ដោយ៖ ហ៊ុន សិរីវឌ្ឍន៍ | ថ្ងៃអង្គារ ទី1 ធ្នូ 2015, 05:22 PM
http://vodhotnews.com
មនុស្ស៤នាក់មានទាំងក្មេងផងដែរបានស្លាប់និង១នាក់រងរបួសធ្ងន់ ដោយសមត្ថកិច្ចខេត្តកំពង់ចាមសង្ស័យថាជនដៃដល់ដែលជាកូនប្រសា ជាប្តីនិងត្រូវឪពុក បានសម្លាប់សមាជិកគ្រួសាររបស់ខ្លួន កាលពីយប់ថ្ងៃទី៣០ ខែវិច្ឆិកា ឆ្នាំ២០១៥។
គេហទំព័រហ្វេសបុករបស់ស្នងការដ្ឋាននគរបាលខេត្តកំពង់ចាមឲ្យដឹងថាឃាតកម្មនេះបានកើតឡើងវេលាម៉ោងប្រមាណ១១យប់កាលពីថ្ងៃចន្ទ នៅចំណុចផ្ទះជនរងគ្រោះ ឈ្មោះ ស្វាយ សាខន ដែលជាឪក្មេងរបស់ជនដៃដល់។ ផ្ទះជនរងគ្រោះមានទីតាំងនៅភូមិពែងមាសជើង ឃុំស្ពឺ ស្រុកចំការលើ ខេត្តកំពង់ចាម។
បើតាមរបាយការណ៍របស់សមត្ថកិច្ច ជនសង្ស័យលើករណីឃាតកម្មនេះ មានឈ្មោះ អេង ធី អាយុ៤៧ឆ្នាំ ដែលត្រូវជាកូនប្រសារបស់លោក ស្វាយ សុខន ដែលរងរបួសធ្ងន់ក្នុងឃាតកម្មនោះ។ សមត្ថកិច្ចអះអាងថាជនសង្ស័នេះបានយកកាំបិតកាប់ទៅលើឪពុកម្ដាយក្មេក ប្រពន្ធនិងកូនទាំង២របស់ខ្លួន(កូនស្រីអាយុ៦ឆ្នាំនិងប្រុសអាយុ៤ឆ្នាំ)។ របាយការណ៍បន្ថែមថាជនសង្ស័យបានដុតផ្ទះខ្លួនឯង ប៉ុន្តែសមត្ថកិច្ចនិងប្រជាជនរស់នៅក្បែរនោះបានជួយពន្លត់ទាន់ពេល។
សមត្ថកិច្ចសន្និដ្ឋានជំហានដំបូងថាគឺករណីគំនុំរវាងឪក្មេកនិងកូនប្រសា ដោយអះអាងថាជនដៃដល់ធ្លាប់បានឪពុកក្មេកប្តឹងទៅនគរបាលឲ្យជួយ២ករណីមកហើយ ទាក់ទងនឹងបញ្ហាស្រវឹងស្រារករឿងបង្កហិង្សាក្នុងគ្រួសារនិងករណីឆក់ត្រី។
ស្នងការនគរបាលខេត្តកំពង់ចាម លោក បែន រ័ត្ន ប្រាប់វីអូឌី(VOD)នៅថ្ងៃអង្គារនេះថាសមត្ថកិច្ចកំពុងតាមចាប់ខ្លួនជនសង្ស័យនោះ។
មេឃុំស្ពឺ លោក ម៉ែន ហ៊ុន បានប្រាប់វីអូឌី(VOD)ថាជនដៃដល់គឺជាមនុស្សដែលឧស្សាហ៍ប្រើប្រាស់អំពើហិង្សាលើគ្រួសាររហូតមានការប្តឹងទៅប៉ូលិសយកជនដៃដល់ទៅអប់រំ។ លោកបន្តថាជនសង្ស័យក៏ជាមនុស្សដែលគ្រួសារឪពុកម្តាយក្មេកបានកាត់កាលចោល។ លោកមានប្រសាសន៍ថា៖ “…ប្រពន្ធទ្រាំមិនបានរត់ទៅដេកផ្ទះឪពុកទៅ វានៅតែឯង ដល់ឪពុកម្តាយក្មេកអីកាត់កាលចោលហើយអត់ទទួលស្គាល់ទេ ដេញឲ្យតែវាទៅស្រុកកំណើតវិញទៅ ប៉ុន្តែវាមិនព្រមទៅនៅតែហ្នឹង”។
មេឃុំឲ្យដឹងថាឃាតកម្មនោះបានកើតឡើងនៅវេលាម៉ោង១១យប់ ហើយប្រជាជនរស់នៅក្បែរនោះបានដឹងនៅកន្លះម៉ោងក្រោយ។លោកមេឃុំបន្ថែមថាសាកសពជនរងគ្រោះទាំង៤នាក់ត្រូវបានយកទៅបូជានៅរសៀលថ្ងៃអង្គារនេះ។ ចំណែកអ្នករងរបួសធ្ងន់ត្រូវបានបញ្ជូនមកព្យាបាលនៅមន្ទីរពេទ្យកាល់ម៉ែត្រ។
បន្ទាប់ពីឃាតកម្មកើតឡើង ប្រធានក្រុមការងារគណបក្សសង្គ្រោះជាតិប្រចាំខេត្តកំពង់ចាម លោក ឡុង រី បានចេញសេចក្តីអំពាវនាវមួយ ដោយចូលរួមរំលែកទុក្ខនិងអំពាវនាវដល់ជនរួមជាតិទាំងក្នុងនិងក្រៅប្រទេសចូលរួមបរិច្ចាគថវិកា និងចូលបច័្ចយ ដើម្បីរៀបចំពិធីបុណ្យសពក្រុមគ្រួសារនិងសម្រាប់ជួយព្យាបាលរបួសជនរងគ្រោះ ឈ្មោះ ស្វាយ សាខន ដែលជាសមាជិកក្រុមប្រឹក្សាឃុំគណបក្សសង្គ្រោះជាតិផងដែរ។ គណបក្សបានចាត់ទុកករណីឃាតកម្មនេះប្រព្រឹត្តដោយកូនប្រសារបស់ជនរងគ្រោះដែលរងរបួសធ្ងន់៕
សរសេរមកកាន់លោក ហ៊ុន សិរីវឌ្ឍន៍ តាមរយៈhunsirivadh@gmail.com