រូបទីងមោងតំណាងឲ្យលោក ហ៊ុន សែន ត្រូវគេដុតក្នុងបាតុកម្មនៅអូស្ត្រាលី។ រូបថតហ្វេសប៊ុក
Thu, 1 March 2018
បែន សុខហ៊ាន and Erin Handley
ភ្នំពេញប៉ុស្តិ៍
ភ្នំពេញៈ លោកនាយករដ្ឋមន្ត្រី ហ៊ុន សែន បានចាត់ទុកការធ្វើបាតុកម្មនៅប្រទេសអូស្ត្រាលី ដោយមានដុតទីងមោង ដែលតំណាងឲ្យរូបរបស់លោកថា ដូចជា «ឆ្កែខាំជើង» ដែលមិនអាចទៅខាំឆ្កែវិញបានទេ ដែលការថ្លែងរបស់លោកបែបនេះគឺធ្វើឡើងបន្ទាប់ពីក្រសួងការបរទេសកម្ពុជាបានស្នើឲ្យប្រទេសអូស្ត្រាលីការពារ «ចំពោះកិត្តិយស និងភាពថ្លៃថ្នូរ» របស់លោក ខណៈដែលលោកនឹងទៅបំពេញទស្សនកិច្ចនៅប្រទេសមួយនេះនៅក្នុងខែនេះ។
ក្នុងពិធីជួបសំណេះសំណាលជាមួយកម្មករ កម្មការិនីរោងចក្រប្រមាណជាង ១៧ ៨០០ នាក់មកពីរោងចក្រ សហគ្រាសចំនួន ៨ នៅស្រុកសំរោងទង ខេត្តកំពង់ស្ពឺកាលពីម្សិលមិញ លោកនាយករដ្ឋមន្ត្រីបានថ្លែងដោយសំដៅទៅលើក្រុមបាតុករនៅប្រទេសអូស្ត្រាលី ដែលដុតបំផ្លាញរូបទីងមោងដែលតំណាងឲ្យរូបរបស់លោកថា បើឆ្កែខាំជើងហើយ ទៅខាំឆ្កែវិញក៏មិនកើតដែរ។
លោកបន្តថា៖ «អ្នកណាគេចង់ថាអី ក៏ថាទៅ ប៉ុន្មានថ្ងៃនេះសូមផ្ដាំទៅអ្នកដុតរូប ហ៊ុន សែន របៀបហ្នឹង ដុតអត់ត្រូវសោះ ដុតខុសហើយ។ បើចង់ដុតរូប ហ៊ុន សែន គឺដើម្បីឲ្យ ហ៊ុន សែន ស្លាប់ វិធីមានតែមួយទេ សូមប្រាប់ ដោយសារ ហ៊ុន សែន ឆ្នាំរោង គឺនាគ អ៊ីចឹងត្រូវដុតរូបនាគទាំងអស់តាមវត្តតាមអារាមដុតរូបនាគទាំងអស់អាហ្នឹងងាប់ ហ៊ុន សែន ហើយ…»។
ប៉ុន្តែលោកនាយករដ្ឋមន្ត្រីបានថ្លែងបែបចំអកថា៖ «ផ្ទុយទៅវិញប៉ុន្មានថ្ងៃនេះបែរជា ហ៊ុន សែន គឺថាមានពេលខ្លះចង់រងាជ្រុល ដល់ពេលគេដុត វារងា ព្រោះវាអត់ត្រូវ ប្រាប់យកតែបុណ្យទៅចុះ បើចង់ឲ្យ ហ៊ុន សែន ងាប់ ហើយគ្រាន់តែធ្វើរូបនាគដុតក៏វាអត់មានប្រសិទ្ធភាពទេ ព្រោះបារមីរបស់ ហ៊ុន សែន នៅជាប់នឹងនាគដែលនៅក្នុងវត្ត អ៊ីចឹងដើរដុតទៅ! ទីណាដែលមាននាគក្នុងវត្តទាំងប៉ុន្មាននៅអូស្ត្រាលី ឬនៅប្រទេសដទៃ ដើរដុតនាគ ឬក៏វ៉ៃកម្ទេចរូបនាគគ្រវាត់ចោលតែម្ដងទៅ។ អាហ្នឹងល្អ…ដុតទៅ ដុតឲ្យបានទៅ»។
លោកបានសង្កត់ធ្ងន់ថា៖ «ប៉ុន្តែណ្ហើយ ឆ្កែខាំជើងយើង យើងទៅខាំជើងឆ្កែ វាពិបាកដែរ ឆ្កែព្រុសយើង យើងព្រុសដាក់ឆ្កែ ក៏ពិបាកដែរ។ ប៉ុន្តែអ្វីដែលយើងផ្ដាំផ្ញើនៅទីនេះ គឺបញ្ហានៅត្រង់ថា បើសិនអត់មានសន្តិភាព អត់មានស្ថិរភាពនយោបាយហើយ ក្មួយៗមិនអាចមានការងារធ្វើបន្តទេ គេបិទរោងចក្រ គេរត់ចេញពីស្រុកខ្មែរ»។
