កម្ពុជា
07/06/2025 – 10:54
ដោយ៖ អ៊ឹង ប៊ុនថន
RFI
ចាប់ពីថ្ងៃទី០៧ ខែមិថុនា ឆ្នាំ២០២៥ តទៅ ច្រកតំបន់ និងច្រករបៀង រវាងព្រំដែនថៃ និងកម្ពុជា ត្រូវបានបិទជាបណ្ដោះអាសន្ន ដោយឯកតោភាគី ដើម្បីរង់ចាំការចរចា ពាក់ព័ន្ធករណីវិវាទព្រំដែនគោករវាងថៃនិងកម្ពុជា។ នេះជាការបញ្ជាក់នៅក្នុងលិខិតជូនដំណឹង របស់ស្ថានអគ្គកុងស៊ុលកម្ពុជា ប្រចាំខេត្តស្រះកែវ បន្ទាប់ពីបានទទួលព័ត៌មានពីយោធាថៃ ដែលប្រចាំការនៅតំបន់ព្រំដែន ខេត្តស្រះកែវ។
ថៃប្រកាសជាឯកតោភាគី បិទច្រករបៀងមួយចំនួនជាមួយកម្ពុជា
យោងតាមលិខិតជូនដំណឹង របស់ស្ថានអគ្គកុងស៊ុលកម្ពុជា នាព្រឹកថ្ងៃទី០៧ ខែមិថុនា ការដែលថៃសម្រេចជាឯកតោភាគី បិទច្រកតំបន់ និងច្រករបៀង រវាងប្រទេសទាំងពីរ ជាបណ្ដោះអាសន្ន ដោយសារតែភាគីកម្ពុជាបានបដិសេធ មិនព្រមចរចា ៤ចំណុច គឺតំបន់ប្រាសាទតាមាន់តូច តាមាន់ធំ តាក្របី និងតំបន់មុំបី នៅ ក្នុងកិច្ចប្រជុំពេញអង្គគណៈកម្មាធិការចម្រុះព្រំដែន (JBC) ដែលនឹងធ្វើនៅថ្ងៃទី១៤ ខែមិថុនា ឆ្នាំ ២០២៥។
ចំណែក សារព័ត៌មាន Thai Enquirer បានរាយការណ៍នៅថ្ងៃទី៧ មិថុនានេះដែរថា អគ្គមេបញ្ជាការកងទ័ពជើងគោកថៃ Phana Klaewplodthuk បានចុះហត្ថលេខាលើបទបញ្ជាមួយដោយអនុញ្ញាតឱ្យមេបញ្ជាការកងទ័ពជើងគោកប្រចាំនៅ Burapha និង Suranaree គ្រប់គ្រងការបើក និងបិទចំណុចត្រួតពិនិត្យព្រំដែនទាំងអស់នៅជាប់កម្ពុជា។
សារព័ត៌មានថៃដដែល បានស្រង់សំដីអ្នកនាំពាក្យកងទ័ពជើងគោកថៃគឺឧត្តមសេនីយ៍ Winthai មកថា ទោះបីជាថៃខិតខំប្រឹងប្រែងបន្ធូរភាពតានតឹងតាមមធ្យោបាយសន្តិភាពក៏ដោយ ក៏កម្ពុជាបានបន្តពង្រឹងទ័ព និងបង្កើតមូលដ្ឋានកងទ័ពនៅជាប់ព្រំដែន។ មេទ័ពថៃអះអាងថា វិធានការថ្មីរបស់ខ្លួនតាមរយៈការបិទច្រករបៀងតាមព្រំដែន គឺមានគោលបំណងការពារអធិបតេយ្យភាពថៃ និងរក្សាសណ្តាប់ធ្នាប់។
ជាការកត់សំគាល់ ភាពតានតឹងនៅតាមព្រំដែននេះ កើតឡើងបន្ទាប់ពីជំនួបទល់មុខគ្នានៃប្រមុខកងទ័ពប្រទេសទាំងពីរ ដែលភាគីថៃមាន លោក ភូមិថាម វីឆាយ៉ាឆៃ រដ្ឋមន្ត្រីការពារជាតិថៃ និងលោក ទៀ សីហា រដ្ឋមន្ត្រីការពារជាតិកម្ពុជា។ ក្នុងជំនួបថ្ងៃទី៥ មិថុនា ភាគីថៃបានស្នើ ឲ្យកម្ពុជាដកកងទ័ពចេញពីទីតាំងឈរជើងនៅតំបន់មុំបី ជាទីដែលមានការផ្ទុះអាវុធកាលពីថ្ងៃទី២៨ឧសភាសម្លាប់ទាហានកម្ពុជាម្នាក់។ តែការស្នើនេះ ត្រូវបានប្រមុខការពារជាតិកម្ពុជា ទាត់ចោល និងបានអះអាងថា ទីតាំងនោះ គឺស្ថិតក្នុងទឹកដីកម្ពុជា ដែលកងទ័ពកម្ពុជាបានឈរជើងតាំងពីយូរណាស់មកហើយ។ នេះបើតាមក្រសួងការពារជាតិកម្ពុជា។
យ៉ាងណាក៏ដោយ នៅថ្ងៃសៅរ៍ទី៧ ខែមិថុនានេះ រដ្ឋមន្ត្រីការពារជាតិថៃ Phumtham Wechayachai បានចេញសេចក្តីថ្លែងការណ៍មួយថា បន្ទាប់ពីមានកិច្ចប្រជុំរវាងប្រមុខកងទ័ពកម្ពុជា និងថៃ កាលពីថ្ងៃទី៥ មិថុនា ការពង្រឹងវត្តមានយោធា ត្រូវបានបង្កភាពតានតឹងនៅតាមព្រំដែន។ ប្រមុខការពារជាតិថៃ បានអះអាងថារដ្ឋាភិបាលថៃបានដាក់ចេញនូវវិធានការបន្ថែម និងពង្រឹងជំហរយោធារបស់ខ្លួនទៅតាមភាពចាំបាច់។
ជាមួយនឹងការបដិសេធយុត្តាធិការរបស់តុលាការយុត្តិធម៌អន្តរជាតិ (ICJ) ភាគីថៃបានបញ្ជាក់ឡើងវិញនូវការប្តេជ្ញាចិត្តក្នុងការដោះស្រាយបញ្ហាព្រំដែនតាមរយៈការចរចាទ្វេភាគី ទៅតាមអនុស្សរណៈនៃការយោគយល់គ្នា (MOU) ឆ្នាំ ២០០០។
ពីខេត្តរតនគិរី នៅថ្ងៃទី៧ មិថុនានេះ លោក ហ៊ុន ម៉ាណែត នាយករដ្ឋមន្រ្តីកម្ពុជា បានបញ្ជាក់ឡើងវិញថា កម្ពុជាត្រូវតែលើកយកបញ្ហានៅតំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី ប្ដឹងទៅតុលាការយុត្តិធម៌អន្តរជាតិ (ICJ) ដើម្បីរំលត់ភាពតានតឹងរវាងថៃ-កម្ពុជា ចៀសវាងកុំឱ្យបន្តមានភាពស្រពិចស្រពិល និងបន្តជាបញ្ហារ៉ាំរ៉ៃ ដល់អ្នកជំនាន់ក្រោយ៕