កម្ពុជា
កម្ពុជា-ថៃ
23/06/2025 – 11:34
ដោយ៖ អ៊ឹង ប៊ុនថន
RFI
លោកនាយករដ្ឋមន្ត្រី ហ៊ុន ម៉ាណែត បានថ្លែងនៅថ្ងៃទី២៣ខែមិថុនានេះថា កម្ពុជាបានបាញ់ទម្លាក់ «ដ្រូនស៊ើបការណ៍» របស់ភាគីថៃធ្លាក់អស់មួយចំនួន ដោយសារតែហោះរំលោភលើដែនអធិបតេយ្យភាពរបស់កម្ពុជា។ នៅក្នុងពិធីបិទកិច្ចប្រជុំគណៈកម្មាធិការកណ្តាលសហភាពសហព័ន្ធយុវជនកម្ពុជាដែលធ្វើឡើងនៅខេត្តសៀមរាប នាថ្ងៃចន្ទនេះ ប្រមុខរដ្ឋាភិបាលកម្ពុជា បានអះអាងថា ការដែលកម្ពុជាសម្រេចចិត្តបាញ់ទម្លាក់ដ្រូនរបស់ភាគីថៃ គឺដោយសារតែថៃមិនទទួលស្គាល់ទង្វើរបស់ខ្លួន នៅពេលដែលកម្ពុជាដាក់លិខិតតវ៉ាទៅថៃករណីបង្ហោះដ្រូននាពេលកន្លងមក។
លោក ហ៊ុន ម៉ាណែត ថាកម្ពុជាបាញ់ទម្លាក់ដ្រូនរបស់ថៃ ដោយសារថៃមិនស្តាប់ការតវ៉ាតាមលិខិត
ក្រៅពីករណីបាញ់ទម្លាក់ដ្រូនដែលហោះរំលោភចូលទឹកដីកម្ពុជា លោក ហ៊ុន ម៉ាណែត បានអះអាងថា កាលពីប៉ុន្មានថ្ងៃមុននេះ ទាហានកម្ពុជាក៏ប្រទះឃើញកាំភ្លើងយន្តមួយដើមរបស់ទាហានថៃដែលទម្លាក់ ចោល នៅពេលទាហានកម្ពុជាដេញឲ្យដកទ័ពថយទៅវិញ។ បើតាមប្រមុខរដ្ឋាភិបាលកម្ពុជា កាំភ្លើងមួយដើមនោះ ត្រូវបានទាហានកម្ពុជារើសយកមករក្សាទុក និងហៅភាគីថៃឲ្យមកទទួលយកទៅវិញ។
តាមការរាយការណ៍ពីទាហានកម្ពុជា គឺទាហានថៃតែងតែលួចបង្ហោះដ្រូនឈ្លបយកការណ៍នៅតាមព្រំដែន ដោយហោះរំលោភចូលអធិបតេយ្យភាពកម្ពុជា។ ជាក់ស្តែង នៅចន្លោះម៉ោង១១ ដល់ម៉ោង២យប់ ថ្ងៃទី១៨ ខែមិថុនា កងទ័ពកម្ពុជា បានបាញ់ទៅលើអាកាសជាច្រើនដង សង្ស័យមានដ្រូនយោធាថៃបំពានចូលដែនអធិបតេយ្យភាពកម្ពុជានៅខេត្តពោធិ៍សាត់។ ចំណែកនៅរសៀលថ្ងៃទី២ ខែមិថុនា ឆ្នាំ២០២៥ កងទ័ពរបស់កម្ពុជាដែលកំពុងឈរជើងនៅតំបន់ជួរមុខ បានចាប់ដ្រូនមួយគ្រឿងដែលហោះចូលមកស៊ើបការណ៍នៅតាមព្រំដែនលើទឹកដីក្នុងខេត្តព្រះវិហារ៕