លោក សុខ ឥសាន អ្នកនាំពាក្យគណបក្សប្រជាជនកម្ពុជា។ រូបថត ភ្នំពេញ ប៉ុស្តិ៍
Thu, 26 July 2018
ម៉ិច ដារ៉ា
ភ្នំពេញប៉ុស្តិ៍
ភ្នំពេញៈ មន្ត្រីជាន់ខ្ពស់នៃព្រះរាជាណាចក្រកម្ពុជាកាលពីម្សិលមិញបានបញ្ចេញប្រតិកម្មរិះគន់លើសារព្រមានរបស់ស្ថានទូតអាមេរិកប្រចាំនៅកម្ពុជាឲ្យពលរដ្ឋអាមេរិកាំងនៅកម្ពុជាមានការប្រុងប្រយ័ត្ននៅថ្ងៃបោះឆ្នោតជ្រើសតាំងតំណាងរាស្ត្រថ្ងៃទី ២៩ កក្កដា (ព្រោះ) អាចមានការបញ្ឆេះឲ្យមានការប្រមូលផ្ដុំខាងនយោបាយ បាតុកម្ម ឬការចល័តកម្លាំងសន្តិសុខ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានអះអាងថា សភាពការណ៍ពិតនៅកម្ពុជាប្រជាពលរដ្ឋខ្មែរកំពុងស្ថិតនៅក្រោមដំបូលសន្តិភាព និងស្ថិរភាពនយោបាយដោយគ្មាននរណាម្នាក់ភ័យព្រួយដូចសារព្រមានរបស់ស្ថានទូតអាមេរិកនោះទេ ប៉ុន្តែសារព្រមាននេះបានបង្ហាញឲ្យឃើញចរិតខាងនយោបាយដោយបានបំភិតបំភ័យជាប្រយោល និងបង្ហាញឲ្យឃើញថា ប្រទេសកម្ពុជាវាហាក់ដូចជាមានការព្រួយបារម្ភទៅលើសុវត្ថិភាព។
លោក សុខ ឥសាន ថ្លែងថា៖ «សេចក្តីប្រកាសព័ត៌មាននេះមិនបានឆ្លុះបញ្ចាំងពីសុវត្ថិភាពជាក់ស្តែងនៅក្នុងប្រទេសកម្ពុជានោះទេហើយចោទថា ការជូនដំណឹងរបស់ទូតអាមេរិកគឺធ្វើដោយមានហេតុផលនយោបាយដោយចង់បង្ហាញថា ការបោះឆ្នោតនៅកម្ពុជាពុំមានសុវត្ថិភាព»។
លោកថ្លែងបន្តថា៖ «វាគ្មានប្រសិទ្ធភាពទេបញ្ហាសំខាន់សភាពការណ៍ ជាក់ស្តែងហើយវាអត់ជាក់ស្តែងផងហើយគាត់និយាយផ្ទុយពីការពិតហើយគ្មានស្ថានទូតណាគេជឿទៅលើ (ការលើកឡើងរបស់គាត់) ទេ»។
សារព្រមានរបស់ស្ថានទូតអាមេរិកដល់ពលរដ្ឋអាមេរិកាំងនៅកម្ពុជាដែលបានដាក់នៅក្នុងគេហទំព័រស្ថានទូតកាលពីថ្ងៃទី ២៤ បានឲ្យដឹងថា ស្ថានទូតជំរុញឲ្យពលរដ្ឋអាមេរិកាំងគេចចេញពីក្រុមមនុស្សច្រើនហើយគេចខ្លួនចេញពីតំបន់នោះជាបន្ទាន់គេចចេញពីក្រុមបាតុកម្ម និងសកម្មភាពទាក់ទងនឹងការបោះឆ្នោតជាដើម។
សារដដែលនេះបានឲ្យដឹងថា៖ «ថ្វីបើការជួបជុំខាងនយោបាយនាពេលថ្មីៗនេះនៅកម្ពុជាមិនមានអំពើហិង្សា (ប៉ុន្តែ) បាតុកម្ម ឬការប្រមូលផ្ដុំអាចក្លាយទៅជាការប្រឈមដោយគ្មានការប្រាប់ឲ្យដឹងជាមុន»។
