កូរ៉ូណាវីរុស | ព័ត៌មានជាតិ
លោកស្រី ពេជ្រ សុធារី | ០៤ ធ្នូ ២០២០ |ម៉ោង ០៧:៥៣
VOD

មន្ត្រីក្រសួងសុខាភិបាល បំពេញការងារករណីកូវីដ១៩។ រូបពី cdc

ក្រសួងសុខាភិបាល រកឃើញមនុស្ស​ ៤នាក់​ទៀត បាន​​ឆ្លងជំងឺកូវីដ១៩ក្នុង​ព្រឹត្តិការណ៍សហគមន៍២៨វិច្ឆិកា ក្នុងនោះមាន ២នាក់​ ជាបុគ្គលិកហាង ឌីមកំព្យូទ័រ និង​ហាង Pedro នៅផ្លូវព្រះសីហនុ រាជធានីភ្នំពេញ។

សេចក្តីជូនព័ត៌មាន របស់ក្រសួងសុខាភិបាល នៅថ្ងៃទី០៤ ខែធ្នូ ឆ្នាំ២០២០ ឱ្យ​ដឹងថា អ្នកដែលបាន​ឆ្លងជំងឺកូវីដ១៩ ទាំង ៤រូបនោះ រួមមាន បុរសអាយុ ៣៩ឆ្នាំ ជាបុគ្គលិក​ហាង ឌីមកំព្យូទ័រ​ ស្ត្រី​អាយុ ៣២ឆ្នាំ និងកុមារាអាយុ ៣ឆ្នាំ ដែលត្រូវជាប្តី-ប្រពន្ធ និង​កូន រស់​នៅបុរីលឹម ឈាង ហាក់ សង្កាត់​វាលស្បូវ ខណ្ឌច្បារអំពៅ និង​បុរសអាយុ ២២ឆ្នាំ ជាបុគ្គលិក​ហាង Pedro ផ្លូវព្រះសីហនុ រាជធានីភ្នំពេញ។

ក្រសួងបញ្ជាក់ដែរថា បុរសអាយុ ៣៩ឆ្នាំ និងភរិយាអាយុ៣២ឆ្នាំ រួម​ទាំងកុមារាអាយុ​៣ឆ្នាំ ដែលឆ្លងជំងឺកូវីដ១៩នោះ ត្រូវជាបងប្អូនជីដូនមួយ និង​ក្មួយរបស់​អ្នកជំងឺកូវីដ១៩ ដែលបានរកឃើញកាលពីថ្ងៃទី០២ខែធ្នូ។

ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកានេះ ក្រសួងបញ្ជាក់ថា គិតចាប់ពីថ្ងៃទី២៩ ខែវិច្ឆិកា មកដល់ថ្ងៃទី០៣ ខែធ្នូ ឆ្នាំ២០២០ ក្រសួងបានធ្វើតេស្តអ្នកប៉ះពាល់សរុបទាំងអស់ ចំនួន ៩ ៧៩៣នាក់ ក្នុងនោះ មានអ្នកវិជ្ជមានវីរុសកូវីដ១៩ សរុបចំនួន ២៣នាក់ កំពុងសម្រាកព្យាបាលនៅ​​មន្ទីរពេទ្យ​មិត្ត​ភាពខ្មែរ-សូវៀត។

ដោយសារ​មានការកើនឡើង​នូវចំនួន​អ្នកជំងឺកូវីដ១៩ ដែលមានការ​ចម្លងបន្តគ្នា​ពីកន្លែងមួយទៅកន្លែងមួយនោះ ក្រសួងសុខាភិបាល បានក្រើនរំលឹកជាថ្មី ដល់ប្រជាពល​រដ្ឋ​​​ទាំងអស់ ដែល​ជាប់ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា ជាពិសេស​អ្នកដែល​ប៉ះពាល់អ្នកជំងឺ​ដែលធ្វើការ​នៅធនាគារកាថេ (ផ្លូវសម្តេចប៉ាន) និងធនាគារ​ចិន​(អគារកាណាឌីយ៉ា ផ្លូវព្រះមុនីវង្ស) ត្រូវ​ធ្វើចត្តាឡីស័កឱ្យ​បាន​គ្រប់​ចំនួន១៤ថ្ងៃ និងអនុវត្តវិធានការ​​​ការពារ​ខ្លួន​ កុំឱ្យ​ចម្លងទៅអ្នកដទៃ។

ក្រសួងក៏ណែនាំដល់ប្រជាពលរដ្ឋ​ទូទៅ បន្តការរស់នៅធម្មតាតាមបែបគន្លងថ្មី ដោយពាក់​ម៉ាស់ ត្រូវលាងដៃជាមួយសាប៊ូឬអាល់កុលឱ្យបានញឹកញាប់ រក្សាគម្លាតសុវត្ថិភាព ជាពិសេសក្នុង​កាលៈទេសៈនេះ បើ​មិន​ចាំបាច់ កុំដើរចេញក្រៅផ្ទះ។

បើតាមក្រសួងសុខាភិបាល គិតមកដល់ម៉ោង ៧ព្រឹក ថ្ងៃទី០៤ ខែធ្នូ ឆ្នាំ២០២០ កម្ពុជា បានរកឃើញអ្នកឆ្លងជំងឺកូវីដ១៩ សរុបចំនួន ៣៣៥នាក់ ក្នុងនោះព្យាបាលសះស្បើយចំនួន ៣០៤នាក់ និង​កំពុងសម្រាកព្យាបាលនៅមន្ទីរពេទ្យចំនួន ៣១នាក់៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។