ដោយ ថា ថៃ
2024.06.29
RFA
ប្រធានអង្គការសង់ត្រាល់ លោក មឿន តុលា ចូលបំភ្លឺសាលាដំបូងរាជធានីភ្នំពេញ អំពីរឿងលុយបុណ្យសពបណ្ឌិត កែម ឡី កាលពីថ្ងៃទី២៤ ឧសភា ២០១៨។ រូប៖ ហ្វេសប៊ុកសង់ត្រាល់
ក្រសួងមហាផ្ទៃទុករយៈពេល៣០ថ្ងៃ ឲ្យមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ឬហៅកាត់ថា សង់ត្រាល់ (CENTRAL) បង្ហាញព័ត៌មានធនាគារ ដែលកំពុងមានប្រតិបត្តិការនៅក្នុងប្រទេសកម្ពុជា។ មន្ត្រីអង្គការសង់ត្រាល់ បញ្ជាក់ថា សង់ត្រាល់នឹងរៀបចំដាក់ឯកសារពាក់ព័ន្ធទៅកាន់ក្រសួងមហាផ្ទៃឆាប់ៗនេះ។
ក្រោយទទួលបានញត្តិពីក្រុមសហជីពគាំទ្ររដ្ឋាភិបាលភ្លាម ក្រសួងមហាផ្ទៃចាប់ផ្តើមដាក់សម្ពាធទៅលើអង្គការសង់ត្រាល់ដោយមិនបង្អង់យូរឡើយ។
ក្រសួងមហាផ្ទៃ បានដាក់កំហិតឲ្យប្រធានអង្គការសង់ត្រាល់ លោក មឿន តុលា ត្រូវផ្តល់ព័ត៌មានរាល់គណនីធនាគារ ដែលបានបើកសម្រាប់ប្រតិបត្តិការនៅធនាគារក្នុងប្រទេសជូនក្រសួងមហាផ្ទៃ ក្នុងរយៈពេល៣០ថ្ងៃ ចាប់ពីថ្ងៃជូនដំណឹងជាកំណត់។
លិខិតជូនដំណឹង ដែលចុះហត្ថលេខាដោយរដ្ឋមន្ត្រីក្រសួងមហាផ្ទៃ លោក ស សុខា ចុះថ្ងៃទី២៨ ខែមិថុនា ក៏បានរំលឹកដល់អង្គការសង់ត្រាល់ឲ្យអនុវត្តឲ្យបានត្រឹមត្រូវតាមលក្ខន្តិកៈរបស់អង្គការ ដែលបានតម្កល់ទុកនៅក្រសួងមហាផ្ទៃ និងលិខិតបទដ្ឋានគតិយុត្តិជាធរមាន។ ក្រសួងមហាផ្ទៃ ព្រមានថា ក្នុងករណីអង្គការសង់ត្រាល់ ពុំបានបំពេញកាតព្វកិច្ចទៅតាមសេចក្តីជូនដំណឹងនេះទេ នឹងត្រូវរងវិធានការតាមផ្លូវច្បាប់។
ការចេញលិខិតរបស់ក្រសួងមហាផ្ទៃនេះគឺបន្ទាប់ពីក្រសួងមហាផ្ទៃ បានទទួលពាក្យបណ្ដឹង និងសេចក្ដីថ្លែងការណ៍របស់ក្រុមសហជីព និងសមាគមគាំទ្ររដ្ឋាភិបាល ដែលចោទអង្គការសង់ត្រាល់ថា បានចេញផ្សាយរបាយការណ៍មានភាពលម្អៀង ដោយមិនឆ្លុះបញ្ចាំងពីការពិតពីសេរីភាពសហជីពនៅកម្ពុជា និងប៉ះពាល់ដល់កិត្តិយសជាតិជាដើម។
ឆ្លើយតបនឹងបញ្ហានេះ ប្រធានអង្គការសង់ត្រាល់ (CENTRAL) លោក មឿន តុលា ប្រាប់វិទ្យុអាស៊ីសេរី នៅថ្ងៃទី២៩ ខែមិថុនាថា អង្គការសង់ត្រាល់តែងផ្ញើរបាយការណ៍សកម្មភាព និងប្រតិបត្តិការធនាគារ នៅអំឡុងខែកុម្ភៈជារៀងរាល់ឆ្នាំ ហើយសង់ត្រាល់នឹងរៀបចំឯកសារពាក់ព័ន្ធជាថ្មីម្ដងទៀត ដាក់ទៅក្រសួងមហាផ្ទៃ។ «»