ថ្មីៗនេះក្រសួងការបរទេសកម្ពុជាបានស្នើដល់ប្រទេសអូស្ត្រាលីឲ្យធានា «ចំពោះកិត្តិយស និងភាពថ្លៃថ្នូរ» របស់លោក ហ៊ុន សែន ក្នុងអំឡុងពេលលោកអញ្ជើញទៅបំពេញទស្សនកិច្ចនៅអូស្ត្រាលីនៅក្នុងខែនេះ បន្ទាប់ពីលោកនាយករដ្ឋមន្ត្រីបានគំរាមថា នឹងវាយអ្នកតវ៉ានៅលើទឹកដីអូស្ត្រាលី ប្រសិនបើពួកគេដុតរូបរបស់លោក។
អ្នកនាំពាក្យក្រសួងការបរទេសលោក ជុំ សុន្ទរី ដែលជាអតីតឯកអគ្គរដ្ឋទូតប្រចាំប្រទេសអូស្ត្រាលីថ្លែងថាសំណើនេះត្រូវបានធ្វើឡើង ដើម្បីឆ្លើយតបទៅនឹងពលរដ្ឋខ្មែរ-អូស្ត្រាលី ដែលបានប្រមូលផ្ដុំគ្នាដុតរូបទីងមោង ដែលមានបិទរូបលោកនាយករដ្ឋមន្ត្រី ហ៊ុន សែន កាលពីថ្ងៃសៅរ៍កន្លងទៅ។
លោក សុន្ទរី ថ្លែងនៅក្នុងសារមួយថា៖ «ការដុត [រូបទីងមោង] នេះវាបានធ្វើឲ្យប៉ះពាល់ដល់កិត្តិយស និងសេចក្តីថ្លៃថ្នូររបស់មនុស្សគ្រប់គ្នា»។ លោកបញ្ជាក់ថា៖ «ក្រសួងរបស់លោកកំពុងរៀបចំធ្វើការពិភាក្សាជាមួយអូស្ត្រាលីតាមផ្លូវការទូត ដើម្បីធានាឲ្យមានការគោរពចំពោះកិត្តិយស និងសេចក្តីថ្លៃថ្នូររបស់មេដឹកនាំកម្ពុជានៅមុនកិច្ចប្រជុំកំពូលពិសេស អាស៊ាន-អូស្ត្រាលី នៅខែក្រោយ»។
នៅពេលសួរថា តើប្រទេសកម្ពុជាមានបានស្នើសុំឱ្យមានការបន្ថែមសន្តិសុខដែរឬទេ? លោក សុន្ទរី បានបដិសេធឆ្លើយសំណួរនេះ។
ស្ថានទូតអូស្ត្រាលី និងក្រសួងការបរទេសអូស្ត្រាលីបានរក្សាភាពស្ងៀមស្ងាត់ ចំពោះវោហារស័ព្ទហិង្សារបស់លោកនាយករដ្ឋមន្ត្រី ហ៊ុន សែន នេះ បើទោះបីជាតំណាងរាស្ត្រគណបក្សប្រឆាំងនៅប្រទេសអូស្ត្រាលីកំពុងជំរុញឱ្យរដ្ឋាភិបាលឆ្លើយតបជាបន្ទាន់ក្តី។
លោក ហុង លឹម តំណាងរាស្ត្រនៅរដ្ឋវិចតូរៀរ ដើមកំណើតខ្មែរកាលពីថ្ងៃទី២៧ ខែកុម្ភៈបានសើចចំអកចំពោះសំណើរបស់ក្រសួងការបរទេសកម្ពុជានេះ ហើយលោកបានជំរុញឱ្យប៉ូលិសសហព័ន្ធអូស្ត្រាលីពិនិត្យមើលការគំរាមកំហែងរបស់លោក ហ៊ុន សែន។ លោក លីម បានចោទសួរថា៖ «គាត់ចង់បានកិត្តិយស និងការគោរព បន្ទាប់ពីសម្លាប់លោក កែម ឡី ឬ? [បន្ទាប់ពី] អំពើពុករលួយ និងភាពក្រីក្រដែលគាត់បានធ្វើលើប្រជាជនឬ?»៕ NS
Contact authors: បែន សុខហ៊ាន and Erin Handley