ដោយ អាស៊ីសេរី
2019-03-01
ស្ដាប់ ឬទាញយកសំឡេង
លោក ហ៊ុន សែន ក្នុងពិធីបើកការដ្ឋានសាងសង់មន្ទីរពេទ្យ “មិត្តភាពកម្ពុជា-ចិន” នៅខេត្តត្បូងឃ្មុំ ថ្ងៃទី១ ខែមីនា ឆ្នាំ២០១៩។ រូបថត៖ ហ្វេសប៊ុក Samdech Hun Sen, Cambodian Prime Minister
លោក ហ៊ុន សែន ថាកម្ពុជាមិនអនុញ្ញាតអោយចិនត្រួតត្រា
មេដឹកនាំរបបក្រុងភ្នំពេញ លោក ហ៊ុន សែន ប្រកាសថា លោកនឹងមិនយល់ព្រមឱ្យប្រទេសចិនត្រួតត្រាកម្ពុជានោះឡើយ ហើយលោកជឿជាក់ថា មហាអំណាចចិនក៏គ្មានបំណងត្រួតត្រាកម្ពុជានោះដែរ។ លោកអះអាងថា លោកស្គាល់នយោបាយរបស់ចិនច្បាស់ថា ប្រទេសមហាអំណាចមួយនេះមិនចង់ត្រួតត្រាប្រទេសណាមួយនោះឡើយ។
លោក ហ៊ុន សែន ថ្លែងបែបនេះនៅក្នុងពិធីបើកការដ្ឋានសាងសង់មន្ទីរពេទ្យ “មិត្តភាពកម្ពុជា–ចិន” នៅខេត្តត្បូងឃ្មុំ នៅថ្ងៃទី១ មីនា។ លោកបន្តថា ទំនាក់ទំនងកម្ពុជាចិន គឺជាទំនាក់ទំនងក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ និងបាននាំមកនូវការរីកចម្រើនផ្នែកហេដ្ឋារចនាសម្ពន្ធ និងការអភិវឌ្ឍនៅកម្ពុជា។
ប្រទេសចិនកុម្មុយនិស្ត គឺជាប្រទេសនាំមុខគេក្នុងការវិនិយោគនៅកម្ពុជា ដោយនៅឆ្នាំ ២០១៨ កន្លងទៅ ទំហំទុនវិនិយោគសរុបរបស់ចិនមានប្រមាណ ៣ពាន់ ៦រយលានដុល្លារ ឬស្មើនឹង ៥៣ភាគរយ នៃទំហំវិនិយោគសរុប ៦ពាន់ ៨រយលានដុល្លារ។ ក៏ប៉ុន្តែ ស្របពេលដែលទំហំពាណិជ្ជកម្ម និងការវិនិយោគរបស់ចិនមានចំនួនកាន់តែច្រើននោះ បំណុលដែលកម្ពុជាជំពាក់ចិនក៏បានកើនឡើងខ្ពស់ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។