កម្ពុជា
30/12/2023 – 05:55
ដោយ៖ អ៊ឹង ប៊ុនថន
RFI
គណបក្សប្រឆាំងថៃ Move Forward ឬហៅម្យ៉ាងទៀតថា គណបក្សកៅក្លៃ បានចេញសេចក្តីថ្លែងការណ៍មួយនៅថ្ងៃទី២៨ធ្នូ ដោយទាត់ចោលការចោទប្រកាន់របស់ក្រុមនយោបាយ និងក្រុមអង្គការសង្គមស៊ីវិល នៅកម្ពុជា ដែលចោទប្រកាន់គណបក្សប្រឆាំងថៃថា ផ្តល់ទឹកដីរបស់ខ្លួនឲ្យក្រុមប្រឆាំងរបស់កម្ពុជាធ្វើសកម្មភាពប្រឆាំងនឹងរដ្ឋាភិបាលកម្ពុជា។ នៅក្នុងសេចក្តីថ្លែងការណ៍កាលពីថ្ងៃព្រហស្បតិ៍ គណបក្សប្រឆាំងថៃ Move Forward បានអះអាងថា ខ្លួនមិនដែលរៀបចំ ឬគាំទ្រសកម្មភាពណាមួយដែលពាក់ព័ន្ធនឹងក្រុមនយោបាយនៅកម្ពុជានោះទេ។
គណបក្សប្រឆាំងថៃដែលទទួលបានសំឡេងឆ្នោតច្រើនជាងគេនេះ បាននិយាយថា ការសហការជាមួយគណបក្សនយោបាយ និងក្រុមនយោបាយមកពីជុំវិញពិភពលោក ដើម្បីចែករំលែកទស្សនៈ និងបទពិសោធន៍ អំពីលទ្ធិប្រជាធិបតេយ្យ និងបញ្ហានយោបាយ។
យ៉ាងណាក៏ដោយ គណបក្សនេះអះអាងថា ខ្លួនមិនដែលមានទំនាក់ទំនងទ្វេភាគី ឬកិច្ចព្រមព្រៀងជាមួយក្រុមនយោបាយបរទេសណាមួយឡើយ។ តែគណបក្សនេះ ទទួលស្គាល់ថា កិច្ចសហប្រតិបត្តិការ នៅក្រោមបណ្តាញមួយឈ្មោះថា «បណ្តាញសង្គមប្រជាធិបតេយ្យអាស៊ី-ប៉ាស៊ីភិក» គឺមានសមាជិករហូតជាង ១៤០ប្រទេស។ នេះបើតាមការចុះផ្សាយរបស់កាសែតThe Nation នៅថ្ងៃទី៣០ធ្នូ។
កាលពីថ្ងៃទី២៥ធ្នូ ក្រុមគណបក្សនយោបាយនៅកម្ពុជាចំនួន ៧ និងអង្គការសង្គមស៊ីវិលមួយចំនួន ៦ បានដាក់លិខិតក្នុងទម្រង់ដូចៗគ្នា ស្នើឲ្យ លោក សេដ្ឋា ថាវីស៊ីន នាយករដ្ឋមន្រ្តីថៃ ត្រួតពិនិត្យសកម្មភាពរបស់ គណបក្សថៃ។
ក្រុមនេះបានចោទប្រកាន់គណបក្សប្រឆាំងថៃថា ផ្តល់ទឹកដីរបស់ខ្លួនឲ្យក្រុមប្រឆាំងរបស់កម្ពុជាធ្វើសកម្មភាពប្រឆាំងនឹងរដ្ឋាភិបាលកម្ពុជា។
ក្នុងលិខិតតវ៉ានោះ ក្រុមដដែលនេះ បានលើកឡើងដោយយោងតាមច្បាប់ស្តីពីកិច្ចព្រមព្រៀងទ្វេភាគីរវាងប្រទេសទាំងពីរ និងលក្ខន្តិកៈរបស់សមាគមអាស៊ាន។ ក្រុមនេះ បានចាត់ទុកថា សកម្មភាពនយោបាយរបស់ គណបក្សកាវក្លៃ ហាក់បីដូចជាកំពុងធ្វើសកម្មភាពឲ្យប៉ះពាល់ដល់នយោបាយការទូតរវាងកម្ពុជា-ថៃ និងព្រមានថា សកម្មភាពនេះក៏ប៉ះពាល់ផងដែរ ទាំងវិស័យសេដ្ឋកិច្ច និងនយោបាយ ពិសេសធ្វើឲ្យប៉ះពាល់ច្បាប់ប្រទេសថៃ ដែលមិនអនុញ្ញាតឲ្យបរទេសណាមួយយកទឹកដីខ្លួន ធ្វើសកម្មភាពប្រឆាំងនឹងរដ្ឋាភិបាលប្រទេសផ្សេង ពិសេសប្រទេសអាស៊ាន។
អ្នកតាមដានសភាពការណ៍បារម្ភថា ការដាក់លិខិតតវ៉ាបែបនេះ អាចជាការបង្កើតព្រឹត្តិការណ៍ដើម្បីកម្ទេចគណបក្សនយោបាយណាមួយនៅកម្ពុជា ខណៈដែលរូបភាពនៃគណបក្សភ្លើងទៀន ក៏ត្រូវបានភ្ជាប់ទៅនឹងសកម្មភាពនៅទឹកដីថៃនោះដែរ៕