បរិស្ថាន
កញ្ញា ខាន់ លក្ខិណា |  ០៨ មករា ២០១៩ | ម៉ោង ៣:០០ ល្ងាច
https://www.vodhotnews.com

បណ្ដាញសហគមន៍ព្រៃឡង់មកពីខេត្តចំនួន៤ អះអាងថា ការកាប់បំផ្លាញព្រៃឈើនៅក្នុងតំបន់ព្រៃឡង់កំពុងកើតឡើងយ៉ាងគគ្រឹកគគ្រេង ដោយគ្មានអាជ្ញាធរណាធ្វើការទប់ស្កាត់នោះឡើយ ខណៈរយៈពេល១ ឆ្នាំកន្លង​មកនេះពួកគេចាប់បានអ្នកប្រព្រឹត្តបទល្មើសចំនួន៧៣ នាក់។

កាលចុះល្បាតរបស់ក្រុមការពារព្រៃឡង់ខេត្តកំពង់ធំនៅថ្ងៃ ទី ១៣ -១៥ ខែតុលា ឆ្នាំ២០១៨។ (រូបភាព៖ ផ្ដល់ដោយ ប្រភពបណ្តាញការពារព្រៃឡង់ខេត្តកំពង់ធំ)

តំណាងបណ្ដាញសហគមន៍ព្រៃឡង់ខេត្តក្រចេះ លោក ឯក សុវណ្ណ ប្រាប់ វី.អូ.ឌី នាថ្ងៃនេះថា ក្នុង​ឆ្នាំ២០១៨ សហគមន៍ ចាប់​អ្នកដែលចូលកាប់ឈើក្នុងតំបន់ព្រៃឡង់​បានចំនួន ៧៣ នាក់ និងសម្ភារមួយចំនួនដូចជា រណារ គោយន្ត កាំភ្លើង​ឆ្នៃ អន្ទាក់ដាក់សត្វ ជាដើម។ លោក បន្តថា ប្រជាពលរដ្ឋដែលស៊ីឈ្នួលកាប់ឈើ ឈ្មូញកណ្ដាល និង ក្រុមហ៊ុនកំពុងកាប់និងដឹកជញ្ជូនឈើយ៉ាងគគ្រឹកគគ្រេងនៅក្នុងតំបន់ព្រៃឡង់ ដោយអាជ្ញាធរមិនបានធ្វើការទប់ស្កាត់ចំពោះសកម្មភាពទាំងអស់នោះឡើយ។

រូបភាពកំណាត់ឈើ ពេលដែលចុះល្បាតរបស់ក្រុមការពារព្រៃឡង់ខេត្តកំពង់ធំនៅថ្ងៃ ទី ១៣ -១៥ ខែតុលា ឆ្នាំ២០១៨។ (រូបភាព៖ ផ្ដល់ដោយ ប្រភពបណ្តាញការពារព្រៃឡង់ខេត្តកំពង់ធំ)

លោកថា៖ «នៅខាងខេត្តក្រចេះ គឺការកាប់បំផ្លាញខ្លាំងមែនទែន ដោយសារ បណ្ដាញរាយការណ៍ស្ទើរតែគ្រប់កន្លែង សំឡេង ម៉ាស៊ីន។ និយាយរួមទៅ ទាំងឈ្មួញដែលមានលុយមានអំណាចក៏កាប់ដែរ។ បើតាមរាយការណ៍បណ្ដាញយើងថា រាល់ពេលយប់គឺមានការដឹកចេញយ៉ាងគគ្រឹកគគ្រេងតែមែនទែន ភាគច្រើនគឺពេលយប់ ហើយដឹកចេញគឺកាត់ប៉ុស្តិ៍មន្ត្រីបរិស្ថាន ហើយមិនដឹងថាម៉េចទេ មានការយកលុយយកកាក់អីមិនដឹងទេ ដោយសារ ដឹកហើយមិនមានការបង្រ្កាបមានអី។ មួយវិញទៀត សកម្មភាពក្រុមហ៊ុនកំពុងយាយីដល់ច្បោះជ័ររបស់ប្រជាពលរដ្ឋ ហើយធ្វើការកាប់បំផ្លាញដើរច្បោះជ័ររបស់ប្រជាពលរដ្ឋជារៀងរាល់ថ្ងៃ»។

តំណាងបណ្ដាញសហគមន៍ព្រៃឡង់មកពីខេត្តព្រះវិហារ លោក ស្រី ថី លើកឡើងថា កន្លងមក ពួកគាត់​បាននាំគ្នារាយការណ៍ទៅអាជ្ញាធរមូលដ្ឋាន និងមន្ត្រីបរិស្ថាន ដើម្បីធ្វើការទប់ស្កាត់សកម្មភាពកាប់ និងដឹកឈើក្នុងតំបន់ព្រៃឡង់ ប៉ុន្តែអាជ្ញាធរមិនបានទប់ស្កាត់នោះឡើយ ដោយថា ជាឈើរបស់មេ។ លោកបន្តថា ប្រសិនបើក្រសួងបរិស្ថានមិនមានវិធានការចុះបង្កា្រប និងទប់ស្កាត់សកម្មភាពការកាប់ និងដឹកញ្ជូនឈើនៅក្នុងតំបន់ព្រៃឡង់នោះទេ លោកថា ព្រៃឈើនៅក្នុងតំបន់អភិរក្សនេះ នឹងត្រូវវិនាសអស់ក្នុងរយៈពេល៣ ឆ្នាំខាងមុខនេះ។