កាលពីថ្ងៃទី៤ ខែមិថុនា អង្គការសង់ត្រាល់ បានចេញរបាយការណ៍មួយស្ដីពីឧបសគ្គរារាំងសេរីភាពរបស់សហជីពក្នុងប្រទេសកម្ពុជា។ របាយការណ៍នេះ ធ្វើឡើងដោយបានអង្កេត និងសម្ភាសន៍កម្មករ និងថ្នាក់ដឹកនាំសហជីពក្នុងរោងចក្រចំនួន ១៤ ដែលស្ថិតក្រោមកម្មវិធីរោងចក្រកាន់តែប្រសើរនៅកម្ពុជា នៃអង្គការពលកម្មអន្តរជាតិហៅកាត់ ILO។ អង្គការនេះរកឃើញថា ក្នុងចំណោម សហជីពចំនួន១៤ មានសហជីពចំនួន ១០ រងការបំភិតបំភ័យដោយផ្ទាល់មាត់ ការគំរាមកំហែង ការបៀតបៀន និងការដាក់ក្នុងបញ្ជីខ្មៅដែលធ្វើឲ្យប៉ះពាល់ដល់ការបំពេញការងាររបស់ពួកគេ។ ការចេញរបាយការណ៍នេះ អង្គការសង់ត្រាល់ មានបំណងទាមទារឱ្យគ្រប់ភាគីពាក់ព័ន្ធគួរតែពិនិត្យមើល និងដោះស្រាយកុំឱ្យមានការរំលោភសិទ្ធិសេរីភាពការងាររបស់ កម្មករនិយោជិត និងសហជីព។ ប៉ុន្តែផ្ទុយទៅវិញ រដ្ឋាភិបាល មិនបានពិនិត្យដោះស្រាយបញ្ហានេះទេ បែរជាប្រើប្រាស់សហជីពគាំទ្ររដ្ឋាភិបាល ឲ្យចេញតវ៉ាប្រឆាំងនិងប្តឹងអង្គការសង់ត្រាល់ទៅក្រសួងមហាផ្ទៃ ដើម្បីជាលេសក្នុងការធ្វើទុក្ខបុកម្នេញលើអង្គការដែលធ្វើការងារការពារសិទ្ធិកម្មករមួយនេះ។
ចំណែកឯ នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ (Licadho) លោក អំ សំអាត បារម្ភថា ប្រសិនបើមានវិធានការណាមួយ លើអង្គការសង់ត្រាល់ដែលបានចេញរបាយការណ៍នោះ នឹងបង្ហាញពីការបំភិតបំភ័យ និងការរឹតត្បិតសិទ្ធិសេរីភាពសមាគម និងអង្គការមិនមែនរដ្ឋាភិបាល។ «»
កាលពីថ្ងៃទី២៧ ខែមិថុនា ក្រុមអង្គការសង្គមស៊ីវិល ជាង ៤០ ស្ថាប័ន រួមមានសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (ADHOC) មជ្ឈមណ្ឌលសិទ្ធិមនុស្សកម្ពុជា (CCHR) ជាដើម បានចេញសេចក្ដីថ្លែងការណ៍រួមស្នើឱ្យក្រសួងមហាផ្ទៃ និងអាជ្ញាធរពាក់ព័ន្ធ បញ្ឈប់ការធ្វើទុក្ខបុកម្នេញគ្រប់រូបភាព មកលើមជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់ថា «សង់ត្រាល់»។
