ដោយ៖ បូ សាវី | ថ្ងៃព្រហស្បតិ៍ ទី3 ធ្នូ 2015
http://vodhotnews.com
ស្តាប់សំឡេង៖ |
ចម្លងទុក |
ប្រជានេសាទខ្មែរនៅខេត្ដសៀមរាបអះអាងថាក្រុមជនជាតិវៀតណាមមួយក្រុមបានប្រើឧបករណ៍នេសាទខុសច្បាប់នៅផ្ទៃបឹងទន្លេសាបដោយពួកគេចោទថាមន្ដ្រីជំនាញពាក់ព័ន្ធមិនចាត់វិធានការ។
ប្រជាសហគមន៍នេសាទនៅភូមិ២សង្កាត់ចុងឃ្នៀសលោក ព្រាប ស៊ីវ ប្រាប់VODនៅថ្ងៃនេះថាជនជាតិវៀតណាមបានប្រើឧបករណ៍ខុសច្បាប់ធ្វើនេសាទធ្វើឲ្យបាត់បង់ធនធានមច្ឆាជាតិនិងបំផ្លាញដល់ឧបករណ៍នេសាទខ្មែរជាលក្ខណៈគ្រួសារ។ លោកថាបទល្មើសទាំងនោះរួមមានការអូសយាំងកាវ រុញស៊ីប អូសដោយម៉ាស៊ីនធំៗជាដើម។ លោកបន្ដថាអ្នកប្រព្រឹតនោះឈ្មោះ ស៊ិន កៅ និង វង់ ចាន់ ដែលជាមេកញ្ច្រែងធំព្រមទាំងបក្សពួកជាច្រើនទៀតទាំងជនជាតិខ្មែរនិងវៀតណាម។ លោកបន្តថា៖ “គេធ្វើចាប់ពីអាមុខវាក្រឡា៤ហ៊ុនទៅបន្ទាប់មក៣ហ៊ុនទៅបន្ទាប់មក១ហ៊ុនកន្លះបន្ទាប់មក១ហ៊ុនគត់គូតវាហ្នឹងដែលសំរាប់ចាប់ត្រីនោះណាញឹកមែនទេសូមឲ្យលោកខេត្ដជួយទប់ស្កាត់បទល្មើសនេះផងព្រោះអានេះបំផ្លាញពួជត្រីបំផ្លាញបំផ្លាញប្រជាជនទៀតដែលរាយមងដែលធ្វើអាជីកម្មអត់កើតទេវាអូសបំផ្លាញអស់ម្នាក់ៗចង់ងាប់ហើយសូមបងជួយផងបង”។
ប្រជានេសាទមួយទៀតនៅសង្កាត់ចុងឃ្នៀសលោក ការ នួន ឲ្យដឹងថាពួកគាត់បានប្តូរទៅរាយមងនៅទឹកដីខេត្ដពោធិ៍សាត់ដោយសារនៅតំបន់ដែលពួកគេរស់នៅមានក្រុមជនល្មើសប្រើឧបករណ៍ខុសច្បាប់អូសបំផ្លាញឧបករណ៍នេសាទជាគ្រួសាររបស់ពួកគាត់។ លោកបញ្ជាក់ថាក្រុមអ្នកប្រើឧបករណ៍នេសាទខុសច្បាប់បានបើកទូកដេញបុកសម្លាប់ពួកគាត់ដោយសាររូបលោកនិងប្រជាសហគមន៍ផ្សេងទៀតចាប់ឧបករណ៍ល្មើសទាំងនោះផ្ដល់ឲ្យអាជ្ញាធរ។ លោកថាបទល្មើសដែលកើតឡើងនេះដោយសារមន្ដ្រីជំនាញយកលុយប្រចាំខែពីជនល្មើសនេសាទ។ លោកបន្តថា៖ “បាទមួយខែគេយកក្បាលទូកមួយពីរលានគេនិយាយប្រាប់ខ្ញុំ បើកាណូតធំគេយកមួយខែ១ពាន់ដុល្លារមានអីបងដល់ច្បាប់បើកចំហឲ្យរកចេះបទល្មើសកើនឡើងតាមអំពើចិត្ដដល់ពេលមើលយប់ម៉ិញមិនផែនការមិចមិនដឹងអ្នកណាចេញអីទេវាមានដង្កូវក្នុងសាច់សហការដល់មន្ដ្រីណាចង់ចេញចាប់ដែលអ្នកអត់ពុករលួយវាអត់ហ៊ានចេញមកទេ”។
VODមិនអាចទាក់នាយខណ្ឌរដ្ឋបាលជលផលខេត្ដសៀមរាបលោក ព្រិន សាវិន ដើម្បីអត្ថាធិប្បាយលើករណីនេះបានទេដោយទូរស័ព្ទចូលច្រើនដងគ្មានអ្នកទទួល។ អភិបាលខេត្ដលោក ឃឹម ប៊ុនសុង ប្រាប់ថាជាប់រវល់។
ករណីនេះអ្នកនេសាទម្នាក់ដែលរងការចោទថាប្រើឧបករណ៍នេសាទខុសច្បាប់លោក សិន កៅ បដិសេធ។ លោកថាការចោទប្រកាន់នេះគ្មានភស្ដុតាងនោះទេដោយលោកទម្លាក់ទៅលើពលរដ្ឋខ្មែរថាក៍នេសាទខុសច្បាប់ដែរ។ លោកបន្តថា៖ “អត់មានទេអត់មានបង់លុយបង់កាក់ដល់សមត្ថកិច្ចសេដ្ឋកិច្ចអីទាំងអស់វាចោទប្រកាន់វាអត់មានភស្ដុតាងមានភស្ដុតាងថាខ្ញុំនេះជាបទល្មើសនេសាទដឹងអ្ហាវាអត់មានម៉ាហ៊ីហ្នឹងវាប្ដឹងឡើងដោយសារខ្ញុំមេខ្លោងខ្ញុំចង់សួរវាមេខ្លោងខ្ញុំកន្លែងយកលុយយកកាក់ណារកចិញ្ចឹមប្រពន្ធកូនចិញ្ចឹមមិនរស់ផងយកលុយឲ្យអ្នកណាកើតពួកវាក៍លួចដែរដល់ពេលលួចទៅខុសៗលើពួកខ្ញុំដាច់មង់គេទៅខុសលើពួកខ្ញុំ”។
ទោះជាយ៉ាងណាប្រធានសម្ព័ន្ធប្រជានេសាទកម្ពុជាលោក ឡុង សុចែត មានប្រសាសន៍ថាបទល្មើសនេសាទនេះកើតឡើងគ្រប់រូបភាព ជាពិសេសអូសណ រ៉ាវ និងដាក់ឆ្នុក។ លោកបារម្ភថាត្រីប្រហុកនៅរដូវកាលខាងមុខនេះមិនសូវសំបូរដោយការប្រើនេសាទដោយឧបករណ៍ខុសច្បាប់នេះ។ លោកថាសហគមន៍របស់លោកពិបាកទប់ស្កាត់ដោយសារសមត្ថកិច្ចជំនាញមិនសហការ៕
សូមសរសេរមកកាន់លោក បូ សាវី តាមរយៈ savy@vodhotnews.com