ដោយ លោក ឃុត សុគន្ធ | ថ្ងៃព្រហស្បតិ៍ ទី១ ខែមីនា ឆ្នាំ២០១៨ | ម៉ោង 2:52 PM
http://vodhotnews.com
ក្រុមកម្មករធ្វើកូដកម្មទាមទារថៅកែរោងចក្រ ហ្វឺស ហ្គាវ័ន្ត បើកប្រាក់ឈ្នួល (ឃុត សុគន្ធ)
ក្រសួងប្រកាសចុះដោះស្រាយបញ្ចប់វិវាទការងារនៅរោងចក្រចំនួន ៩ ដែលថៅកែរត់ចោលដោយពុំបើកប្រាក់ឈ្នួល និងប្រាក់អត្ថប្រយោជន៍ផ្សេងៗជូនកម្មករ ក្រោយពីមានបញ្ជាពីលោកនាយករដ្ឋមន្ត្រី ហ៊ុន សែន។
ក្នុងខែកុម្ភៈកន្លងទៅនេះ លោកនាយករដ្ឋមន្រ្តី ហ៊ុន សែន បានបញ្ជាផ្ទាល់មាត់ទៅក្រសួងពាក់ព័ន្ធ ឲ្យចុះដោះស្រាយបញ្ហាក្រុមកម្មករជាបន្ទាន់ បន្ទាប់ពីថៅកែរោងចក្រកាត់ដេរនានាបានរត់ចោល ដោយលោកបានប្រកាសផ្តល់ថវិកាជាង ៤លានដុល្លាទៅកម្មករ ដើម្បីទូទាត់សំណង។
ក្នុងសេចក្តីជូនដំណឹងចុះថ្ងៃទី១មីនានេះ ក្រសួងការងារឲ្យដឹងថា ក្រសួងនឹងយកថវិកាបុរេប្រទានជាង ៤លាន ៥៧ម៉ឺនដុល្លារ ទៅដោះស្រាយសំណងជូនកម្មករបម្រើការងារនៅរោងចក្រចំនួន ៩ មានកម្មករសរុប ៤ ១៤៦នាក់ ដែលថៅកែបិទទ្វារោងចក្ររត់ចោល។
សេចក្តីជូនដំណឹងដដែល ក្រសួងការងារអះអាងថា ក្រសួងនឹងចាត់វិធានការដោះស្រាយបន្ទាន់រាល់ករណីរោងចក្រទាំងឡាយណាបិទទ្វាហើយថៅកែរត់ចោល ដោយផ្តល់ប្រាក់ឈ្នួល និងប្រាក់អត្ថប្រយោជន៍ផ្សេងៗ ជូនកម្មករឲ្យទាន់ពេលវេលាស្របច្បាប់ជាធរមាន និងព្រមានចាត់វិធានការផ្លូវច្បាប់ចំពោះម្ចាស់ក្រុមហ៊ុនរួមទាំងបុគ្គលណាដែលផ្តល់ប្រឹក្សាយោបល់ឲ្យថៅកែរត់ចោលដោយមិនទូទាត់សំណងជូនកម្មករ។
ទោះជាយ៉ាងណា ក្រសួងមិនបានបញ្ជាក់ពេលវេលាជាក់លាក់ក្នុងការចុះដោះស្រាយនោះទេ។
ប៉ុន្តែ អ្នកនាំពាក្យក្រសួងការងារ លោក ហេង សួរ បានប្រាប់វីអូឌីកាលពីថ្ងៃអង្គារកន្លងមកនេះថា ក្រសួងនឹងចុះទូទាត់សំណងដល់ក្រុមកម្មករដែលថៅកែរត់ចោលទាំងនោះ នៅសប្ដាហ៍ក្រោយនេះ។
ប្រធានសហភាពការងារកម្ពុជាលោក អាត់ ធន់ បានសាទរចំពោះយន្តការចុះដោះស្រាយនេះ ប៉ុន្តែ លោកថា ក្រសួងការងារគួរតែដោះស្រាយបញ្ហានេះឲ្យមានប្រសិទ្ធិតាំងពីដំបូង ដោយមិនចាំបាច់ទាល់តែមានការបញ្ជាពីលោកនាយករដ្ឋមន្រ្តីនោះទេ។
លោកបន្ថែមថា៖ «ខ្ញុំគិតថា វាជារឿងល្អដែលក្រសួងបានចាប់ផ្តើមធ្វើការងារលើរឿងនេះ ព្រោះកម្មករគាត់រង់ចាំយូរហើយ ដោយកម្មករមិនដឹងថា បានដំណោះស្រាយឲ្យពិតប្រាកដទេ ដល់ពេលចុះដោះស្រាយអញ្ចឹង វាជារឿងល្អហើយ ខ្ញុំគិតថា ប្រសិនការចុះដោះស្រាយបានកំណត់ពេលវេលាជាក់លាក់ទៀតវាកាន់តែល្អ ហើយមួយទៀតក្រសួងគួរតែមានគំនិតធ្វើមុន មិនមែនទាល់តែប្រមុខរដ្ឋាភិបាលស្រែកបានធ្វើនោះទេ»។
បើតាមសេចក្តីជូនដំណឹង ក្រសួងឲ្យដឹងថា រោងចក្រទាំង៩ដែលថៅកែរត់ចោលកម្មករនោះមាន មាននៅខេត្តកណ្តាលចំនួន ១ កំពង់ស្ពឺចំនួន ៣ និងរាជធានីភ្នំពេញ ៥រោងចក្រ។
ក្រសួងបញ្ជាក់ថា ក្រសួងនឹងរៀបចំបទប្បញ្ញត្តិតំណត់កាតព្វកិច្ចឲ្យបណ្តាក្រុមហ៊ុនត្រូវមានធានារាប់រងហានិភ័យប្រាក់ឈ្នួល និងប្រាក់អត្ថប្រយោជន៍ផ្សេងៗសម្រាប់កម្មករដោយបញ្ចូលទៅក្នុងបញ្ជីត្រួតពិនិត្យរបស់អធិការការងារដើម្បីធនាផលកម្មករ៕