កម្ពុជា
04/02/2024 – 10:01
ដោយ៖ សេង បារាំង
RFI
លោក ហ៊ុន សែន ប្រធានគណបក្សប្រជាជនកម្ពុជា បានព្រមានប្ដឹងលោក សឹង សែនករុណា អ្នកនាំពាក្យសមាគមអាដហុក។ អតីតនាយករដ្ឋមន្រ្តីកម្ពុជារូបនេះ បាននិងកំពុងឲ្យមេធាវីរបស់គណបក្សប្រជាជនកម្ពុជាសិក្សាផ្លូវច្បាប់ ដើម្បីប្ដឹងលោក សឹង សែនករុណា។ តាមលោក ហ៊ុន សែន លោកនឹងមិនផ្ដល់ឱកាសសម្រាប់អ្នកដែលប្រមាថមកលើគណបក្សប្រជាជនកម្ពុជាទៀតឡើយ។
លោក ហ៊ុន សែន ឲ្យមេធាវីសិក្សាផ្លូវច្បាប់ប្ដឹងលោក សឹង សែនករុណា © សេង បារាំង
នៅថ្ងៃទី០៤ ខែកុម្ភៈ ឆ្នាំ២០២៤នេះ អតីតនាយករដ្ឋមន្រ្តីកម្ពុជា លោក ហ៊ុន សែន និងជាប្រធានគណបក្សប្រជាជនកម្ពុជា បានឲ្យមេធាវីសិក្សាផ្លូវច្បាប់ ដើម្បីប្ដឹងលោក សឹង សែនករុណា អ្នកនាំពាក្យសមាគមអាដហុក។ តាមរយៈទំព័រហ្វេសប៊ុកលោក ហ៊ុន សែន បានសំណេរយ៉ាងដូច្នេះថា «គ្មានការយោគយល់ណាសម្រាប់ផ្តល់ឱ្យពួកអ្នកទៀតទេ ព្រោះនៅពេលអ្នកវាយប្រហារមកលើគណបក្សប្រជាជន ឬមកលើខ្ញុំ តើពួកអ្នកមានបានយោគយល់ដល់យើងដែរឬទេ»?
ការព្រមានប្ដឹងលោក សឹង សែនករុណា ដោយប្រធានគណបក្សប្រជាជនរូបនេះ ធ្វើឡើងដោយភ្ជាប់ជាមួយសេចក្ដីថ្លែងការណ៍របស់មេធាវីគណបក្សប្រជាជនកម្ពុជាចំនួន ៤រូប ដែលបានបកស្រាយឆ្លើយតបនឹងលោក សុន ឆ័យ ដែលបានផ្ដល់បទសម្ភាសឲ្យវិទ្យុបារាំងអន្តរជាតិ RFI និងសារព័ត៌មាន ឌឹខេមបូឌា ឌេលី។ ការផ្ដល់បទសម្ភាសរបស់លោក សុន ឆ័យនៅពេលនោះ នៅគ្រាដែលតុលាការកំពូលចេញសាលដីកាសម្រេចឲ្យលោក សុន ឆ័យ បង់សងជំងឺចិត្តគណបក្សប្រជាជន ពាក់ព័ន្ធបរិហាកេរ្កិ៍ជាសាធារណៈ។
តាមលោក ហ៊ុន សែន ក្នុងការចុះផ្សាយក៍មានការនិយាយដោយលោក សឹង សែនករុណាដែរ។ តែលោកមិនបានបញ្ជាក់ថា លោក សឹងសែនករុណា និយាយអ្វីមកលើគណបក្សប្រជាជនឡើយ។ ត្រង់ករណីនេះ ប្រធានគណបក្សប្រជាជនកម្ពុជា បានឱ្យមេធាវីគណបក្សប្រជាជនសិក្សាផ្លូវច្បាប់ដើម្បីប្តឹងលោក សឹង សែនករុណា ម្នាក់នេះទៀតប្រសិនមានមូលដ្ឋានគ្រប់គ្រាន់ខាងផ្លូវច្បាប់។
យ៉ាងណាមិញពាក់ព័ន្ធការព្រមាន ប្ដឹងនេះ លោក សឹង សែនករុណា អ្នកនាំពាក្យសមាគមអាដហុក បានបញ្ជាក់ប្រាប់វិទ្យុបារាំងអន្តរជាតិ RFI ថា ការនិយាយរបស់លោកកន្លងមក គឺឈរកណ្ដាលជានិច្ច មិនមាននិន្នាការលម្អៀងទៅបក្សណាឬអ្នកនយោបាយណានោះឡើយ។ កិច្ចការងាររបស់លោកគឺចង់ឃើញកម្ពុជាមានលទ្ធិប្រជាប្រជាធិបតេយ្យ និងការគោរពសិទ្ធិមនុស្សតែប៉ុណ្ណោះ។
បើតាមអតីតនាយករដ្ឋមន្រ្តីកម្ពុជា លោក ហ៊ុន សែន គណបក្សប្រជាជនកម្ពុជាមិនផ្តល់ឱកាសសម្រាប់មនុស្សណាមកប្រមាថមើលងាយគណបក្សតទៅទៀតទេ។ សម្រាប់លោក ហ៊ុន សែនយើងត្រូវរកយុត្តិធម៍សម្រាប់ខ្លួនយើងតាមផ្លូវតុលាការ។ ត្រង់បញ្ហានេះ លោកលើកឡើងដូច្នេះថា «សិទ្ធិរបស់អ្នកមានព្រំដែនជាមួយសិទ្ធិរបស់ខ្ញុំ»៕