ការធ្វើយុទ្ធនាការម្រាមដៃស្អាត គឺមិនទៅបោះឆ្នោតថ្ងៃទី២៩កក្កដា
@FB
គណៈកម្មាធិការជាតិរៀបចំការបោះឆ្នោត (គ.ជ.ប) នៅរសៀលថ្ងៃព្រហស្បតិ៍នេះ បានសម្រេចផាកពិន័យជាទឹកប្រាក់ដល់សមាជិកអតីតគណបក្សសង្គ្រោះជាតិ ខេត្តបាត់ដំបង ចំនួន៥នាក់ ក្នុងម្នាក់ៗចំនួន១០លានរៀល។ ការសម្រេចផាកពិន័យរបស់ គ.ជ.ប នៅពេលនេះ ធ្វើឡើង បន្ទាប់ពីគណបក្សប្រជាជនកម្ពុជាប្រចាំខេត្តបាត់ដំបងប្តឹងមក គ.ជ.ប ពាក់ព័ន្ធនឹងករណីយុទ្ធនាការម្រាមដៃស្អាត។
នៅក្នុងសម្រង់សេចក្តីសម្រេចទំរង់១២០៣របស់ខ្លួន ដែលមានដាក់ឈ្មោះដើមបណ្តឹងដែលជាតំណាងគណបក្សប្រជាជនខេត្តបាត់ដំបងផងនោះ គណៈកម្មាធិការជាតិរៀបចំការបោះឆ្នោត បានសម្រេចថាធ្វើការផាកពិន័យជាប្រាក់ចំនួន១០លានរៀល ក្នុងម្នាក់ៗ ដោយពុំទាន់គិតដល់ទោសព្រហ្មទណ្ឌផ្សេងទៀត ចំពោះឈ្មោះ ជា ជីវ ថោង សារឿន ម៉ាង ឈុន ពៅ តាំង និងគ្រុយ គឹមសាំង ដែលអ្នកទាំង៥សុទ្ធសឹងជាសមាជិករបស់អតីតគណបក្សសង្គ្រោះជាតិ នៅខេត្តបាត់ដំបងទាំងអស់។
លើសពីនេះ សេចក្តីសម្រេចចំនួន៤ចំណុចរបស់ គ.ជ.ប ចំណុចទី៤បញ្ជាក់ថាសេចក្តីសម្រេចនេះ ធ្វើនៅខេត្តបាត់ដំបងនៅថ្ងៃទី២៦កក្កដានេះ ក្នុងកិច្ចប្រជុំពេញអង្គនៃក្រុមប្រឹក្សាជំនុំជម្រះ នៃគណៈកម្មការខេត្តរៀបចំការបោះឆ្នោតខេត្តបាត់ដំបង ដោយបើកផ្លូវតវ៉ាតាមកំណត់ច្បាប់។
សូមរំលឹកថា សមាជិកអតីតគណបក្សសង្គ្រោះជាតិទាំង០៥រូប ត្រូវបានប្តឹងដោយសមាជិកគណបក្សប្រជាជនខេត្តបាត់ដំបង កាលពីថ្ងៃទី២៤ខែកក្កដា ទៅ គ.ជ.ប បន្ទាប់ពីអ្នកទាំង៥នេះ មានការជួបជុំមួយនៅផ្ទះលោក ជា ជីវ នៅភូមិជំនីក ឃុំអន្លង់វិល ស្រុកសង្កែ កាលពីថ្ងៃទី១៩កក្កដា ដើម្បីបង្ហាញពីការអនុវត្តយុទ្ធនាការម្រាមដៃស្អាត។ ក្នុងចំណោមមនុស្ស៥នាក់ ដែលរងបណ្តឹងនោះ មានម្នាក់ត្រូវគ.ជ.ប បញ្ជូនសំណុំរឿងទៅតុលាការ ដោយហេតុថាបុគ្គលម្នាក់នោះ បានស្ថិតនៅក្នុងបញ្ជីមនុស្ស១១៨នាក់ ដែលតុលាការកំពូលកាត់សិទ្ធិធ្វើនយោបាយរយៈពេល៥ឆ្នាំ។
សូមបញ្ជាក់ថា យុទ្ធនាការម្រាមដៃស្អាត ត្រូវបានធ្វើឡើង ដើម្បីប្រឆាំងទៅនឹងការបោះឆ្នោត ជ្រើសតាំងតំណាងរាស្ត្រនីតិកាលទី៦ ដែលនឹងមកដល់នៅថ្ងៃទី២៩ខែកក្កដា ខាងមុខ។ ជាការបោះឆ្នោត ដែលគេមើលឃើញថា មានការប្រទាញប្រទង់គ្នា រវាងគណបក្សកាន់អំណាច និងអតីតគណបក្សសង្គ្រោះជាតិ ដែលមានការគាំទ្រដោយប្រទេសលោកខាងលិច និងអង្គការអន្តរជាតិមួយចំនួន ខណៈអតីតបក្សប្រឆាំងដ៏ធំនេះ ត្រូវបានតុលាការកំពូលរំលាយ កាលពីឆ្នាំ២០១៧ និងដកហូតសិទ្ធិធ្វើនយោបាយសមាជិកសំខាន់ៗរបស់គណបក្សនេះចំនួន១១៨រូប៕