លោកថា៖ «កើនឡើង បើគេកាប់ដឹកជញ្ជូនទាំងយប់ទាំងថ្ងៃអញ្ចឹង ឃើញថាសស្រាក់ស្រាំពេក ហើយមិនថាឈើច្បោះ មិនថាឈើព្រៃផ្សេងៗទេកាប់ដូចតែគ្នា ស្រឡៅអីហ្នឹង។ អាជ្ញាធរដែលគាត់ធ្វើសកម្មភាពកន្លងមក ការដោះស្រាយរបស់គាត់មិនជាមានប្រសិទ្ធភាពទេ​ ដោយសារ តែគាត់ដាក់តែហោ​ប៉ៅ​គាត់ច្រើនជាង។​ ខ្ញុំបានជួបបទល្មើសដែលខ្ញុំចាប់ប៉ុន្មានដង សួរទៅថា ប្អូនឯងកាប់ ដឹកអត់ខ្លាចបរិស្ថានទេឬ? គាត់ថាខ្លាចអីបរិស្ថាន បើខ្ញុំឲ្យលុយគាត់ប្រចាំ មួយជើងឲ្យ ៥ម៉ឺនរៀល មួយគោយន្ត៥ ម៉ឺនរៀលដឹកហ្នឹង»។

អ្នកនាំពាក្យក្រសួងបរិស្ថាន លោក នេត ភ័ក្រ្តា ច្រានចោលការលើកឡើងរបស់ក្រុមបណ្ដាញសហគមន៍។ លោកថា ការកាប់បំផ្លាញព្រៃឈើក្នុងរយៈពេលប៉ុន្មានឆ្នាំចុងក្រោយនេះ មានការថយចុះ ប៉ុន្តែ លោកស្នើឲ្យក្រុមបណ្ដាញសហគមន៍ដាក់របាយការណ៍មកកាន់ក្រសួង ប្រសិនបើរកឃើញថា ការកាប់បំផ្លាញព្រៃឈើនៅក្នុងតំបន់ព្រៃឡង់កើនឡើងនោះ។​

លោកថា៖ «យើងលើកទឹកចិត្តឲ្យបងប្អូនប្រជាពលរដ្ឋ បើសិនឃើញមានបទល្មើស បើសិនឃើញមានការកាប់រុករានទន្ទ្រានយកដីធ្លីខុសច្បាប់ គឺសូមជូនព័ត៌មានមកឲ្យខាងសមត្ថកិច្ច ម​ន្ទីរបរិស្ថានខេត្ត។ ហើយបើចាំបាច់សូមទាក់ទងមកកាន់ក្រសួងបរិស្ថាន ដើម្បីយកងាយស្រួលក្នុងការដោះស្រាយ ជាជាងបង្ហើរសំឡេងតាមប្រព័ន្ធផ្សព្វផ្សាយ ដែលយើងមិនអាចធ្វើការងារនេះមានប្រសិទ្ធភាពនោះទេ​ ដោយសារ ការផ្សព្វផ្សាយជួនកាលវាធ្វើឲ្យប៉ះពាល់ទៅដល់ដំណើរ​ការស៊ើបអង្កេត។ អញ្ចឹង សូមឲ្យបងប្អូនរក្សាការសម្ងាត់មួយចំនួនហើយបញ្ជូនរបាយការណ៍មកក្រសួង»។

រាជរដ្ឋាភិបាល ​បានចេញអនុក្រឹត្យ​កាល​ពី​ថ្ងៃ​ទី​៩ ខែ​ឧសភា ឆ្នាំ​២០១៦ បង្កើត​តំបន់​ព្រៃឡង់ ជា​តំបន់​ដែន​ជម្រក​សត្វព្រៃ មាន​ផ្ទៃដី​ជាង ៤៣​ម៉ឺន​ហិកតា (៤៣១,៦៨៣) គ្របដណ្ដប់​លើ​ខេត្ត​ចំនួន ៤ រួម​មាន​ខេត្ត​ព្រះវិហារ ខេត្ត​កំពង់ធំ ក្រចេះ និង​ខេត្ត​ស្ទឹងត្រែង។ តាមអនុក្រឹត្យដដែល តំបន់នេះស្ថិតក្រោម​ការ​គ្រប់គ្រងផ្ទាល់​របស់​ក្រសួង​បរិស្ថាន ដោយមានការ​​សហការជាមួយអាជ្ញាធរពាក់ព័ន្ធផ្សេងទៀត៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។