កូវីដ-១៩ | ព័ត៌មានជាតិ | អភិបាលកិច្ច
លោក ញឹម សុខន |១៥ ធ្នូ ២០២០ |ម៉ោង ១៤:៣០
VOD
បុគ្គលិកបម្រើការងារក្រុមហ៊ុនដែលមានការិយាល័យនៅក្នុងអគាកាណាឌីយ៉ា ត្រូវបានអនុញ្ញាតឱ្យចាកចេញពីការិយាល័យ ក្រោយរកមានអ្នកឆ្លងកូវីដ១៩ជាបុគ្គលិកបម្រើការងារនៅក្នុងអគារនេះ នាថ្ងៃទី០៣ ខែធ្នូ ឆ្នាំ២០២០។ (Michael Dickison)
លោកនាយករដ្ឋមន្ត្រី ហ៊ុន សែន បានប្រកាសឱ្យបន្តបិទការជួបជុំដែលមានមនុស្សចាប់ពី២០នាក់ឡើងទៅ ដូចស្ថានភាពបច្ចុប្បន្ន ដើម្បីរក្សាសុខភាពសាធារណៈ ខណៈលោកថា បញ្ហាមួយចំនួន រួមទាំងអ្នកប៉ះពាល់ព្រឹត្តិការណ៍ឆ្លងសហគមន៍២៨វិច្ឆិកា នៅមិនទាន់បង្ហាញខ្លួនអស់នៅឡើយ។
ភ្លាមៗក្រោយពីផ្ទុះឡើងនូវការឆ្លងជំងឺកូវីដក្នុងព្រឹត្តិការណ៍សហគមន៍២៨វិច្ឆិកា រដ្ឋាភិបាលធ្លាប់បានស្នើឱ្យផ្អាកការជួបជុំមនុស្សចាប់ពី២០នាក់ឡើងទៅ ក្នុងនោះមានទាំងមង្គលការ ពិធីបុណ្យតាមបែបសាសនា និងការជួបជុំកម្មវិធីផ្សេងៗ ដោយផ្តោតសំខាន់នៅខេត្តកណ្តាល និងរាជធានីភ្នំពេញ ដើម្បីទប់ស្កាត់ជំងឺឆ្លងនេះ។
ផ្សាយផ្ទាល់ពិសេសនៅថ្ងៃអង្គារនេះ លោកនាយករដ្ឋមន្ត្រី ហ៊ុន សែន មានប្រសាសន៍ថា កម្ពុជាអាចគ្រប់គ្រងព្រឹត្តិការណ៍សហគមន៍២៨វិច្ឆិកាបានហើយ ក៏ប៉ុន្តែមិនទាន់អាចបញ្ចប់បានទេ ដោយថា រដ្ឋាភិបាលត្រូវការពេលបន្ថែមទៀត ដើម្បីធានាថា កូវីដ១៩ដែលបានឆ្លងចូលសហគមន៍២៨វិច្ឆិកា បានផុតរលត់ពិតប្រាកដ។
លោកបានគូសបញ្ជាក់ថា បញ្ហាទំាងនោះ ដូចជា សំណាកមួយចំនួនមិនទាន់ធ្វើតេស្តអស់ អ្នកឆ្លងកូវីដខ្លះនៅមិនទាន់ប្រាប់អស់ថាខ្លួនបានដើរទៅដល់ទីណាខ្លះមុនរកឃើញរោគសញ្ញា អ្នកប៉ះពាល់ខ្លះទៀតមិនទាន់ហ៊ានបង្ហាញមុខនៅឡើយ និងអ្នកធ្វើចត្តាឡីស័កខ្លះមិនទាន់ដល់ថ្ងៃធ្វើតេស្តលើកទី២និងលើកទី៣នៅឡើយ គិតត្រឹមថ្ងៃទី១៤ ខែធ្នូនេះ។
លោកថា៖ «ក្នុងនាមរាជរដ្ឋាភិបាល សុំការយោគយល់ពីព្រះសង្ឃពីប្រជាពលរដ្ឋ ដើម្បីសុំរក្សាស្ថានភាពដូចសព្វថ្ងៃមួយរយៈ ដើម្បីធានាឱ្យប្រាកដថា កូវីដ១៩ដែលបានឆ្លងចូលសហគមន៍២៨វិច្ឆិកា បានផុតរលត់ពិតប្រាកដ ដើម្បីជាប្រយោជន៍ដល់មនុស្សគ្រប់គ្នា»។
លោកបានក្រើនរំឭកដែរថា៖ «ពេលនេះយើងត្រូវជ្រើសរើសហើយ រវាងការឆ្លងមកលើខ្លួនយើង ការស្លាប់ ការរីករាលដាលក្នុងសហគមន៍ ជាមួយនឹងការកម្សាន្តសប្បាយសម្រាប់ណូអែល និងបុណ្យចូលឆ្នាំ [ឆ្នាំសកល]»។
លោកនាយករដ្ឋមន្ត្រី ក៏ចេញបញ្ជាទៅក្រសួងសុខាភិបាល ឱ្យបញ្ជូនសម្ភារនិងបរិក្ខារវេជ្ជសាស្ត្រសង្គ្រោះ ទៅកាន់មន្ទីរសុខាភិបាលនៅតាមបណ្តារាជធានី-ខេត្ត រួមទាំងបង្កើនសមត្ថភាពគ្រូពេទ្យនិងចំនួនគ្រូពេទ្យ ដើម្បីត្រៀមឆ្លើយតបក្នុងករណីដែលមានផ្ទុះឡើងក្នុងទ្រង់ទ្រាយធំជាយថាហេតុ៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។