ដោយ ហេង សកល
2018-04-11
RFA
ជនជាតិចិន ដែលសមត្ថកិច្ចនគរបាលខេត្តព្រះសីហនុ ឃាត់ខ្លួនសង្ស័យពីបទជំរិតទារប្រាក់តាមប្រព័ន្ធបច្ចេកវិទ្យាទំនើប នាកន្លែងស្នាក់នៅ ស្ថិតក្នុងសង្កាត់៣ ក្រុងព្រះសីហនុ កាលពីព្រឹកថ្ងៃទី៣១ ខែតុលា ឆ្នាំ២០១៥។ Photo: RFA
សមត្ថកិច្ចបានបញ្ជូនជនជាតិចិនចំនួន៨៩នាក់ ក្នុងនោះមានស្រី ១៥នាក់ ចេញពីកម្ពុជា កាលពីថ្ងៃល្ងាចថ្ងៃទី១១ មេសា នេះ ដោយសារតែពួកគេ ប្រព្រឹត្តបទល្មើស ហ្គេមអនឡាញ និងឆបោកតាមប្រព័ន្ធអ៊ីនធឺណិត។
វត្តមានដ៏ច្រើននៃជនជាតិចិនលើទឹកដីកម្ពុជា បានបង្កឱ្យមានការព្រួយបារម្ភកាន់តែខ្លាំងអំពីបញ្ហាសន្តិសុខ សុវត្ថិភាព និងសេដ្ឋកិច្ចនៅតាមខេត្តសំខាន់ៗមួយចំនួននៃប្រទេសកម្ពុជាដូចជា នៅខេត្តព្រះសីហនុ ខេត្តសៀមរាប និងរាជធានីភ្នំពេញជាដើម។ ជនជាតិចិនទាំងនោះ តែងប្រើអំពើហិង្សាកាប់ចាក់គ្នា និងការប្រមូលផ្គុំគ្នាប្រព្រឹត្តអំពើចាប់ជំរិតតាមប្រព័ន្ធអ៊ីនធឺណិត។
ឯកអគ្គរដ្ឋទូតចិនប្រចាំកម្ពុជា លោក ស្យុង បូ (Xiong Bo) កាលពីដើមខែកុម្ភៈកន្លងទៅនេះ បានអះអាងថា រដ្ឋាភិបាលចិនមិនគាំទ្រចំពោះសកម្មភាពល្មើសបែបនេះឡើយ ហើយចិនក៏ប្រឆាំងដាច់ខាតចំពោះជនជាតិចិនណាដែលជួលផ្ទះ ឬបើកគ្រឹះស្ថាននៅកម្ពុជា ដើម្បីប្រព្រឹត្តបទឧក្រិដ្ឋចាប់ជំរិតតាមប្រព័ន្ធអ៊ីនធឺណិតនេះដែរ៕