ដោយ សន ចាន់រដ្ឋា
2018-04-11
RFA
ស្ដាប់ ឬទាញយកសំឡេង
សកម្មភាពពលរដ្ឋមានជម្លោះដីធ្លីនៅក្នុងស្រុកស្នួល ខែត្រក្រចេះ តវ៉ាបិទផ្លូវជាតិលេខ៧៧អា នៅថ្ងៃទី៨ ខែមីនា ឆ្នាំ២០១៨។ Photo screenshot
ពលរដ្ឋរងគ្រោះដោយសារគ្រាប់កាំភ្លើងរបស់អាជ្ញាធរខេត្តក្រចេះ ៣គ្រួសារ ក្នុងករណីបង្ក្រាបដោយអំពើហិង្សាបាន ត្អូញត្អែរជីវភាពខ្វះខាត និងពុំមានប្រាក់សម្រាប់ព្យាបាលជំងឺ ហើយរហូតមកទល់ពេលនេះ ពួកគេធ្លាក់ខ្លួនពិការ។ អ្នកភូមិថា ជាង១ខែមកហើយ ដែលពលរដ្ឋត្រូវគ្រាប់កាំភ្លើងបានសម្រាកព្យាបាលជំងឺនៅមន្ទីរពេទ្យខេត្តក្រចេះ ពុំឃើញមានអាជ្ញាធរណា ចុះសួរសុខទុក្ខ និងផ្ដល់ជំនួយមនុស្សធម៌នៅឡើយទេ។
ពលរដ្ឋមានវិបត្តិដីធ្លីជាមួយក្រុមហ៊ុនសម្បទានសេដ្ឋកិច្ចចម្ការកៅស៊ូមេមត់ រស់នៅឃុំពីរធ្នូ ស្រុកស្នូល ឲ្យដឹងនៅថ្ងៃទី១១ មេសាថា អាជ្ញាធរខេត្កក្រចេះ មិនបានទទួលខុសត្រូវចំពោះការបាញ់រះមកលើពលរដ្ឋ បង្កឲ្យពួកគាត់ ៣នាក់ ពិការ និងគ្មានប្រាក់ព្យាបាលជំងឺ ដ្បិតប្រាក់ដែលក្រុមគ្រួសារគាត់ប្រមូលបានពីការលក់ទ្រព្យសម្បត្តិ និងខ្ចីបុលគេ បានបង់ថ្លៃព្យាបាលអស់ហើយ។
ចំណែកជនសង្ស័យជាយោធានៃរបបលោកនាយករដ្ឋមន្ត្រី ហ៊ុន សែន មិនត្រូវតុលាការចោទប្រកាន់ដើម្បីផ្ដន្ទាទោសនៅឡើយទេ។ ជនរងគ្រោះនៃការបង្ក្រាបហិង្សាបាន ថ្លែងសុំមិនបញ្ចេញឈ្មោះ រំឭកថា កាលពីដើមខែមីនា កន្លងទៅ ពលរដ្ឋជាង ២រយនាក់ បានតវ៉ាឲ្យអាជ្ញាធរបញ្ឈប់ដុតផ្ទះពួកគាត់ លោកប្រទះឃើញពលរដ្ឋ ៣ត្រូវគ្រាប់កាំភ្លើងចំភ្លៅ ម្នាក់ទៀតចំចង្កេះ និងម្នាក់ទៀតចំត្រគាក ត្រូវបញ្ជូនមកព្យាបាលនៅមន្ទីរពេទ្យ ហើយរហូតមកទល់ពេលនេះពួកគេកំពុងសម្រាកព្យាបាលនៅផ្ទះសាច់ញាតិនៅស្រុកកំណើត។
លោកថា ស្ថានភាពជនរងគ្រោះ នៅមិនទាន់អាចដើរបាននៅឡើយទេ។ «»
បុរសដដែលបន្ថែមថា អាជ្ញាធរខេត្តក្រចេះនៅតែដាក់កម្លាំងឃ្លាំមើល និងរឹតត្បិតមិនឲ្យពួកគាត់ចូលទៅទីតាំងដីមានជម្លោះនោះ ហើយពលរដ្ឋជាង ៤រយគ្រួសារ បានដាក់ញត្តិទៅថ្នាក់ជាតិ និងខុទ្ទកាល័យលោក ហ៊ុន សែន ដើម្បីស្នើឲ្យមានការដោះស្រាយវិវាទដីធ្លីនេះ និងផ្ដល់ដីសម្បទានសង្គមកិច្ច ក៏ប៉ុន្តែមិនទាន់ទទូលបានដំណោះស្រាយនៅឡើយ។
