ដោយ សុជីវី
2024.02.15
RFA
ជំនួបរវាងឯកអគ្គរដ្ឋទូតឥណ្ឌាប្រចាំនៅក្រុងភ្នំពេញ អ្នកស្រី ដេវីយ៉ានី ខូប្រាហ្គាដេ (Devyani Khobragade) និងអគ្គស្នងការនគរបាលជាតិ លោក ស ថេត កាលពីថ្ងៃទី១៨ មករា ២០២៤។ រូប៖ ហ្វេសប៊ុកលោក ស ថេត
កម្ពុជា និងឥណ្ឌាចាប់ផ្ដើមពិភាក្សាបង្កើនកិច្ចសហប្រតិបត្តិការបង្ក្រាបបទល្មើសឆបោកតាមអនឡាញ (Online) ឬតាមអ៊ីនធឺណិត (Internet)។
ស្ថានទូតឥណ្ឌាប្រចាំនៅកម្ពុជាបានបង្ហោះសារ កាលពីថ្ងៃទី២២ ខែមករា ថា ឯកអគ្គរដ្ឋទូតឥណ្ឌាប្រចាំនៅក្រុងភ្នំពេញ អ្នកស្រី ដេវីយ៉ានី ខូប្រាហ្គាដេ (Devyani Khobragade) បានជួបពិភាក្សាការងារជាមួយ អគ្គស្នងការនគរបាលជាតិ លោក ស ថេត ពីកិច្ចសហការរវាងកម្លាំងសមត្ថកិច្ចនៃប្រទេសទាំង២ ក្នុងគោលដៅពង្រឹងសហប្រតិបត្តិការឱ្យកាន់តែជិតស្និទ្ធប្រឆាំងបទល្មើសឆបោកតាមអនឡាញ និងការពារជនរងគ្រោះដោយអំពើជួញដូរមនុស្ស ព្រមទាំងធានាការអនុវត្តច្បាប់លើជនល្មើស។
ទាក់ទងនឹងរឿងនេះ ស្ថានទូតឥណ្ឌានៅភ្នំពេញបានប្រាប់សារព័ត៌មានភ្នំពេញប៉ុស្តិ៍ថា ភាគីទាំង២បានពិភាក្សាគ្នាពីលទ្ធភាពសាកល្បងយន្តការថ្មី ដើម្បីឱ្យភាគីទាំង២ អាចចែករំលែកព័ត៌មានពីជនសង្ស័យក្នុងបណ្ដាញជនឆបោកតាមអនឡាញ។ ប្រភពដដែលបញ្ជាក់ថា មកដល់ពេលនេះ តាមរយៈកិច្ចសហប្រតិបត្តិការរវាងប្រទេសទាំង២ មានមន្ត្រីនៃក្រសួងមហាផ្ទៃកម្ពុជាជិត ១០០នាក់ បានទទួលការបណ្ដុះបណ្ដាលជំនាញផ្សេងៗជាច្រើនទាក់ទងនឹងបទល្មើសបច្ចេកវិទ្យា និងកំណត់ភេរវជន។
មជ្ឈមណ្ឌលសម្របសម្រួលប្រឆាំងឧក្រិដ្ឋកម្មអនឡាញរបស់ឥណ្ឌា (Indian Cyber Crime Coordination Centre (I4C) កាលពីដើមខែមករា រកឃើញថា ឧក្រិដ្ឋកម្មក្លែងបន្លំលុយតាមអ៊ីនធឺណិត មានដល់៥០ភាគរយ នៅប្រទេសរបស់ខ្លួនមានប្រភពចេញមកពីប្រទេសចិន មីយ៉ាន់ម៉ា (Myanmar) និងកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។