កម្ពុជា-នយោបាយ
02/03/2023 – 07:24
ដោយ៖ ញឹម សុផល
RFI
មេដឹកនាំគណបក្សភ្លើងទៀន ដែលដឹកនាំដោយលោក សុន ឆ័យ អនុប្រធានគណបក្ស ត្រូវបានទទួលជួបពិភាក្សាដោយលោក ហ្សាក់ ប៉ឺឡេ(Jacques Pellet) ឯកអគ្គរដ្ឋទូតបារាំងប្រចាំកម្ពុជា និងលោក ស្តេហ្វាន ម៉េសសឺរឺ (Stefan Messerer) ឯកអគ្គរដ្ឋទូតអាល្លឺម៉ង់ប្រចាំកម្ពុជា ដែលជំនួបនេះបានធ្វើឡើងនៅស្ថានទូតបារាំង។ © FB
មេដឹកនាំកំពូលៗរបស់គណបក្សភ្លើងទៀន បានបង្ហាញពីជំនួបជាបន្តបន្ទាប់ជាមួយអ្នកកាទូតលោកខាងលិចប្រចាំនៅកម្ពុជា ក្នុងនោះមានឯកអគ្គរដ្ឋទូតបារាំង ឯកអគ្គរដ្ឋទូតអាល្លឺម៉ង់ និងអ្នកកាទូតសហរដ្ឋអាមេរិកផងដែរ។ ជំនួបរបស់មេដឹកនាំបក្សប្រឆាំង ដែលត្រៀមនឹងចូលរួមប្រកួតប្រជែងការបោះឆ្នោតជ្រើសតាំងតំណាងរាស្ត្រនីតិកាលទី៧ខាងមុខនេះ ត្រូវគេមើលឃើញថាធ្វើឡើងបន្ទាប់ពីមេដឹកនាំនៃគណបក្សភ្លើងទៀនមួយចំនួនបានរងនូវការចោទប្រកាន់ និងចាញ់ក្តីតាមផ្លូវតុលាការជាបន្តបន្ទាប់។
ចាប់តាំងពីថ្ងៃទី២៨ ខែកុម្ភៈមក មេដឹកនាំគណបក្សភ្លើងទៀន ដែលដឹកនាំដោយលោក សុន ឆ័យ អនុប្រធានគណបក្ស ត្រូវបានទទួលជួបពិភាក្សាដោយលោក ហ្សាក់ ប៉ឺឡេ (Jacques Pellet) ឯកអគ្គរដ្ឋទូតបារាំងប្រចាំកម្ពុជា និងលោក ស្តេហ្វាន ម៉េសសឺរឺ (Stefan Messerer) ឯកអគ្គរដ្ឋទូតអាល្លឺម៉ង់ប្រចាំកម្ពុជា ដែលជំនួបនេះបានធ្វើឡើងនៅស្ថានទូតបារាំង។ ដោយឡែកខ្លឹមសារនៃជំនួបមិនត្រូវបានបង្ហើបឲ្យដឹងឡើយ។
ក៏ប៉ុន្តែជំនួបជាមួយអនុប្រធានបេសកកម្មការទូតសហរដ្ឋអាមេរិក និងសហការី នៅថ្ងៃទី០១ ខែមីនា ម្សិលមិញ គណបក្សភ្លើងទៀនបានសរសេរនៅលើហ្វេសប៊ុករបស់ខ្លួនថា ភាគីទាំងពីរបានជជែកគ្នាស្ដីអំពីបញ្ហាសិទ្ធិមនុស្ស និងស្ថានភាពនយោបាយនៅកម្ពុជា។
ជាការកត់សម្គាល់ជំនួបជាបន្តបន្ទាប់រវាងមេដឹកនាំគណបក្សភ្លើងទៀន និងអ្នកកាទូតលោកខាងលិចត្រូវអ្នកតាមដានសង្គម និងនយោបាយនានាមើលឃើញថា ជាការស្វែងរកការគាំទ្ររបស់គណបក្សប្រឆាំងជុំ វិញស្ថានការណ៍នយោបាយបច្ចុប្បន្ននៅកម្ពុជា ដែលកាន់តែតានតឹង។ តានតឹង ដោយសារមេដឹកនាំកំពូល២រូប គឺលោក សុន ឆ័យ និងលោក ថាច់ សេដ្ឋា ដែលជាអនុប្រធានគណបក្សភ្លើងទៀន កំពុងរងនូវចំណាត់ការរបស់តុលាការ។
លោក សុន ឆ័យ កាលពីពេលថ្មីៗនេះ ត្រូវតុលាការទាំង៣ថ្នាក់នៃប្រទេសកម្ពុជាកាត់ឲ្យមានទោស ដោយត្រូវបង់ពិន័យ និងសងជំងឺចិត្តជាទឹកប្រាក់រហូតដល់ជាង១លានដុល្លារ ទៅគណបក្សប្រជាជនកម្ពុជា និងគណៈកម្មាធិការជាតិរៀបចំការបោះឆ្នោត ពីបទបរិហារកេរ្តិ៍អំឡុងការបោះឆ្នោតជ្រើសរើសក្រុមប្រឹក្សាឃុំ សង្កាត់ កាលពីខែកក្កដា ឆ្នាំ២០២២។
ដោយឡែកលោក ថាច់ សេដ្ឋា ត្រូវបានតុលាការឃុំខ្លួន ពីបទចេញសែកគ្មានសាច់ប្រាក់ ដែលបានកើតឡើងកាលពីចុងឆ្នាំ២០១៩។ គណបក្សបក្សប្រឆាំងតែហៅការចោទប្រកាន់ និងដាក់ទោសមេដឹកនាំរបស់ខ្លួនពេលនេះ ថាជារឿងនយោបាយ ខណៈដែលគណបក្សកាន់អំណាចយល់ថាជារឿងផ្លូវច្បាប់៕
I knew any opposition leader that pop up the communist Vietcong will never let them fight on the stage expressly Mr THACH SITHA, in another hand the killer during POL POT is coming recently they get still get angry over his enemy just like in 1970 to 1975 .right now they are looking for CIA agent that mean their policy of killing is coming back . I have no though HUN SEN was the killer during POL POT .