដែលកំពុងរងនូវភាពអាម៉ាស់ពីរូបអាក្រាតនេះ និយាយថា នាងស្គាល់ហើយម្ចាស់គណនីហ្វេសប៊ុក Sophea So ឈ្មោះពិត ឈ្មោះ គីម សាន។
ជាមួយនឹងពាក្យថាម្ចាស់គណនី Sophea So ដែលមានឈ្មោះពិត គីម សាន និងជាមនុស្សខ្ទើយ នាឱកាសធ្វើសន្និសីទកាសែតកាលពីរសៀលថ្ងៃទី ១១ ខែកក្កដា តារាសម្តែងស្រី ម៉ូនីកា អះអាងថា ចំពោះទង្វើដ៏អគតិរបស់ម្ចាស់គណនី Sophea So នាងបានដាក់ពាក្យបណ្ដឹងរួចហើយ ដោយចោទពីបទបង្ខូចកេរ្តិ៍ឈ្មោះ និងបរិហារកេរ្តិ៍។
ប៉ុន្តែពេលនេះ លោក គីម សាន ដែលរងការចោទ បានចេញមុខមកបដិសេធទាំងស្រុងចំពោះការចោទរបស់ ម៉ូនីកា។
ក្នុងវ័យ ១៧ ឆ្នាំ គីម សាន ដែលមិនចង់បានអ្វីក្រៅពីកិត្តិយសដែលបាត់បង់ដោយការចោទប្រកាន់ពី វណ្ណ ម៉ូនីកា នោះ បាននិយាយថា៖ «ខ្ញុំមិនចង់ទាមទារអ្វីទេ សូមតែកិត្តិយសខ្ញុំមកវិញ។ អ្នកណាគេថា ខ្ញុំនេះជាអ្នកបង្ហោះរូបស្រាតគេ បង្កើតហ្វេសប៊ុកក្លែងក្លាយ ខ្ញុំណាទៅធ្វើអ៊ីចឹងបានអីមកវិញ? ធ្វើដើម្បីអ្វី?»។
កំលោះសង្ហាដែលទើបឈានជើងចូលប្រឡូកក្នុងវិថីសិល្បៈ និងកំពុងតែថតសម្តែងបទចម្រៀងល្បីៗនៅក្នុងផលិតកម្មថោនរូបនេះប្រាប់ទៀតថា៖ «ខ្ញុំមិនចង់បានអ្វីពី វណ្ណ ម៉ូនីកា ពីការប្រឌិតថា ខ្ញុំបង្ហោះរូបស្រាតគាត់ទេ។ ខ្ញុំសូមឲ្យតែគាត់បញ្ឈប់ប្រឌិតបង្ខូចឈ្មោះខ្ញុំទៅបានហើយ តែបើគាត់មិនឈប់ហើយនៅតែដើរបរិហារនោះ នឹងមានរឿងបន្តទៀត»។
ដោយបានអះអាងពីភាពស្អាតស្អំរបស់ខ្លួនថា ខ្លួនពេញលក្ខណៈជាបុរស មិនដូចអ្នកនាងវណ្ណ ម៉ូនីកា ថាខ្ទើយនោះ បុរសវ័យក្មេង គឹម សាន បានផ្តាំទៅ វណ្ណ ម៉ូនីកា បែបពាក្យចំអកវិញថា៖ «បើ ម៉ូនីកា ថា ខ្ញុំខ្ទើយ អាចសាកបាន ហើយខ្ញុំធានា បង្កើតកូនឲ្យបាន ១០ ឲ្យនាង នេះបើខ្ញុំខ្ទើយក៏នឹងដឹងពេលនោះ»៕