បោះឆ្នោត | ព័ត៌មានជាតិ
លោក សូរ្យ ជ័យឧត្ដម | ១៩ តុលា ២០២០ |ម៉ោង ១៥:៥៣
VOD
ពលរដ្ឋមកពិនិត្យមើលឈ្មោះបោះឆ្នោតនៅមណ្ឌលបោះឆ្នោតក្រុងតាខ្មៅ កាលពីឆ្នាំ២០១៨។ (ជន ចាន់រ៉ែន)
គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. បានឱ្យដឹងថា មានពលរដ្ឋដល់ទៅជាង២៥ម៉ឺននាក់ហើយ បានទៅចុះឈ្មោះបោះឆ្នោតថ្មីក្នុងរយៈពេល១៨ថ្ងៃកន្លងមកនេះ ខណៈរយៈពេលនៃការចុះឈ្មោះនិងពិនិត្យបញ្ជីឈ្មោះបោះឆ្នោត នឹងត្រូវបញ្ចប់នៅត្រឹមល្ងាចថ្ងៃនេះ។
តួលេខចេញដោយ គ.ជ.ប. បង្ហាញថា គ.ជ.ប. បានចុះឈ្មោះពលរដ្ឋថ្មី២៥៦ ៥៤៥នាក់នៅក្នុងបញ្ជីបោះឆ្នោតនៅចន្លោះថ្ងៃទី១ ដល់ថ្ងៃទី១៨ ខែតុលា ដែលស្មើនឹង៨៥,៤០ភាគរយនៃចំនួនពលរដ្ឋជាង៣សែននាក់ ត្រូវចុះឈ្មោះបោះឆ្នោតថ្មី។
បើតាមគ.ជ.ប. ពលរដ្ឋថ្មីទើបតែគ្រប់អាយុដែលត្រូវទៅចុះឈ្មោះបោះឆ្នោតនៅក្នុងឆ្នាំនេះ មានចំនួន៣០០ ៣៩០នាក់នៅទូទាំងប្រទេស ដែលនាំឱ្យចំនួនពលរដ្ឋអាយុចាប់ពី១៨ឆ្នាំឡើងទៅ ហើយមានសិទ្ធិបោះឆ្នោត កើនពីចំនួនជាង៨លាន៦២ម៉ឺននាក់ នៅឆ្នាំ២០១៩ ទៅដល់ចំនួនជាង១០លាន៣៨ម៉ឺននាក់ នៅឆ្នាំ២០២០នេះ។
តួលេខចេញដោយ គ.ជ.ប. បង្ហាញឱ្យឃើញទៀតថា ពលរដ្ឋដល់ទៅជាង១៤ម៉ឺននាក់ ត្រូវបានលុបឈ្មោះចេញពីបញ្ជីបោះឆ្នោត ខណៈពលរដ្ឋជាង៨ម៉ឺន៨ពាន់នាក់ បានស្នើសុំកែប្រែទិន្នន័យផ្ទាល់ខ្លួន ហើយពលរដ្ឋជាង៨ម៉ឺន៣ពាន់នាក់ទៀត បានផ្លាស់ប្ដូរទីកន្លែងបោះឆ្នោតរបស់ពួកគេ។
គិតត្រឹមថ្ងៃចន្ទនេះ ពលរដ្ឋដល់ទៅជាង៨លាន៨៨២ម៉ឺននាក់ ចុះឈ្មោះក្នុងបញ្ជីបោះឆ្នោតរួចរាល់ហើយ ដែលស្មើនឹង៨៥,០៣ភាគរយនៃពលរដ្ឋសរុបដែលត្រូវបានអនុញ្ញាតឱ្យបោះឆ្នោត៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។