2021-09-21
RFA
ស្ដាប់ ឬទាញយកសំឡេង
កម្ពុជាអ្នកជំងឺកូវីដ-១៩ ចំនួន ១៧នាក់ទៀតបានស្លាប់ ដែលធ្វើឱ្យករណីស្លាប់ដោយសារជំងឺនេះកើនឡើងដល់ ២.១៤០នាក់ហើយ គិតត្រឹមថ្ងៃទី២១ កញ្ញា។ ចំពោះករណីឆ្លងថ្មីវិញ មានចំនួន ៦២៨នាក់ នៅថ្ងៃដដែលនេះ។ ក្នុងនោះ ១២១រយនាក់ ជាករណីនាំចូលពីក្រៅប្រទេស។
គិតត្រឹមព្រឹកថ្ងៃទី ២១កញ្ញា កម្ពុជាមានអ្នកកើតជំងឺកូវីដ-១៩ ចំនួន ១០៥.៣៤៤នាក់ ក្នុងនោះអ្នកជាសះស្បើយមាន ៩៨.១៨៦នាក់។
ក្រសួងសុខាភិបាលប្រកាសថា គិតត្រឹមថ្ងៃទី២០ កញ្ញា រដ្ឋាភិបាលចាក់វ៉ាក់សាំងជូនពលរដ្ឋបាន ជាង៩លាន ៨សែននាក់ ក្នុងចំណោមអ្នកដែលត្រូវចាក់សរុប ១០លាននាក់។ ចំណែកកុមារ និងយុវជនដែលមានអាយុពី ១២ឆ្នាំ ដល់ ១៧ឆ្នាំវិញ ក្រសួងប្រកាសថា ចាក់វ៉ាក់សាំងបានជាង៨៨ភាគរយ ក្នុងចំណោមអ្នកដែលត្រូវចាក់សរុបជិត ២លាននាក់។សម្រាប់កុមារដែលមានអាយុពី ៦ឆ្នាំដល់ ១១ឆ្នាំវិញ ក្រសួងសុខាភិបាល ឱ្យដឹងថា រដ្ឋាភិបាលចាក់បានជាង ៧សែននាក់ក្នុងចំណោមកុមារដែលត្រូវចាក់វ៉ាក់សាំងជាង ១លាន ៨សែននាក់។
ទោះបីជារដ្ឋាភិបាលចាក់វ៉ាក់សាំងជិតសម្រេចផែនការ ១០០ភាគរយនៃចំនួនមនុស្សដែលត្រូវចាក់យ៉ាងនេះក្ដី ក៏ចំនួនស្លាប់និងអ្នកឆ្លងថ្មីដោយសារជំងឺកូវីដ១៩ នៅតែគួរតែឱ្យព្រួយបារម្ភដដែល។ រយៈពេល ៣ថ្ងៃកន្លងមកនេះមានអ្នកស្លាប់ចន្លោះពី ១៣នាក់ទៅ ១៧នាក់ក្នុងមួយថ្ងៃ និងអ្នកឆ្លងថ្មីមានជាង ៦០០នាក់៕