ការងារ
លោក ញឹម សុខន | ០៩ មករា ២០១៩ | ម៉ោង ២:៣៨ ល្ងាច
https://www.vodhotnews.com
លោកនាយករដ្ឋមន្ត្រី ហ៊ុន សែន បានអំពាវនាវឲ្យបញ្ឈប់ជាបន្ទាន់ ការទាមទារឲ្យថៅកែបើកផ្តាច់ប្រាក់អត្ថប្រយោជន៍សម្រាប់ឆ្នាំចាស់ដោយថា ការទាមទារនេះនឹងជំរុញឲ្យរោងចក្រប្រមាណជា៨០០ ត្រូវបង្ខំចិត្តបិទទ្វារឈប់ដំណើរការ។
ប៉ុន្មានសប្តាហ៍មកនេះ កម្មកររោងចក្រកាត់ដេរ នៅរាជធានីភ្នំពេញ និងខេត្តតាកែវបានផ្ទុះការតវ៉ាជាបន្តបន្ទាប់ ទាមទារទៅថៅកែរបស់ខ្លួន ឲ្យទូទាត់ប្រាក់ទាំងអស់សម្រាប់ឆ្នាំចាស់ជូនពួកគេ ទាំងប្រាក់អតីតភាពការងារ និងអត្ថប្រយោជន៍ផ្សេងៗ ដោយថា ពួគេបារម្ភខ្លាចថៅកែគេចវេសមិនទូទាត់ឲ្យពេលអនុវត្តចាប់ថ្មី ចាប់ពីឆ្នាំ២០១៩នេះទៅ។
ក្នុងពិធីជួបកម្មករនៅខេត្តតាកែវ នាថ្ងៃនេះ លោក ហ៊ុន សែន បានអំពាវនាវឲ្យសហជីពទាំងអស់ បញ្ឈប់ការដឹកនាំតវ៉ានេះជាបន្ទាន់ ដោយថា សកម្មភាពនេះកំពុងបំផ្លាញការងារខ្លួនឯង ព្រោះថា វាបានជំរុញឲ្យរោងចក្រយ៉ាងតិច ៨០០ ត្រូវបង្ខំចិត្តិបិទទ្វារ ឈប់ដំណើរការ ក្នុងចំណោមរោងចក្រ ១១៥៩ នៅទូទាំងប្រទេស ។
លោកថា៖ «យើងជាអ្នកបំផ្លាញការងារដោយខ្លួនឯង ដែលមិនគូរឲ្យមានទេៗ។ រឿងនេះ វានឹងរីករាលដាលហើយៗ បើធ្វើទៅលើរោងចក្រមួយ រោងចក្រដទៃនឹងធ្វើទាំងអស់ៗ។ នេះជាការពន្យល់ហេតុផលដែលមុននេះ ទាល់តែគេបញ្ឈប់យើងទើបគេបើប្រាក់អត្ថប្រយោជន៍។ ប៉ុន្តែឥឡូវនេះ ច្បាប់បានកែសម្រួលហើយ៦ខែម្តងបានបើក គេហៅថាដោះស្រាយម្តងតាមដំណាក់ៗ របស់វា»។
នាយកប្រតិបត្តិមជ្ឈមណ្ឌសម្ព័ន្ធភាពការងារ និងសិទ្ធិមនុស្ស លោក មឿន តុលា ពន្យល់ថា ប្រាក់អតីតភាពការងារថៅកែ ត្រូវទូទាត់ឲ្យកម្មករ និយោជិត រៀងរាល់១ខែម្តង តែប្រាក់អត្ថប្រយោជន៍ផ្សេងៗ ថៅកែអាចទូទាត់នៅពេលផ្តាច់កិច្ចសន្យាការងារជាមួយកម្មករនិយោជិត។
មន្ត្រីសិទ្ធិការងាររូបនេះអះអាងថា មូលហេតុដែលកម្មករផ្ទុះការតវ៉ាទាមទារកន្លងមកនេះ អាចមកពីប្រព័ន្ធច្បាប់មិនបានការពារប្រយោជន៍ជូនពួកគេ។
លោកថា៖ «យើងឃើញកន្លងមក រោងចក្រខ្លះគ្រាន់តែដូរឈ្មោះ ឬក៏បិទឬក៏ដូរទីតាំងអីអញ្ចឹងទៅ អត់ទូទាត់សំណងឲ្យកម្មករទេ ជួនកាលគាត់ត្រូវបាន៥០០ដុល្លារអីអញ្ចឹង ឲ្យគ្នាតែ១០០ដុល្លារ ឬ២០ដុល្លារ អីអញ្ចឹងទៅ។ ត្រង់ហ្នឹងហើយដែលកម្មករចេះបារម្ភខ្លាច។ រឿងការធានានូវសុវត្ថិភាពការងារជារឿងចំណាស់»។
បើតាមលោក មឿន តុលា ដើម្បីកាត់បន្ថយការតវ៉ា រដ្ឋាភិបាលត្រូវពង្រឹងការអនុវត្តច្បាប់ឲ្យមានប្រសិទ្ធិភាព ការពារទាំងប្រយោជន៍កម្មករ ទាំងថៅកែរោងចក្រ។
ទោះជាយ៉ាងណាលោក ហ៊ុន សែន ក្នុងពិធីនេះដែរបានអះអាងថារដ្ឋាភិបាលចំណាយប្រាក់ជាង២២លានដុល្លាររួចហើយសម្រាប់ទូទាត់អន្ថប្រយោជន៍ជូនកម្មករនៅពេលដែលថៅកែរោងចក្ររត់ចោលកន្លង ហើយថារដ្ឋាភិបាលនឹងបន្តដោះស្រាយបញ្ហានេះបន្តទៀតបើមានបញ្ហានេះកើតឡើង។
តាមរបាយការណ៍ក្រសួងការងារនិងបណ្តុះបណ្តាលវិជ្ជាជីវៈ គិតត្រឹមខែមីនា ឆ្នាំ២០១៨ មានរោងចក្រចំនួន៩ បានបិទទ្វារ មិនបានបើកប្រាក់ខែជូនកម្មករ ក្នុងនោះមាន រោងចក្រនៅខេត្តកណ្តាល១ នៅខេត្តកំពុងស្ពឺ៣ និងនៅរាជធានីភ្នំពេញ៥។
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។