កម្ពុជា
06/08/2024 – 12:07
ដោយ៖ ញឹម សុផល
RFI
ប្រធានរដ្ឋសភា និងជាអតីតនាយករដ្ឋមន្ត្រីលោក ហ៊ុន សែន បានលើកឡើងក្នុងថ្ងៃទី០៥ ខែសីហា ឆ្នាំ២០២៤ ថា លោកនឹងចូលរួមតាំងចិត្តជាមួយមេដឹកនាំកំពូលភូមាលោក មីន អ៊ុងឡាំង ដើម្បីពង្រឹងមិត្តភាព និងកិច្ចសហប្រតិបត្តិការរវាងប្រទេសទាំងពីរកម្ពុជា ភូមាបន្ថែមទៀត។ ការបញ្ជាក់របស់ លោកហ៊ុន សែន ដូច្នេះ គឺជាការឆ្លើយតបទៅកាន់លោក មីន អ៊ុងឡាំង ដែលបានផ្ញើសារជូនពរខួបកំណើតលោកកាលពីថ្ងៃទី០១ ខែសីហា ឆ្នាំ២០២៤។
លោក ហ៊ុន សែន និងលោក មីន អ៊ុងឡាំង ប្តេជ្ញាបន្តពង្រឹងមិត្តភាពកម្ពុជា-ភូមា
នៅក្នុងលិខិតមួយច្បាប់ផ្ញើទៅកាន់ លោក មីន អ៊ុងឡាំង ប្រធានក្រុមប្រឹក្សារដ្ឋបាលរដ្ឋនៃសាធារណរដ្ឋសហភាពមីយ៉ាន់ម៉ា ឬភូមា លោក ហ៊ុន សែន ប្រធានព្រឹទ្ធសភាកម្ពុជាបានអះអាងថា ចំណងមិត្តភាព និងកិច្ចសហប្រតិបត្តិការរវាងកម្ពុជា និងភូមាក្នុងរយៈពេល ៦ទសវត្សរ៍កន្លងមកពិតជាកាន់តែរឹងមាំ។
ការលើកឡើងរបស់អតីតនាយករដ្ឋមន្ត្រីកម្ពុជាបែបនេះធ្វើឡើង ៥ថ្ងៃ បន្ទាប់ពីមេដឹកនាំរបបសឹកភូមាលោក មីន អ៊ុងឡាំង បានផ្ញើលិខិតជូនពរខួបកំណើតលោកគម្រប់៧២ ឈានចូល ៧៣ឆ្នាំ ក្នុងថ្ងៃទី ០៥ ខែសីហា។ នៅក្នុងលិខិតខ្លីផ្ញើជូនលោក ហ៊ុន សែន លោក មីន អ៊ុងឡាំង បានរំលេចថា លោកពិតជាទន្ទឹងរង់ចាំពង្រឹងបន្ថែមទៀតនូវមិត្តភាព និងកិច្ចសហប្រតិបត្តិការដើម្បីផលប្រយោជន៍ទៅវិញទៅមករបស់ប្រជាជននៃប្រទេសទាំងពីរ។
ជាការឆ្លើយតប លោក ហ៊ុន សែន បានគូសបញ្ជាក់ថា លោកចូលរួមតាំងចិត្តជាមួយលោក មីន អ៊ុងឡាំងក្នុងការពង្រឹងបន្ថែមទៀតនូវមិត្តភាព និងកិច្ចសហប្រតិបត្តិការរវាងប្រទេសទាំងពីរដើម្បីផលប្រយោជន៍របស់ប្រជាជនទាំងពីរផងដែរ។
ក្រៅពីពាក្យពេចន៍គោរពជូនសព្ទសាធុការពររបស់លោក មីន អ៊ុងឡាំង ចំពោះ លោក ហ៊ុន សែន មេដឹកនាំនៃប្រទេសសមាជិកអាស៊ានទាំងពីរមិនបានរំលេចនូវរបៀបវារៈការងារអ្វីផ្សេងទៀតទេ បន្ទាប់ពីលោក មីន អ៊ុងឡាំង កាលពីខែឧសភា ឆ្នាំ២០២៤ បានឆ្លើយតបមកលោក ហ៊ុន សែន ដោយសុំពិចារណាសំណើរបស់លោក ហ៊ុន សែន ក្នុងការសុំជួបមេដឹកនាំប្រឆាំងភូមាលោកស្រី អ៊ុង សានស៊ូជី ដែលកំពុងជាប់ក្នុងពន្ធនាគារតាមប្រព័ន្ធវីដេអូ៕