កាលពីថ្ងៃទី៨ មីនា ពលរដ្ឋជាង ២រយនាក់ បាននាំគ្នាតវ៉ាបិទផ្លូវជាតិលេខ៧៦ បំណងស្នើសុំឲ្យអាជ្ញាធរបញ្ឈប់ការឈូសឆាយផ្ទះសម្បែង និងផលដំណាំ តែត្រូវអាជ្ញាធរខែត្រក្រចេះ ភាគច្រើនជាយោធារាប់រយនាក់ ប្រដាប់អាវុធគ្រប់ដៃបានបាញ់រះមកលើពលរដ្ឋ។
មេឃុំពីរធ្នូ លោក ប៉ឹង វិន បញ្ជាក់យ៉ាងខ្លីថា លោកមិនបានដឹងរឿងទាក់ទងនឹងការជួយជនរងគ្រោះត្រូវគ្រាប់កាំភ្លើងនោះទេ ព្រោះពុំមានពលរដ្ឋណាផ្ដល់ព័ត៌មាន។ លោកថា កន្លងទៅអាជ្ញាធរស្រុកបានអនុញ្ញាតឲ្យពលរដ្ឋដែលខ្វះខាតធ្វើកសិកម្ម ត្រូវមកចុះឈ្មោះស្នើសុំដីសម្បទានសង្គមកិច្ច។ លោកថា កាលពីឆ្នាំ២០១៦ មានពលរដ្ឋជិត ២រយគ្រួសារ (១៧២) បានមកចុះឈ្មោះដាក់ពាក្យស្នើសុំដីសម្បទានសង្គមកិច្ច។ «»
មន្ត្រីជាន់ខ្ពស់សមាគមអាដហុក លោក ស៊ឹង សែនករុណា យល់ថា ពលរដ្ឋធ្លាក់ខ្លួនពិការដោយសារការបង្ក្រាបរបស់សមត្ថកិច្ច អាជ្ញាធរត្រូវតែទទួលខុសត្រូវ និងផ្ដល់សំណង ដល់ក្រុមគ្រួសារជនរងគ្រោះ។ លោកថា របបក្រុងភ្នំពេញមានកាតព្វកិច្ចទទួលខុសត្រូវ រាល់សិទ្ធិរស់រានមានជីវិតរបស់ពលរដ្ឋ និងស្វែងរកដំណោះស្រាយនានា ដែលពលរដ្ឋទាមទារ។ «»
ក្រុមហ៊ុនចំការកៅស៊ូមេមត់ ទទួលបានសិទ្ធិវិនិយោគពីរបប លោក ហ៊ុន សែន លើផ្ទៃដីជិត ១ម៉ឺនហិកតារ (៩.៨០០ហិកតារ) កាលពីឆ្នាំ២០១០ ឋិតនៅឃុំពីរធ្នូ ស្រុកស្នូល ខេត្តក្រចេះ។ ដីនៅតំបន់នោះភាគច្រើនជាតំបន់ព្រៃ ផ្នែកខ្លះបានឈូសឆាយ ហើយផ្នែកខ្លះទៀត ត្រូវបានពលរដ្ឋកាប់រានធ្វើចម្ការ។ ក្រុមហ៊ុននេះជារបស់ អ្នកស្រី សុខ លាប ក្មួយស្រីបង្កើតរបស់ អ្នកស្រី ប៊ុន រ៉ានី ហ៊ុន សែន។
មន្ត្រីសង្គមស៊ីវិលអង្កេតឃើញថា ដីដែលរបប លោក ហ៊ុន សែន វិនិយោគឲ្យក្រុមហ៊ុនដែលជាសាច់ញាតិ របស់ក្រុមគ្រួសារ លោក ហ៊ុន សែន នោះ គឺឋិតក្នុងដែនជម្រកសត្វព្រៃស្នូល ដែលត្រូវបានការពារដោយព្រះរាជក្រឹត្យ ក៏ប៉ុន្តែត្រូវបានរបបក្រុងភ្នំពេញរំលាយដែនជម្រកសត្វព្រៃនោះចោល កាលពីពេលថ្មីៗនេះ៕