ក្រុមអង្គការទាំងនេះ ចាត់ទុកថា ការប្រើប្រាស់វិធានការរដ្ឋបាលរបស់អាជ្ញាធរ ដើម្បីដាក់ទណ្ឌកម្មលើអ្នកធ្វើការងារការពារសិទ្ធិកម្មករ គឺជាការរំលោភសិទ្ធិសេរីភាពបញ្ចេញមតិ ។ ក្រុមអង្គការស៊ីវិលទាំងជាង៤០ស្ថាប័ន ក៏អំពាវនាវដល់អង្គការពលកម្មអន្តរជាតិ សាជីវកម្មហិរញ្ញវត្ថុអន្តរជាតិ និងគម្រោងរោងចក្រកាន់តែប្រសើរនៅកម្ពុជា សូមទទួលស្គាល់ជាសាធារណៈ នូវតម្លៃ នៃការសិក្សាស្រាវជ្រាវ ដែលរិះគន់សំដៅដល់ធ្វើឱ្យកាន់តែប្រសើរឡើងនូវដំណើរការ និងសកម្មភាពការងាររបស់គម្រោងនៃស្ថាប័នខ្លួន ។ បន្ថែមពីនេះ ក្រុមអង្គការសង្គមស៊ីវិលឯករាជ្យ អំពាវនាវដល់រដ្ឋាភិបាល ត្រូវរក្សាជំហរ និងការប្ដេជ្ញាចិត្តរបស់ខ្លួន ក្នុងការគោរពនូវសេរីភាពក្នុងការបញ្ចេញមតិ និងអនុញ្ញាតឱ្យអង្គការមិនមែនរដ្ឋាភិបាលទាំងអស់ អាចធ្វើការងាររបស់ខ្លួន ដោយសេរី ជៀសផុតពីការរំលោភបំពាន និងការឆ្លើយតបជាអវិជ្ជមាន ដោយគ្រាន់តែស្ថាប័នទាំងនោះធ្វើការរិះគន់ ។
ក្រៅពីនេះ សម្ព័ន្ធសហជីព និងអង្គការក្រៅរដ្ឋាភិបាលអន្តរជាតិឈ្មោះថា យុទ្ធនាការសំលៀកបំពាក់ស្អាត (Clean Clothes Campaign) កាលពីថ្ងៃទី២៦ មិថុនា ក៏បានចេញសេចក្តីថ្លែងការណ៍ថ្មីមួយទៀតដែរ ដោយអំពាវនាវឲ្យអង្គការពលកម្មអន្តរជាតិ(ILO) ក្រុមហ៊ុនបញ្ជាទិញអន្តរជាតិ និងគម្រោងរោងចក្រកាន់តែប្រសើរនៅកម្ពុជា កុំរក្សាភាពស្ងៀមស្ងាត់ ក្នុងពេលរដ្ឋាភិបាលកម្ពុជា កំពុងបង្កើនការគំរាមកំហែងលើអង្គការសង់ត្រាល់។ យុទ្ធនាការសំលៀកបំពាក់ស្អាត (Clean Clothes Campaign) ទាមទារឲ្យក្រុមហ៊ុនបញ្ជាទិញម៉ាកល្បីៗ ដែលចូលរួមនៅក្នុងគម្រោងរោងចក្រកាន់តែប្រសើរនៅកម្ពុជានេះ ត្រូវបញ្ជាក់ឲ្យច្បាស់ទៅកាន់រដ្ឋាភិបាលកម្ពុជាថា របាយការណ៍របស់សង់ត្រាល់ អំពីសេរីភាពសមាគមនេះ ត្រូវបានស្វាគមន៍ ហើយអង្គការសង់ត្រាល់ នឹងមិនត្រូវបានចាប់ពិរុទ្ធ និងរងការគំរាមគំរាមកំហែងនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។