កម្ពុជា សង្គម
26/08/2020 – 08:30
ដោយ៖ ញឹម សុផល
RFI
លោកស្រី រ៉ូណា ស្មីត អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្សនៅកម្ពុជា បានបង្ហាញពីក្តីកង្វល់មួយចំនួនទាក់ទងទៅនឹងបញ្ហាព័ត៌មានក្លែងក្លាយអំឡុងពេលកូវីដ១៩ ការធ្វើវិសោធនកម្មច្បាប់នានា និងសេរីភាពក្នុងការសម្តែងមតិនៅក្នុងប្រទេសកម្ពុជា ខណៈរដ្ឋាភិបាលបានអះអាងថាខ្លួនកំពុងតែអនុវត្តឲ្យប្រសើរឡើង។ ការលើកឡើងដូច្នេះ គឺនៅពេលដែលលោកស្រី រ៉ូណា ស្មីត បានធ្វើការពិភាក្សាជាមួយគណៈកម្មការសិទ្ធិមនុស្សកម្ពុជា(គ.ស.ម.ក)តាម Video Conference កាលពីថ្ងៃអង្គារម្សិលមិញ។
តាមរយៈសេចក្តីប្រកាសព័ត៌មានរបស់គណៈកម្មការសិទ្ធិមនុស្សកម្ពុជា លោកស្រី រ៉ូណា ស្មីត អ្នករាយការណ៍ពិសេសអង្គការសហប្រជាជាតិទទួលបន្ទុកស្ថានភាពសិទ្ធិមនុស្សនៅកម្ពុជា(គ.ស.ម.ក) បានបង្ហាញនូវក្តីកង្វល់ ព្រមទាំងផ្តល់អនុសាសន៍ផងដែរជុំវិញបញ្ហាមួយចំនួន ដែលរដ្ឋាភិបាលបាននិងកំពុងអនុវត្តនោះគឺ ការទប់ស្កាត់ការផ្សព្វផ្សាយព័ត៌មានមិនពិត ឬព័ត៌មានក្លែងក្លាយពាក់ព័ន្ធនឹងជំងឺកូវីដ១៩។ បន្ថែមពីនេះ លោកស្រីស្មីត បានចាប់អារម្មណ៍ពីការរៀបចំ និងការធ្វើវិសោធនកម្មច្បាប់មួយចំនួន ដោយមានការចូលរួមពីភាគីពាក់ព័ន្ធ និងស្របតាមគោលការណ៍សិទ្ធិមនុស្សអន្តរជាតិ។
លើសពីនេះ លោកស្រី រ៉ូណា ស្មីត ក៏បានសម្តែងការបារម្ភពីការរឹតត្បិតសិទ្ធិសេរីភាពបញ្ចេញមតិ និងការជួបជុំតវ៉ា តែលោកស្រីមិនគាំទ្រនូវការជួបជុំបញ្ចេញមតិដែលបំពានច្បាប់ បំពានសិទ្ធិសេរីភាពអ្នកដទៃ បង្កើឲ្យមានការរើសអើងពូជសាសន៍ អំពើហិង្សា និងភាពចលាចលប៉ះពាល់ដល់សណ្តាប់ធ្នាប់សាធារណៈ និងសន្តិសុខសង្គម។ ការកើនឡើងនៃការឃុំខ្លួនបណ្តោះអាសន្ន និងភាពចង្អៀតណែនក្នុងពន្ធនាគារស្របពេលមានការរីករាលដាលនៃជំងឺកូវីដ១៩ ក៏ជាចំណុចដែលត្រូវបានកត់សម្គាល់ដោយលោកស្រីស្មីតដែរ។ នេះបើតាមគណៈកម្មការសិទ្ធិមនុស្សកម្ពុជា។
ដោយឡែក គ.ស.ម.ក រួមនឹងស្ថាប័នពាក់ព័ន្ធ ក៏បានអះអាងដែរថា នឹងធ្វើការពិចារណាលើកង្វល់ និងអនុសាសន៍របស់លោកស្រី រ៉ូណា ស្មីត និងបន្តកិច្ចសហប្រតិបត្តិការជាមួយគ្នាបន្ថែមទៀត ដើម្បីធ្វើឲ្យស្ថានភាពសិទ្ធិមនុស្សនៅកម្ពុជាកាន់តែមានភាពល្អប្រសើរឡើង។ ការអះអាងរបស់ គ.ស.ម.ក ដូច្នេះ គឺបន្ទាប់ពីស្ថាប័នសិទ្ធិមនុស្សរដ្ឋាភិបាលមួយនេះ បានរាយការណ៍ជូនអ្នករាយការណ៍ពិសេសទទួលបន្ទុកសិទ្ធិមនុស្សអង្គការសហប្រជាជាតិរួចហើយនូវចំណុចសំខាន់ៗមួយចំនួនដែលប្រទេសកម្ពុជាបានអនុវត្តនោះគឺ របាយការណ៍សិទ្ធិមនុស្ស និងយន្តការនៃការស៊ើបអង្កេត និងដោះស្រាយពាក្យបណ្ដឹងរបស់ប្រជាពលរដ្ឋពាក់ព័ន្ធ និងការរំលោភសិទ្ធិមនុស្ស ដែលមាន៧ចំណុច។
វិធានការឆ្លើយតបនឹងជំងឺកូវីដ១៩របស់រដ្ឋាភិបាលកម្ពុជា។ សេរីភាពបញ្ចេញមតិ ការជួបជុំ និងសមាគម ដោយមានការអះអាងថាកម្ពុជាគោរពសេរីភាពបញ្ចេញមតិ និងការជួបជុំ តែមានវិធានការច្បាប់ចំពោះអ្នកបញ្ចេញមតិ និងជួបជុំដោយបំពានរដ្ឋធម្មនុញ្ញ និងច្បាប់ប៉ុណ្ណោះ។ ក្រៅពីនេះ គ.ស.ម.ក ក៏បានបង្ហាញដល់លោកស្រី ស្មីត ដែរ នូវការងារនៃអនុវត្តនូវការត្រួតពិនិត្យលើលិខិតបទដ្ឋានគតិយុត្ត និងវឌ្ឍនភាពនៃការកែទម្រង់ប្រព័ន្ធយុត្តិធម៌កម្ពុជា៕