កងកម្លាំងនគរបាលខេត្តបន្ទាយមានជ័យដែលត្រូវបានបំពាក់ឧបករណ៍ កាលពីថ្ងៃទី ២៣ ។ រូប នគរបាល
Wed, 25 July 2018
ម៉ិច ដារ៉ា
ភ្នំពេញប៉ុស្តិ៍
បន្ទាយមានជ័យៈ ស្នងការដ្ឋាននគរបាលខេត្តបន្ទាយមានជ័យបានបំពាក់សម្ភារឧបករណ៍ប្រឆាំងបាតុកម្ម និងកូដកម្មដល់កងកម្លាំងនគរបាលខេត្តជាង ៧០០ នាក់ដើម្បីត្រៀមទប់ស្កាត់លើបាតុកម្ម និងកូដកម្មដែលនឹងកើតឡើងជាយថាហេតុ មុន និងក្រោយពេលបោះឆ្នោតជ្រើសតាំងតំណាងរាស្ត្រនៅចុងខែកក្កដានេះដែលអ្នកឃ្លាំមើលថា ជាការធ្វើឲ្យមានការព្រួយបារម្ភដល់ពលរដ្ឋ។
សម្ភារ និងឧបករណ៍ប្រឆាំង បាតុកម្ម និងកូដកម្មដែលបំពាក់ឲ្យកងកម្លាំង រួមមានដូចជា ខែល ដំបង គ្រាប់បែកផ្សែង និងកាំភ្លើងបាញ់គ្រាប់ផ្សែងបង្ហូរទឹកភ្នែក អាវុធធុនស្រាល។ ការបំពាក់នេះធ្វើឡើងកាលពីថ្ងៃទី ២៣ ខែកក្កដា ខណៈពេលមានការហ្វឹកហាត់ពីយុទ្ធសាស្ត្រទប់ស្កាត់លើបាតុកម្ម និងកូដកម្មត្រូវបានធ្វើឡើងស្ទើរតែទូទាំងប្រទេសដូចជា ក្រុងភ្នំពេញ ខេត្តកំពង់ចាម កំពង់ឆ្នាំងស្ទឹងត្រែង រតនគិរី បាត់ដំបង កណ្តាល ត្បូងឃ្មុំ កោះកុង ព្រៃវែង មណ្ឌលគិរី ឧត្តរមានជ័យ ស្វាយរៀង ពោធិ៍សាត់ កំពង់ធំ និងខេត្តបន្ទាយមានជ័យ ព្រមទាំងមានការចល័តកងទ័ពនាពេលថ្មីៗនេះទៀតផង។
លោក អាត់ ខែម ស្នងការនគរបាលខេត្តបន្ទាយមានជ័យមានប្រសាសន៍ថា ការបំពាក់សម្ភារឧបករណ៍ប្រឆាំងបាតុកម្ម និងកូដកម្មដល់កងកម្លាំងនគរបាលខេត្តជាង ៧៨៩ នាក់គឺជាការប្រុងប្រយ័ត្នខ្ពស់ដើម្បីការពារសន្តិសុខ មុនថ្ងៃបោះឆ្នោត ព្រោះមានក្រុមប្រឆាំងទាំងក្រៅស្រុក និងក្នុងស្រុកមួយចំនួនប៉ុនប៉ងបំផ្លាញការបោះឆ្នោត ហើយថាបំពាក់ឧបករណ៍ប្រឆាំងបាតុកម្ម និងកូដកម្មដល់កងកម្លាំងនគរបាលមិនបានធ្វើឲ្យប្រជាជនមានការព្រួយបារម្ភ និងភ័យខ្លាចនោះទេ។
លោកបញ្ជាក់ថា៖ «នេះគឺជាគោលដៅរបស់យើងក៏ដូចជារបស់ប្រមុខរដ្ឋាភិបាល និងរបស់ក្រសួងមហាផ្ទៃ និងអគ្គស្នងការនគរបាលជាតិ។ យើងធ្វើយ៉ាងណាឲ្យមានសន្តិសុខគ្រប់គ្រាន់សម្រាប់ការបោះឆ្នោត។ គេ (ក្រុមប្រឆាំង)មានឧបាយកលរបស់គេរឿងរបស់គេ ហើយគេនិយាយយ៉ាងម៉េចនិយាយទៅ តែតួនាទីភារកិច្ចរបស់ប៉ូលិសរក្សាសន្តិសុខ និងសណ្តាប់ធ្នាប់សង្គម»។
