កម្ពុជា
02/03/2025 – 08:30
ដោយ៖ អ៊ឹង ប៊ុនថន
RFI
សមត្ថកិច្ចខេត្តព្រះសីហនុ បានអះអាងថា មានជនសង្ស័យមួយចំនួនត្រូវបានចាប់ខ្លួន និងបានបញ្ជូនទៅកាន់តុលាការខេត្តជាប់មាត់សមុទ្រមួយនេះ បន្ទាប់ពីមានករណីបាញ់ និងដុតផ្ទះពលរដ្ឋ នៅភូមិពូធឿង សង្កាត់បិតត្រាំង ខេត្តព្រះសីហនុ កាលពីថ្ងៃទី២១ ខែកុម្ភ: ឆ្នាំ២០២៥។ តែពលរដ្ឋម្នាក់បានស្លាប់នៅពេលបញ្ជូនទៅដល់មន្ទីរពេទ្យព្រះកេតុមាលា ក្នុងរាជធានីភ្នំពេញ បានរយៈពេលជិតមួយសប្ដាហ៍។
ជនសង្ស័យ៦នាក់ត្រូវបានចាប់ខ្លួន ក្នុងករណីបាញ់ និងដុតផ្ទះពលរដ្ឋនៅខេត្តព្រះសីហនុ
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ ប្រាប់វិទ្យុបារាំងអន្តរជាតិRFI នៅថ្ងៃទី២ ខែមីនាថា ករណីបាញ់ និងដុតផ្ទះពលរដ្ឋនេះ កើតឡើងដោយសារតែជម្លោះដីធ្លី។ តែលោកបានបញ្ជាក់ថា មកទល់ពេលនេះមានជនសង្ស័យមួយចំនួនត្រូវបានចាប់ខ្លួន និងមួយចំនួនត្រូវបានបញ្ជូនទៅកាន់សាលាដំបូងខេត្តព្រះសីហនុ ដើម្បីបន្តនីតិវិធីតាមច្បាប់។
បើតាមប្រពន្ធជនរងគ្រោះប្តីរបស់គាត់ ឈ្មោះ សឿង សុភក្រ័្ត បានស្លាប់ កាលពីរសៀលថ្ងៃទី២៨ ខែកុម្ភ: ឆ្នាំ២០២៥ ក្រោយពេលមានជនមិនស្គាល់អត្តសញ្ញាណមួយក្រុម សម្រុកចូលមកដុតផ្ទះពលរដ្ឋ ហើយប្រើកាំបិតកាប់ចំត្រង់ក្បាលប្តីលោកស្រីខាងស្ដាំ។
ក្រុមគ្រួសារជនរងគ្រោះបានអះអាងថា មុនថ្ងៃកើតហេតុ ប្ដីរបស់គាត់ត្រូវបានជនម្នាក់ឈ្មោះ ផល គឹមវីរៈ ប្ដឹងអំពីបទចូលកាន់កាប់លើដីរបស់គេ និងត្រូវចូលទៅបំភ្លឺនៅស្នងការដ្ឋាននគរបាលខេត្តព្រះសីហនុ នៅថ្ងៃទី២០ ខែកុម្ភៈ តែប្ដីគាត់មិនបានទៅបំភ្លឺទេ ដោយអ្នកស្រីអះអាងថា ដីដែលគាត់អាស្រ័យផល គឺមានការទទួលស្គាល់ដោយអាជ្ញាធរភូមិ និងឃុំ។
ចំណែកស្នងការដ្ឋាននគរបាលខេត្តព្រះសីហនុ លោក ស រដ្ឋា បញ្ជាក់ថា សមត្ថកិច្ចឃាត់ខ្លួនជនសង្ស័យបានចំនួន ៦នាក់ និងកំពុងបន្តនីតិវិស្រាវជ្រាវអ្នកពាក់ព័ន្ធមួយចំនួនទៀត។
សូមបញ្ជាក់ថា កាលពីយប់ថ្ងៃទី២១ ខែកុម្ភៈ ឆ្នាំ២០២៥ ពលរដ្ឋអះអាងថា មានមនុស្សប្រមាណ ២០នាក់ បានចូលទៅបិទភ្លើងក្នុងភូមិពូធឿន ហើយបាញ់រះ និងដុតផ្ទះសម្បែងពលរដ្ឋ៤ខ្នង ដែលបណ្ដាលឱ្យពលរដ្ឋ ២នាក់រងរបួសធ្ងន់ និងស្រាល។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ប្រចាំខេត្តព្រះសីហនុ បានហៅករណីដុតផ្ទះសម្បែង និងកាប់សម្លាប់ពលរដ្ឋបែបនេះ គឺជាទង្វើអមនុស្សធម៌ និងជាការរំលោភសិទ្ធិមនុស្សធ្ងន់ធ្ងរ ដែលត្រូវតែចាប់ជនល្មើសយកមកផ្ដន្ទាទោសតាមផ្លូវច្បាប់ដើម្បីកុំឱ្យមាននិទ្ទណ្ឌភាព៕