លោក Arend C. Zwartjes អ្នកនាំពាក្យស្ថានទូតអាមេរិកប្រចាំនៅកម្ពុជាសុំមិនធ្វើអត្ថាធិប្បាយទៅលើសារព្រមានរបស់ស្ថានទូតនោះទេកាលពីម្សិលមិញ។
លោក ផៃ ស៊ីផាន អ្នកនាំពាក្យនៃទីស្ដីការគណៈរដ្ឋមន្ត្រីបានថ្លែងឲ្យដឹងផងដែរកាលពីម្សិលមិញថា សារព្រមាននេះគឺជាវិធានការរបស់ការងារទូតក្នុងប្រទេសនីមួយៗដើម្បីបញ្ចៀសអ្វីដែលអាចនឹងកើតមានឡើងជាយថាហេតុហើយវាជារឿងធម្មតាដែលស្ថានទូតអាមេរិក អំពាវនាវឱ្យពលរដ្ឋគេមានការប្រុងប្រយ័ត្ន។
លោក ស៊ីផាន ថ្លែងថា៖ «នេះជាវិធានការរដ្ឋបាលនៃការងារទូតរបស់ស្ថានទូតអាមេរិកហើយតែងតែធ្វើជារៀងរាល់ពេល និងជាកិច្ចការពារនៃកិច្ចការរដ្ឋបាលរបស់ស្ថានទូត ប៉ុន្តែការពិតវាមិនដែលកើតមានអ្វីផងទេនៅស្រុកខ្មែរ»។
លោក ខៀវ សុភ័គ អ្នកនាំពាក្យក្រសួងមហាផ្ទៃកាលពីម្សិលមិញបានថ្លែងថានេះជាភារកិច្ចរបស់ស្ថានទូត តែបើស្ថានទូតមានព័ត៌មាន (ទាក់ទងរឿងអសន្តិសុខ) ជួយចែករំលែកមកអាជ្ញាធរកម្ពុជាផង។ លោក សុភ័គ ថ្លែងថា៖ «សមត្ថកិច្ចយើងរក្សាសុវត្ថិភាពជូនទាំងអស់ អាមេរិក ឬបារាំង»។
លោក សម គន្ធាមី នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជាបានឲ្យដឹងថា ការអំពាវនាវរបស់ស្ថានទូតអាមេរិកពុំមានហេតុផលនយោបាយនៅពីក្រោយនិងដោយសារតែគេព្រួយបារម្ភពីប្រជាជនរបស់គេទើបគេចេញសេចក្តីប្រកាសជូនដំណឹងឲ្យប្រជាជនខ្លួនមានការប្រុងប្រយ័ត្ន។ លោកថ្លែងថា៖ «វាជាការបង្ហាញថា ខ្លួនយកចិត្តទុកដាក់ទៅលើពលរដ្ឋរបស់ខ្លួន ហើយវាមិនមានហេតុផលនយោបាយនៅពីក្រោយទេ។ វាគ្រាន់តែការពារសុវតិ្ថភាពពលរដ្ឋខ្លួននៅក្នុងស្រុកខ្មែរ។ យើងគិតថា នឹងមិនមានអ្វីកើតឡើងក្នុងការបោះឆ្នោតខាងមុខនេះទេ»។
លោក គៀត ច័ន្ទថារិទ្ធ អ្នកនាំពាក្យនគរបាលជាតិធ្លាប់ថ្លែងឲ្យដឹងថា កម្លាំងសមត្ថកិច្ចចម្រុះប្រមាណ ៦ ម៉ឺននាក់នឹងត្រូវដាក់ពង្រាយ ដើម្បីការពារសន្ដិសុខ សណ្ដាប់ធ្នាប់សាធារណៈសម្រាប់ការបោះឆ្នោតជ្រើសតាំងតំណាងរាស្ដ្រនៅថ្ងៃទី ២៩ ខែកក្កដាក្នុងនោះមានទាំងកម្លាំងនគរបាលជាតិ កម្លាំងកងយោធពលខេមរភូមិន្ទ និងកម្លាំងកងរាជអាវុធហត្ថរួមទាំងកម្លាំងប្រជាការពារថែមទៀត៕
Contact author: ម៉ិច ដារ៉ា