កម្ពុជា
31/03/2025 – 09:37
ដោយ៖ អ៊ឹង ប៊ុនថន
RFI

មន្ទីរ​ប្រឆាំង​គ្រឿង​ញៀន​បាន​បង្ក្រាប​ករណី​ជួញ​ដូរ​គ្រឿង​ញៀន​ដែល​ប្រព្រឹត្ត​ដោយ​ជន​ជាតិ​ចិន​៣​នាក់ និង​ជន​ជាតិ​ភូមា​២នាក់​ដោយ​រឹប​អូស​បាន​គ្រឿង​ញៀន​ជាង​១០០​គីឡូ​ក្រាម​កាល​ពី​ថ្ងៃទី​២៦ ខែ​មីនា​ ឆ្នាំ២០២៥​។ ប្រតិបត្តិការ​បង្ក្រាប​គ្រឿង​ញៀន​នេះ គឺ​ជា​ការ​រួម​សហការ​រវាង​កម្លាំង​ជំនាញ​នៃ​ស្នងការ​ដ្ឋាននគរបាល​រាជ​ធានី​ភ្នំពេញ និង​ខេត្ត​ព្រះសីហនុ​។​ ចំណែក​គ្រឿង​ញៀន​ទម្ងន់ ១០១​គីឡូក្រាម​ដែល​រឹប​អូស​បាន​មាន​ប្រភព​មក​ពី​តំបន់​ត្រីកោណមាស​ដែល​គ្រោង​ដឹក​បន្ត​ទៅប្រទេស​ទី​៣ តាម​លម្ហសមុទ្រ​កម្ពុជា​។

ឃាត់ខ្លួនជនបរទេស ៥នាក់ដោយរឹបអូសបានគ្រឿងញៀនជាង ១០០គីឡូក្រាម

តាមសមត្ថកិច្ចប្រឆាំងគ្រឿងញៀន បច្ចុប្បន្ន ជនសង្ស័យទាំង៥នាក់ និងវត្ថុតាងដែលសមត្ថកិច្ចជំនាញរឹបអូសបានត្រូវកសាងសំណុំរឿងបញ្ជូនទៅកាន់អយ្យការអមសាលាដំបូងរាជធានីភ្នំពេញដើម្បីចាត់ការតាមនីតិវិធី។ ក្រៅពីករណីមួយនេះ មន្ទីរប្រឆាំងគ្រឿងញៀនក៏បានឃាត់ខ្លួនជនល្មើស ២នាក់ និងរឹបអូសបានគ្រឿងញៀនជិត៤គីឡូក្រាមថែមទៀតនៅថ្ងៃទី២៨ ខែមីនា ឆ្នាំ២០២៥ នៅតាមបណ្តោយផ្លូវបុរីអង្គរ សង្កាត់ទួលសង្កែទី២ ខណ្ឌឬស្សីកែវ រាជធានីភ្នំពេញ។ ជនល្មើសទាំង ២នាក់ដែលជាជនជាតិខ្មែរមានម្នាក់ អាយុ ៤២ឆ្នាំ និងម្នាក់ទៀត អាយុ ៤៤ឆ្នាំ។

ដោយឡែកកាលពីថ្ងៃទី ២៩ ខែមីនា ឆ្នាំ២០២៥ កម្លាំងប្រឆាំងគ្រឿងញៀននៃអធិការដ្ឋានស្រុកសំរោងទងខេត្តកំពង់ស្ពឺបានធ្វើការឃាត់ខ្លួនជនសង្ស័យចំនួន ០២នាក់ ទៅតាមដីកាបង្គាប់ឲ្យចាប់ខ្លួនរបស់ចៅក្រមស៊ើបសួរ។ ជនសង្ស័យទាំង ២នាក់បានជាប់ចោទពីបទជួញដូរ និងរក្សាទុកសារធាតុញៀនដោយខុសច្បាប់។ នៅក្នុងកិច្ចប្រតិបត្តិការនោះ សមត្ថកិច្ចបានដកហូតវត្ថុតាងសង្ស័យជាគ្រឿងញៀនចំនួន ៤កញ្ចប់ដែលមានទម្ងន់ ២៥៤,៩៤ក្រាម និងបានកសាងសំណុំរឿងបញ្ជូនទៅតុលាការ។

គួររម្លឹកថា របាយការណ៍របស់អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀនចេញផ្សាយកាលពីថ្ងៃទី១២ ខែមីនា ឆ្នាំ២០២៥ បានបង្ហាញថា គ្រឿងញៀនដែលរឹបអូសបានកាលពីឆ្នាំ២០២៤ មានជិត ១៥តោន។ ចំនួននេះបានកើនឡើង ៤ដង បើធៀបនឹងឆ្នាំ២០២៣។ តាមរបាយការណ៍ដដែល គ្រឿងញៀនទាំងនោះ ភាគច្រើន មកពីព្រំដែនឡាវ ៤៥% និង ព្រំដែនថៃ ៣៩%៕