កម្ពុជា
16/02/2025 – 08:57
ដោយ៖ អ៊ឹង ប៊ុនថន
RFI
ក្រសួងជំនាញចំនួន៣ បានចេញប្រកាសរួមមួយនៅថ្ងៃទី១៤ ខែកុម្ភៈ ឆ្នាំ២០២៥ ប្រាប់ទៅអ្នកប្រើប្រាស់អាកាសយានគ្មានមនុស្សបើក(ដ្រូន)ត្រូវទៅធ្វើស្វ័យប្រកាសនៅអធិការដ្ឋាននគបាលដែលអ្នកកាន់កាប់ដ្រូនកំពុងរស់នៅ។ ការចេញប្រកាសរួមរបស់ក្រសួងមហាផ្ទៃ ក្រសួងកសិកម្ម និងរដ្ឋលេខាធិការដ្ឋានអាកាសចរណ៍ស៊ីវិលយ៉ាងដូច្នេះ ធ្វើឡើងបន្ទាប់ពី លោក ហ៊ុន សែន អះអាងថា មានករណីប៉ុនប៉ងប្រើប្រាស់ដ្រូនវាយប្រហារចូលភូមិគ្រឹះរបស់លោក។
រដ្ឋាភិបាលកម្ពុជាប្រាប់ឲ្យអ្នកប្រើប្រាស់(ដ្រូន)ទៅធ្វើស្វ័យប្រកាស
យោងតាមប្រកាសអន្តរក្រសួងទាំង៣ ដដែលនេះ ក្រៅពីការតម្រូវឲ្យអ្នកប្រើប្រាស់អាកាសយានគ្មានមនុស្សបើក(ដ្រូន)ត្រូវទៅធ្វើស្វ័យប្រកាសនោះ គឺប្រកាសអន្តរក្រសួងក៏បានកំណត់ទីតាំងហាមឃាត់មួយចំនួនមិនឲ្យមានការបង្ហោះដ្រូនផងដែរ។
ទីតាំងសំខាន់ៗទាំងនោះ រួមមាន ព្រះបរមរាជវាំង ស្ថាប័នរដ្ឋ មន្ទីរពេទ្យសាលារៀន និងផ្សារ ពហុកីឡាដ្ឋាន តំបន់រមណីយដ្ឋានអង្គរ និងបរិវេណប្រាសាទ លំនៅឋានប្រធានព្រឹទ្ធសភា ប្រធានរដ្ឋសភា និងនាយករដ្ឋមន្ត្រី និវេសដ្ឋានទូត ស្ថានទូត អគ្គកុងស៊ុល និងអង្គការអន្តរជាតិ។ លើសពីនេះក៏ត្រូវបានហាមឃាត់ការបង្ហោះដ្រូនផងដែរ នៅមូលដ្ឋានយោធា និងមូលដ្ឋាននគរបាលជាតិ ទីតាំងឬឃ្លាំងផ្ទុកសារធាតុងាយផ្ទុះឆាបឆេះ ស្ថានីយវិទ្យុ ទូរទស្សន៍ រោងចក្រចម្រាញ់ប្រេង ឧស្ម័ន រ៉ែ និងអគ្គិសនី។
តែនៅក្នុងសេចក្តីប្រកាសដដែលនេះ ក៏បានបញ្ជាក់ផងដែរថា ការតម្រូវឲ្យទៅធ្វើស្វ័យប្រកាសនេះ គឺសម្រាប់តែអ្នកប្រើប្រាស់ដ្រូនដែលអាចផ្ទុកទម្ងន់លើសពី២គីឡូក្រាមឡើងទៅ រាប់ទាំងដ្រូនកសិកម្ម និងបានបញ្ជាឲ្យមន្ទីរកសិកម្មនីមួយៗត្រូវគ្រប់គ្រងទិន្នន័យដ្រូនកសិកម្មឲ្យបានច្បាស់លាស់។
នៅលើហ្វេសប៊ុកផ្លូវការ នៅថ្ងៃទី១៣ ខែកុម្ភៈ ឆ្នាំ២០២៥ លោក ហ៊ុន សែន ប្រធានព្រឹទ្ធសភា បានប្រកាសកំចាត់ចោលនូវរាល់បុគ្គលទាំងឡាយណាដែលចង់សម្លាប់លោក និងគ្រួសាររបស់លោក ដោយភ្ជាប់ជាមួយនូវឃ្លីបសំឡេងចំនួន២ ដែលបង្ហាញពីការជជែកគ្នារបស់ក្រុមមួយទាក់ទងទៅនឹងគម្រោងធ្វើឃាត លោក ហ៊ុន សែន និងក្រុមគ្រួសារដោយប្រើដ្រូន។
លោក ហ៊ុន សែន បានអះអាងថា លោកដឹងពីមេធំរបស់អ្នកប៉ុនប៉ងធ្វើឃាតលោកជាអ្នកណា ហើយនៅទីណា។ តែលោកមិនទាន់បញ្ចេញនៅពេលនេះទេ ដោយលោកត្រូវកំចាត់ពួកជ្រុលនិយម និងហិង្សានិយមឲ្យអស់សិន។
កាលពីចុងឆ្នាំ២០១៧ កម្ពុជាបានចាប់ខ្លួនផលិតករខ្សែភាពយន្តជនជាតិអូស្ត្រាលីលោក James Ricketson យកទៅកាត់ទោស៦ឆ្នាំ ពីបទ«ចារកម្ម» បន្ទាប់ពីជនបរទេសដែលសកម្មជាមួយគណបក្សប្រឆាំងរូបនេះ បានបង្ហោះដ្រូន នៅទីតាំងមួយចំនួនក្នុងរាជធានីភ្នំពេញ។ តែអង្គការអន្តរជាតិផ្នែកសិទ្ធិមនុស្សបានហៅការកាត់ទោសនេះថា មានចរិតនយោបាយ៕