លោក អាត់ ខែម ក៏បានប្រាប់កាសែតក្នុងស្រុកថាពួកប្រឆាំងបានប្រើប្រាស់រូបភាពផ្សព្វផ្សាយព័ត៌មានបំភិតបំភ័យប្រជាពលរដ្ឋកុំឲ្យចេញទៅបោះឆ្នោត ញុះញង់បំផុសបំផុលឲ្យប្រជាពលរដ្ឋតវ៉ាបង្កចលាចលសង្គម និងប្រើប្រាស់រូបភាពការបំផ្ទុះគ្រាប់ដើម្បីឲ្យពលរដ្ឋភ័យខ្លាចជាដើម។
កាលពីព្រឹកថ្ងៃទី ២៣ ខែកក្កដានៅទីធ្លាមុខសាលប្រជុំធំនៃស្នងការដ្ឋាននគរបាលខេត្តកំពង់ចាមបានបើកការហ្វឹកហាត់របស់កងអន្តរាគមន៍ពិសេស ១២០ នាក់ និងកងអន្តរាគមន៍ជំនួយ ១២០ នាក់ផងដែរក្នុងនោះមានហ្វឹកហាត់បច្ចេកទេសប្រើប្រាស់អាវុធផ្សែង និងរបៀបគប់គ្រាប់បែកផ្សែង និងរូបភាពទប់ស្កាត់ហ្វូងបាតុកររបស់កងអនុសេនាតូច។
ប៉ុន្តែលោក សម គន្ធាមី នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជាបានអះអាងថា ការបំពាក់សម្ភារឧបករណ៍ប្រឆាំងបាតុកម្ម និងកូដកម្មដល់កងកម្លាំងនគរបាលខេត្តជាង ៧០០ នាក់ដើម្បីត្រៀមទប់ស្កាត់លើបាតុកម្ម កូដកម្ម និងហ្វឹកហាត់ក្បួនយុទ្ធសាស្ត្រទប់ស្កាត់លើបាតុកម្ម និងកូដកម្មធ្វើឲ្យអ្នកបោះឆ្នោតមានការភ័យខ្លាច និងព្រួយបារម្ភ។
លោកថា៖ «នេះគឺជាវិធានការគ្រោងទុករបស់រដ្ឋាភិបាល ខណៈពេលដែលគ្មាននរណាមានបំណងអាក្រក់ចង់បំផ្លាញដំណើរការបោះឆ្នោតទេ។ យើងមើលពុំឃើញសកម្មភាពណាដែលអាចអុកឡុកការបោះឆ្នោត។ វាបង្ហាញថាការបោះឆ្នោតនេះមិនសុវត្ថិភាព មានន័យថាយើងមិនទុកចិត្តស្ថានភាពបោះឆ្នោតដោយសារខ្លាចមានការតវ៉ា ឬអុកឡុក»។
កន្លងទៅលោក ជាម ច័ន្ទនី អតីតតំណាងរាស្ត្រនៃអតីតគណបក្សសង្គ្រោះជាតិ ធ្លាប់បានថ្លែងថាការហ្វឹកហាត់ក្បួនយុទ្ធសាស្ត្រទប់ស្កាត់លើបាតុកម្ម និង កូដកម្មដើម្បីទប់ទល់នឹងអ្វីដែលអាចកើតឡើងជាយថាហេតុគឺជាការបង្ហាញសាច់ដុំរបស់រដ្ឋាភិបាលថាខ្លួនមានអាវុធ និងកម្លាំងធ្វើការបង្ក្រាបអ្នកតវ៉ា ហើយការធ្វើបែបនេះគឺធ្វើឲ្យអ្នកបោះឆ្នោតមានការព្រួយបារម្ភកាន់តែខ្លាំងពីសុវត្ថិភាពពួកគេ៕
Contact author: ម៉ិច ដារ៉ា