ដោយ៖ ហ៊ុន សិរីវឌ្ឍន៍ | ថ្ងៃពុធ ទី2 ធ្នូ 2015
http://vodhotnews.com
សមត្ថកិច្ចឲ្យដឹងថាបុរសម្នាក់ ឈ្មោះ អេង ធី ដែលជាប់ពាក់ព័ន្ធនឹងការសម្លាប់ប្រពន្ធ កូនពីរនាក់និងម្តាយក្មេកខ្លួនឯង បានធ្វើអត្តឃាត ដោយរត់ចូលរថយន្តសម្លាប់ខ្លួនឯង កាលពីថ្ងៃអង្គារម្សិលមិញនេះ។
កាលពីថ្ងៃចន្ទ វេលាម៉ោងប្រមាណ១១យប់ មានឃាតកម្មមួយកើតឡើងនៅចំណុចផ្ទះជនរងគ្រោះ ឈ្មោះ ស្វាយ សាខន ដែលជាឪក្មេករបស់ជនដៃដល់។ ផ្ទះជនរងគ្រោះមានទីតាំងនៅភូមិពែងមាសជើង ឃុំស្ពឺ ស្រុកចំការលើ ខេត្តកំពង់ចាម។ បើតាមរបាយការណ៍របស់សមត្ថកិច្ច ជនសង្ស័យលើករណីឃាតកម្មនេះ ត្រូវជាកូនប្រសារបស់លោក ស្វាយ សុខន ដែលរងរបួសធ្ងន់ក្នុងឃាតកម្មនោះ។ សមត្ថកិច្ចអះអាងថាជនសង្ស័នេះបានយកកាំបិតកាប់ទៅលើឪពុកម្ដាយក្មេក ប្រពន្ធនិងកូនទាំង២របស់ខ្លួន(កូនស្រីអាយុ៦ឆ្នាំនិងប្រុសអាយុ៤ឆ្នាំ)។
បើតាមគេហទំព័រហ្វេសបុករបស់ស្នងការដ្ឋាននគរបាលខេត្តកំពង់ចាម ជនសង្ស័យបានជួបគ្រោះថ្នាក់ចរាចរណ៍ដោយរថយន្តកិនបែកក្បាលស្លាប់ នៅតាមបណ្តាយផ្លូវលំមួយ ក្នុងភូមិវាលធំ ឃុំគគីធំ ស្រុកបារាយណ៍ ខេត្តកំពង់ធំ។
ស្នងការនគរបាលខេត្តកំពង់ចាម លោក បែន រ័ត្ន ប្រាប់វីអូឌី(VOD)ថាអេង ធី ត្រូវរថយន្តបុកនៅម៉ោងប្រមាណ៩និង១៥នាទីយប់ ថ្ងៃទី០១ខែធ្នូ ហើយម្ចាស់រថយន្តបើករត់ចេញពីកន្លែងកើតហេតុ។ លោកបន្តថា សមត្ថកិច្ចកំពុងតែសហការស្រាវជ្រាវតាមរករថយន្តនោះ។ លោកមានប្រសាសន៍ថា៖ “ព្រោះប្រជាពលរដ្ឋ យើងបានសួរទៅ គាត់ថាឡានទៅមកទៅមក មិនដឹងជាឡានណាជាឡានណី ហើយផ្លូវលំផង វាមិនមែន ជាផ្លូវកៅស៊ូ។ ខាងកំពង់ធំគេធ្វើព្រោះបុកនៅលើទឹកដីខេត្តកំពង់ធំ វាជាប់ព្រំដែនខេត្តកំពង់ចាមក៏ពិតមែន ក៏ប៉ុន្តែវាក្នុងទឹកដីខេត្តកំពង់ធំ យើងក៏សហការធ្វើដែរព្រោះតាមប្រមាញ់នេះគឺគេក៏សហការធ្វើដែរ”។
ស្នងការនគរបាលខេត្តកំពង់ធំ លោកជូ សំអាន ប្រាប់វីអូឌី(VOD)នៅព្រឹកថ្ងៃពុធនេះថាបើតាមការសន្និដ្ឋានគឺជនដៃដល់បានរត់ចូលឡាន។ លោកមានប្រសាសន៍ថា៖ “…ពេលដែលយើងទៅឃើញហ្នឹងគឺមនុស្សស្លាប់រួចទៅហើយ ហើយមើលទៅគឺមុខសញ្ញាដែលយើងតាមប្រផាប់ប្រភីងហ្នឹងហើយ ដោយសារកម្លាំងយើងរុករកពេញតែព្រៃទៅ ស្រាប់តែវាលេចចេញគ្រោះថ្នាក់ចរាចរណ៍ហ្នឹងហ្មងទៅ។ យើងសន្និដ្ឋាន អានេះគឺរត់ចូលឡាន”។
មេឃុំស្ពឺ លោក ម៉ែន ហ៊ុន មានប្រសាសន៍ថាលោកឭតៗគ្នាមកថាលោក អេង ធី រត់ចូលឡានដោយខ្លួនឯង។ លោកបន្តថាជនដៃដល់គឺជាមនុស្សដែលឧស្សាហ៍ប្រើប្រាស់អំពើហិង្សាលើគ្រួសាររហូតមានការប្តឹងទៅប៉ូលិសយកជនដៃដល់ទៅអប់រំ។ លោកបន្ថែមថាជនសង្ស័យក៏ជាមនុស្សដែលគ្រួសារឪពុកម្តាយក្មេកបានកាត់កាលចោល។ មេឃុំឲ្យដឹងថាឃាតកម្មនោះបានកើតឡើងនៅវេលាម៉ោង១១យប់ ហើយប្រជាជនរស់នៅក្បែរនោះបានដឹងនៅកន្លះម៉ោងក្រោយ។
បន្ទាប់ពីឃាតកម្មកើតឡើង ប្រធានក្រុមការងារគណបក្សសង្គ្រោះជាតិប្រចាំខេត្តកំពង់ចាម លោក ឡុង រី បានចេញសេចក្តីអំពាវនាវមួយ ដោយចូលរួមរំលែកទុក្ខនិងអំពាវនាវដល់ជនរួមជាតិទាំងក្នុងនិងក្រៅប្រទេសចូលរួមបរិច្ចាគថវិកា និងចូលបច័្ចយ ដើម្បីរៀបចំពិធីបុណ្យសពក្រុមគ្រួសារនិងសម្រាប់ជួយព្យាបាលរបួសជនរងគ្រោះ ឈ្មោះ ស្វាយ សាខន ដែលជាសមាជិកក្រុមប្រឹក្សាឃុំគណបក្សសង្គ្រោះជាតិផងដែរ។ គណបក្សបានចាត់ទុកករណីឃាតកម្មនេះប្រព្រឹត្តដោយកូនប្រសារបស់ជនរងគ្រោះដែលរងរបួសធ្ងន់៕
សរសេរមកកាន់លោក ហ៊ុន សិរីវឌ្ឍន៍ តាមរយៈhunsirivadh@gmail.com