កម្ពុជា
27/06/2024 – 13:24
ដោយ៖ អោ ស្រីពេជ្រ
RFI
រដ្ឋមន្ត្រីក្រសួងការបរទេសអូស្ត្រាលីលោកស្រី ផេននី វុង បានអះអាងថា ស្ថានទូតអូស្ត្រាលីប្រចាំកម្ពុជាកំពុងតាមមើលដំណើរការស៊ើបអង្កេតរបស់ប៉ូលិសខ្មែរជុំវិញករណីវាយប្រហារពលរដ្ឋអូស្ត្រាលីដើមកំណើតខ្មែរលោក សាន ប៊ុនឆាយ នៅខេត្តបាត់ដំបងកាលពីខែមេសាកន្លងទៅ។ ការអះអាងរបស់ប្រមុខការបរទេសអូស្ត្រាលីនេះធ្វើឡើង បន្ទាប់ពីលោកស្រី មួរ សុខហួរ អនុប្រធានអតីតបក្សសង្គ្រោះជាតិបានស្នើឱ្យអូស្ត្រាលីអន្តរាគមន៍លើរឿងនេះ។
អូស្ត្រាលីតាមមើលការស៊ើបអង្កេតរបស់ប៉ូលិសខ្មែរលើករណីវាយប្រហារពលរដ្ឋអូស្ត្រាលីដើមកំណើតខ្មែរម្នាក់
រដ្ឋាភិបាលអូស្ត្រាលីពិតជាមានក្តីកង្វល់ចំពោះករណីវាយប្រហារពលរដ្ឋអូស្ត្រាលីម្នាក់ដើមកំណើតខ្មែរ លោក ស៊ាន ប៊ុនឆាយ និងថា អូស្ត្រាលីក៏បានកត់ត្រាករណីនេះជាមួយអាជ្ញាធរកម្ពុជាដែរ។ នេះជាការលើកឡើងរបស់លោកស្រី ផេននី វុង រដ្ឋមន្ត្រីក្រសួងការបរទេសអូស្ត្រាលីនៅក្នុងលិខិតមួយចុះថ្ងៃទី២០ ខែមិថុនាផ្ញើទៅកាន់លោកស្រីមួរ សុខហួរ អនុប្រធានអតីតបក្សសង្គ្រោះជាតិ និងដែលលោកស្រី មួរ សុខហួរ ទើបបានទម្លាយឲ្យដឹងនៅថ្ងៃទី២៦ មិថុនា។ ការលើកឡើងរបស់ប្រមុខការបរទេសអូស្ត្រាលីនេះធ្វើឡើង បន្ទាប់ពីលោកស្រី មួរ សុខហួរ បានស្នើឱ្យអូស្ត្រាលីចូលអន្តរាគមន៍លើករណីវាយប្រហារលោក ស៊ាន ប៊ុនឆាយ។
ដោយកត់សម្គាល់នូវក្តីកង្វល់ពីការជ្រៀតជ្រែកក្នុងសហគមន៍ជនភៀសខ្លួនកម្ពុជានៅក្នុងប្រទេសអូស្ត្រាលី លោកស្រី ផេននី វុង បានអះអាងទៀតថា នាយកដ្ឋានកិច្ចការបរទេស និងពាណិជ្ជកម្មអូស្ត្រាលីបានត្រៀមខ្លួនរួចជាស្រេចក្នុងការផ្តល់ជំនួយកុងស៊ុលដល់ពលរដ្ឋអូស្ត្រាលីណាដែលស្ថិតក្នុងហានិភ័យនៅក្រៅប្រទេស។ តែរដ្ឋាភិបាលអូស្ត្រាលីមិនបានបញ្ជាក់ថា តើលោក ស៊ាន ប៊ុនឆាយ កំពុងទទួលជំនួយកុងស៊ុលហើយ ឬក៏យ៉ាងណាទេ។ ទោះយ៉ាងណា ប្រមុខការទូតអូស្រ្តាលីរូបនេះដដែលបានអះអាងថា ស្ថានទូតអូស្ត្រាលីប្រចាំក្រុងភ្នំពេញនៅតែបន្តតាមដានការវិវត្តន៍ទាក់ទងនឹងការស៊ើបអង្កេតរបស់ប៉ូលិសខ្មែរដើម្បីតស៊ូមតិសម្រាប់ការស៊ើបអង្កេតទាន់ពេលវេលា និងហ្មត់ចត់។
ជាការតស៊ូមតិលើកកម្ពស់សិទ្ធិមនុស្សដែលក្រសួងការបរទេសអូស្ត្រាលីចាត់ទុកជារឿងសំខាន់នៅក្នុងដំណើរការកិច្ចសហប្រតិបត្តិការទ្វេភាគីរវាងកម្ពុជា-អូស្ត្រាលី។ គួរជ្រាបថា ពលរដ្ឋអូស្ត្រាលីដើមកំណើតខ្មែរលោក សាន ប៊ុនឆាយ គឺជាអ្នកគាំទ្រលោក សម រង្ស៊ី និងជាអ្នកបញ្ចេញមតិលើបណ្ដាញសង្គមដ៏សកម្មម្នាក់។ លោក សាន ប៊ុនឆាយ ត្រូវបានជនមិនស្គាល់មុខមួយក្រុមព្រួតគ្នាប្រើអំពើហិង្សាវាយប្រហារទាំងកម្រោលនៅកណ្ដាលក្រុងបាត់ដំបង ខេត្តបាត់ដំបងកាលពីថ្ងៃទី១០ ខែមេសា ក្នុងពេលដែលលោកកំពុងដើរចេញពីធនាគារ ABA នៅជិតសាលាខេត្តបាត់ដំបង និងប៉ុស្តិ៍នគរបាលស្វាយប៉ោ។
គិតត្រឹមថ្ងៃទី២៧ ខែមិថុនានេះ ស្នងការនគរបាលខេត្តបាត់ដំបងនៅមិនទាន់វែកមុខរកឃើញក្រុម ឬជនដៃដល់វាយប្រហារលោក សាន ប៊ុនឆាយ នៅឡើយទេ។ នេះបើតាមការបញ្ជាក់របស់លោក ពេជ្រ សារ៉ែន អធិការនគរបាលក្រុងបាត់ដំបងដោយបញ្ជាក់បន្ថែមថា សមត្ថកិច្ចជំនាញក្រុងបាត់ដំបងកំពុងបន្តស្រាវជ្រាវ៕