ដោយ ហ៊ុំ ចំរើន
2025.05.25
RFA
អាជ្ញាធរខ្មែរបានប្រកាសតាមចាប់ខ្លួនស្ដ្រីម្នាក់ ដែលអះអាងថាជាម្ចាស់គណនីហ្វេសប៊ុកឈ្មោះស្ត្រី Overseas ស្ទឹងស្ងាត់ ម៉ៅ បង និង Chhin Chou ដែលបានបង្ហោះសាររិះគន់រដ្ឋាភិបាលថា បានបរាជ័យក្នុងការចរចាបញ្ហាពន្ធជាមួយសហរដ្ឋអាមេរិក។
អគ្គស្នងការដ្ឋាននគរបាលជាតិបានអះអាងនៅក្នុងលិខិតចុះថ្ងៃទី២៣ឧសភាថា ម្ចាស់គណនីហ្វេសប៊ុកនោះ ជាស្ត្រីឈ្មោះ ជូ ឈីន មានស្រុកកំណើតនៅខេត្តបាត់ដំបង គឺជាក្រុមគណបក្សប្រឆាំងដែលកំពុងភៀសខ្លួននៅប្រទេសថៃ។ អគ្គស្នងការដ្ឋាននគរបាលជាតិបានចោទប្រកាន់ម្ចាស់ហ្វេសប៊ុករូបនេះថា បានបង្ហោះសារញុះញង់ បំភ្លៃខុសពីការពិតក្នុងបំណងផ្ដួលរំលំរដ្ឋាភិបាល។ ប៉ូលិសខ្មែរថា នឹងរៀបចំឯកសារ ហើយនឹងសហការជាមួយអាជ្ញាធរថៃដើម្បីតាមចាប់ស្ត្រីឈ្មោះ ជូ ឈីន បញ្ជូនមកផ្ដន្ទាទោសនៅកម្ពុជាវិញ។
ចំណាត់របស់ប៉ូលិសខ្មែរនេះធ្វើឡើងបន្ទាប់ពីហ្វេសាប៊ុកឈ្មោះស្ត្រី Overseas បានបង្ហោះសារសំឡេងអមដោយរូបថតរដ្ឋមន្ត្រីក្រសួងពាណិជ្ជកម្ម អ្នកស្រី ចម និម្មល និងឧបនាយករដ្ឋមន្ត្រី លោក ស៊ុន ចាន់ថុល ថា ទៅចរចាបញ្ហាពន្ធជាមួយសហរដ្ឋអាមេរិកជុំទីមួយបានបរាជ័យ។ ហ្វេសប៊ុកដដែលបន្ថែមថា ការចរចាជុំទី២ នឹងបរាជ័យដូចលើកដំបូងដែរ ដោយសារតែរដ្ឋាភិបាលលោក ហ៊ុន ម៉ាណែត បានរំលោភសិទ្ធិមនុស្ស និងដើរចាកឆ្ងាយពីគន្លងប្រជាធិបតេយ្យ។
ទាល់តែយើងធ្វើតាមគេបានគេព្រម ទីមួយគេឱ្យយើងគោរពសិទ្ធិមនុស្ស ដោះលែងអ្នកទោសនយោបាយ ដោះលែងមេបក្សប្រឆាំង លោក កឹម សុខា កញ្ញា សេង ធារី ហើយដោះលែងអ្នកទោសបរិស្ថាន អ្នកទោសដីធ្លី បញ្ឈប់អំពើខុសច្បាប់នៅកម្ពុជា។ ហើយត្រូវបោះឆ្នោតដោយសេរី យុត្តិធម៌ បើមេដឹកកម្ពុជាធ្វើអត់បាន គឺការចរចាលើកទី២ក៏មិនអាចទទួលបានជោគជ័យដែរ។— សារសំឡេងនៅក្នុងហ្វេសប៊ុកស្ដ្រី Overseas
ជុំវិញបញ្ហានេះប្រធានសមាគមការពារសិទ្ធិមនុស្សអាដហុក (Adhoc) លោក នី សុខា បានប្រាប់វិទ្យុអាស៊ីសេរីថា ករណីនេះ ពុំមែនជាអំពើខុសច្បាប់ឡើយ ពីព្រោះការលើកឡើងរបស់ម្ចាស់ហ្វេសប៊ុកនេះ គឺជាសិទ្ធិសេរីភាពបញ្ចេញមតិរបស់ពលរដ្ឋដោយស្របតាមរដ្ឋធម្មនុញ្ញ។
ទាំងច្បាប់ជាតិច្បាស់អន្តរជាតិជាពិសេសក្នុងរដ្ឋធម្មនុញ្ញដែលនិយាយអំពីប្រជាពលរដ្ឋខ្មែរមានសិទ្ធិសេរីភាពនៅក្នុងការជួបជុំសម្ដែងមតិអីជាដើម។អីចឹងសម្រាប់ខ្ញុំ គួរតែមានការបែងចែកឱ្យបានច្បាស់លាស់រវាងបទល្មើសហើយនឹងសេរីភាពក្នុងការសម្ដែងមតិស្របច្បាប់បាទ។— លោក នី សុខា
វិទ្យុអាស៊ីសេរីមិនអាចទាក់ទងម្ចាស់គណនីហ្វេសប៊ុក ឈ្មោះ ជូ ឈីន ដើម្បីសាកសួរជុំវិញចំណាត់ការរបស់អគ្គស្នងការដ្ឋាននគរបាលជាតិនេះបានទេនៅថ្ងៃទី២៣ឧសភា ដោយស្ត្រីរូបនេះប្រាប់ថា នាងកំពុងរកទីកន្លែងមានសុវត្ថិភាព។
របាយការណ៍របស់អង្គការឃ្លាំមើលសិទ្ធិមនុស្សអន្តរជាតិ (Human Rights Watch) ឱ្យដឹងថា កាលពីឆ្នាំ២០២៤យ៉ាងហោចណាស់មានមនុស្សចំនួន ៩៤ នាក់ត្រូវបានអាជ្ញាធរចាប់ខ្លួន ដោយចោទប្រកាន់ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងក្បត់ជាតិ» ដោយសារតែការរិះគន់ពីភាពអសកម្មរបស់រដ្ឋាភិបាល ក្នុងនោះមនុស្ស៥៩នាក់ត្រូវបានឃុំខ្លួនដោយខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។