ដោយ លោក ឃុត សុគន្ធ | ថ្ងៃចន្ទ ទី៩ ខែមេសា ឆ្នាំ២០១៨ | ម៉ោង 5:53 PM
http://vodhotnews.com
ក្រុមកម្មកររោងចក្រមួយស្ថិតក្នុងខណ្ឌមានជ័យ រាជធានីភ្នំពេញ និងដែលថៅកែរត់ចោលនោះ បានអះអាងថា ក្រសួងការងារផ្តល់សំណងជូនពួកគេមិនស្របតាមប្រសាសន៍លោកនាយករដ្ឋមន្រ្តី និងខុសពីច្បាប់ការងារ។
លោកនាយករដ្ឋមន្ត្រី ហ៊ុន សែន កាលពីដើមខែមីនា បានប្រកាសផ្ដល់ថវិកា ៤លាន ៥៧ម៉ឺនដុល្លារ សម្រាប់ដោះស្រាយសំណងជូនក្រុមកម្មករ ៤ ១៤៦នាក់ ដែលបម្រើការងារនៅរោងចក្រចំនួន ៩ បន្ទាប់ពីថៅកែនៃរោងចក្រទាំងនោះ បានបិទទ្វារ និងរត់ចោលទាំងមិនបនទូទាត់ប្រាក់ឈ្នួល និងប្រាក់អត្ថប្រយោជន៍ផ្សេងៗជូនកម្មករនោះឡើយ។
កម្មករបម្រើការងារនៅរោងចក្រ Benoh Apparel ស្ថិតក្នុងសង្កាត់ស្ទឹងមានជ័យ អ្នកស្រី រឹម សៅលាភ ប្រាប់វីអូឌីនៅថ្ងៃនេះថា សំណងដែលក្រសួងការងារផ្តល់ជូនកម្មករនោះ មានជំនួនតិចតួចផ្ទុយពីច្បាប់ និងចំនួនប្រាក់ដែលពួកគាត់ត្រូវទទួលបាន។
អ្នកស្រីបន្ថែមថា៖ «រដ្ឋបាលគេរោងចក្រគេបិទប្រកាសឲ្យកម្មករទៅបើកលុយពីថ្ងៃទី៨ ដល់ទី១២ ដោយក្នុងម្នាក់ មានលុយ ៣០ដុល្លារ ៤០ដុល្លារ។ បើគិតតាមច្បាប់ត្រឹម ៣ចំណុចអី ពួកអាចបាន ៣ពាន់ដុល្លារអីដែរ ប៉ុន្តែ ពួកខ្ញុំមិនចង់បានអីដល់ថ្នាក់ហ្នឹងដែរ តែសុំឲ្យលើ ៣០ដុល្លារ ៤០ដុល្លារ ព្រោះតាមច្បាប់ការងារ បើធ្វើការលើសពី ២ឆ្នាំ គឺវេលាអត់កំណត់ តែនេះ ពួកខ្ញុំធ្វើរហូតដល់ ៩ឆ្នាំ»។
មន្រ្តីក្រសួងការងារ និងបណ្ដុះបណ្ដាលវិជ្ជាជីវៈ អ្នកស្រី អ៊ុយ ផល្លីការ មានប្រសាសន៍ថា ការផ្តល់សំណងជូនកម្មករនៅរោងចក្រ Benoh Apparel នោះស្របតាមច្បាប់ហើយ ដោយថា ករណីកម្មករទទួលបានសំណងតិចតួចនេះ គឺដោយសារក្រុមកម្មករអនុវត្តលក្ខខណ្ឌការងារក្នុងកិច្ចសន្យាខ្លីពី ៣ ទៅ ៦ខែ។
អ្នកស្រីបន្ថែមថា៖ «និយាយទៅ យើងអត់មានអីឆ្លើយតបជាមួយពួកគាត់ ក្រៅពីយើងបានគិតគូរជាមួយថវិកា ដែលពួកគាត់ទទួលបានហ្នឹងទេ។ ប្រសិនបើពួកគាត់មិនសុខចិត្តទេ ពួកគាត់ចង់តវ៉ាយ៉ាងម៉េចៗឲ្យគាត់ធ្វើតាមនីតិវិធីប្តឹងទៅក្រុមប្រឹក្សារអាជ្ញាកណ្តាលទៅ ព្រោះអីកម្មកររោងចក្រ Benoh នេះ គាត់ធ្វើការរយៈកាលកំណត់ដោយក្នុងកុងត្រាគាត់ពី ៣ ទៅ ៦ខែបញ្ចប់ហើយ»។
កម្មកររាប់រយនាក់បម្រើការងាររោងចក្រ Benoh Apparel បានផ្តុះការតវ៉ាម្តងទៀតតាំងពីម្សិលមិញរហូតមកដល់ថ្ងៃនេះ ក្រោយឃើញសេចក្តីប្រកាសរបស់ក្រសួងការងារឲ្យពួកគេបើកលុយដែលថៅកែជំពាក់មានចំនួនតិចតួចពេក។
ក្រុមកម្មករទាំងនោះ បានប្រមូលផ្ដុំគ្នានៅមុខស្ថានីយ៍ទូរទស្សន៍ហង្សមាស ដើម្បីឲ្យជួយផ្សាយការតវ៉ារបស់ពួកគេ ខណៈដែលក្រុមកម្មករទាំងនោះ បានទាមទារប្រាក់អត្ថប្រយោជន៍ ៥ចំណុច មានប្រាក់ជូនដំណឹងមុន ប្រាក់សំណងជំងឺចិត្ត ប្រាក់បណ្តេញចេញ និងប្រាក់អត្ថប្រយោជន៍ផ្សេងៗទៀត។
ក្រៅពីក្រុមកម្មករនៅរោងចក្រ Benoh ក្រុមកម្មករនៅរោងចក្រអ៊ីហ្វា ហ្គាមេន ក៏អះអាងថា ពួកគេទទួលបានប្រាក់សំណងមិនគ្រប់តាមច្បាប់ដែរ ប៉ុន្តែ ក្រុមកម្មករទាំងនោះ មិនតវ៉ានោះទេ ដោយថា ជិតចូលឆ្នាំមិនចង់ចំណាយពេលវេលាច្រើន។
មន្រ្តីក្រសួងការងារឲ្យដឹងថា ក្រសួងផ្តល់ប្រាក់អត្ថប្រយោជន៍ចំនួន ៣ចំណុចប៉ុណ្ណោះជូនកម្មករ មានប្រាក់ឈ្នួលដែលថៅកែជំពាក់ ប្រាក់បំណាច់ឆ្នាំ និងសំណងសម្រាប់ការបណ្តេញចេញ ដោយសារប្រាក់ដែលផ្តល់ឲ្យកម្មករនោះជាប្រាក់បុរេប្រទានរបស់រដ្ឋាភិបាល មិនមែនជាប្រាក់របស់ថៅកែនោះទេ៕