កម្ពុជា
កំពង់ផែរាម
05/04/2025 – 09:23
ដោយ៖ អ៊ឹង ប៊ុនថន
RFI

មូលដ្ឋាន​កង​ទ័ព​ជើង​ទឹក​សមុទ្រ​រាម​របស់​កម្ពុជា​ ដែល​ត្រូវ​បាន​សាង​សង់​ឡើង​វិញ​នៅ​ក្រោម​ជំនួយ​របស់​ចិន ត្រូវ​បាន​សម្ពោធ​ជាផ្លូវការ​នៅ​ថ្ងៃទី​៥​ខែ​មេសា​ឆ្នាំ​២០២៥​។​ ក្នុង​ពិធី​សម្ពោធ​នេះ ប្រមុខ​រដ្ឋាភិបាល​កម្ពុជា​ លោក ហ៊ុន ម៉ាណែត បាន​ប្រកាស​ស្វា​គមន៍​ដល់​នាវា​របស់​កងទ័ព​បរទេស​ឲ្យ​ចូល​សំចត​នៅទី​នោះ​បាន​ដោយ​គ្មាន​ការ​លាក់​បាំង​អ្វី​នោះឡើយ​។​ តែ​នាយក​រដ្ឋ​មន្ត្រី​កម្ពុជា​បាន​បញ្ជាក់ថា កម្ពុជា​មិន​ត្រូវ​ការ​ឲ្យ​កងទ័ព​បរទេស​ដាក់​មូលដ្ឋាន​នៅ​លើ​ទឹក​ដី​កម្ពុជា​នោះទេ​។

កម្ពុជាស្វាគមន៍ការចូលចតរបស់នាវាបរទេសនៅមូលដ្ឋានសមុទ្ររាម បន្ទាប់ពីសម្ពោធនៅថ្ងៃនេះ

អ្នកនាំពាក្យក្រសួងការពារជាតិកម្ពុជាបាន ថ្លែងនៅមុនពេល​សម្ពោធជាផ្លូវការថា តាមការគ្រោងទុក នាវាជប៉ុន ជានាវាដំបូងគេ ដែលនឹងចូលចតនៅឯកំពង់ផែរាម នៅដើមខែមេសាឆ្នាំ២០២៥។ អ្នកតាមដានភូមិសាស្ត្រនយោបាយ មើលឃើញថា ការអនុញ្ញាតឲ្យនាវាជប៉ុនចូលចតនៅកំពង់ផែរាម ក្រោយការធ្វើទំនើបកម្មអស់ពេលជាង៤ឆ្នាំក្រោមជំនួយរបស់ចិន ជាការបង្ហាញប្រាប់ទៅក្រសែភ្នែកអន្តរជាតិថា កម្ពុជាតែងតែបើកចំហជាមួយបរទេសទាំងអស់ មិនមែនដូចអ្វីដែលអាមេរិកធ្លាប់ចោទប្រកាន់ថា កំពង់ផែរាមជាមូលដ្ឋានទ័ពជើងទឹកចិននោះឡើយ។

ទោះជាយ៉ាងណា ពីក្រសែភ្នែក​របស់ខ្លួន អ្នកជំនាញការអាមេរិកធ្លាប់បានអះអាងថា វត្តមានកងទ័ពចិនបានចាប់ផ្តើមជាផ្លូវការលើទឹកដីកម្ពុជាតាំងពីអំឡុងខែធ្នូ​ឆ្នាំ​២០២៣តាម​រយៈការ​ចូល​ចត​របស់​នាវា២គ្រឿង។ នេះជាអ្វី​ដែល​​សហរដ្ឋអាមេរិក​អះអាងតាមរូបភាពពីប្រព័ន្ធផ្កាយរណបរបស់មជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិ និងដែលត្រូវបានចុះផ្សាយដោយទស្សនាវដ្តី Newsweek របស់សហរដ្ឋអាមេរិកនៅថ្ងៃទី២៦ ខែមេសា ឆ្នាំ​២០២៤៕