សៅរ៍ 28 កក្តដា 2012
ទស្សនាវដ្តីសារព័ត៌មានសេរី
កាលពីរសៀលថ្ងៃទី២៧ កក្កដា ម្សិលមិញនេះ ត្រាគណបក្សនរោត្តមរណប្ញទ្ធិ ត្រូវបានប្រគល់ឲ្យលោក សៅ រ៉ានី អគ្គលេខាធិការគណបក្សនេះហើយ។
ស្លាកសញ្ញាគណបក្ស នរោត្តម រណប្ញទ្ធិ
តាមមន្រ្តីគណបក្សនរោត្តមរណប្ញទ្ធិ ការប្រគល់ត្រាទៅឲ្យលោក សៅ រ៉ានី នេះ បានធ្វើឡើងនៅវេលាម៉ោង៥រសៀលថ្ងៃទី២៧ ខែកក្កដា ឆ្នាំ២០១២ ដោយលោក គង់ សំសារ៉េត ព្រះរាជអាជ្ញារងតុលាការក្រុងភ្នំពេញ ដោយមានទាំងអានដីកាសម្រេចការពាររបស់តុលាការក្រុងភ្នំពេញចុះថ្ងៃទី២៥ ខែកក្កដា ឆ្នាំ២០១២ ដល់លោក ឈឹម សៀកឡេង ប្រធានស្តីទីគណបក្សនរោត្តមរណប្ញទ្ធិ និងលោក នរ៉ាណាប្ញទ្ធិ អានន្ទដាយ៉ាត នាយកខុទ្ទកាល័យសម្តេចក្រុមព្រះស្តាប់ទៀតផង។
សូមរំលឹកថា កាលពីថ្ងៃទី២៥ ខែកក្កដា តុលាការក្រុងភ្នំពេញបានចេញដីកាសម្រេចការពារ តាមសំណើលោក សៅ រ៉ានី អគ្គលេខាធិការគណបក្សនរោត្តមរណប្ញទ្ធិ ដោយបដិសេធចោលនូវលិខិតរបស់ព្រះអង្គម្ចាស់ នរោត្តម រណប្ញទ្ធិ ដែលបញ្ចប់តំណែងលោក សៅ រ៉ានី និងមន្រ្តីទាំង៥នាក់ពីគណបក្ស ហើយរក្សាតួនាទីពួកគេឲ្យនៅជាបណ្តោះអាសន្ន ព្រមទាំងបញ្ជាឲ្យប្រគល់ត្រាគណបក្សនរោត្តមរណប្ញទ្ធិទៅឲ្យលោក សៅ រ៉ានី ដើម្បីគ្រប់គ្រងគណបក្សនរោត្តមរណប្ញទ្ធិ៕