ភ្នំពេញ: ភ្ញៀវទេសចរ ដែលចង់ធ្វើដំណើរកម្សាន្តទៅកាន់ខេត្តកំពង់ស្ពឺនោះ គេនឹងភ្នកដល់គោលដៅទីមួយ នឹងដើមគេ បើចេញដំណើរពីភ្នំពេញ នោះគឺរមណីយដ្ឋានអំពែភ្នំ ដែលត្រូវចូលទៅបន្ធូរអារម្មណ៍ ជាមួយនឹងខ្យល់អាកាសបរិសុទ្ធ មិនចេះជិនណាយ។
ថ្ងៃទី 11 វិច្ឆិកា 2012
ដោយ: កូឡាប
CEN
រមណីយដ្ឋានអំពែភ្នំ ភ្ញៀវមកកម្សាន្ត ថយចុះ ដោយសារតែគ្មានការអភិវឌ្ឍថ្មីបន្ថែម និងស្ពានយោល កាន់តែចាស់
អ្នកអាចធ្វើដំណើរដោយរថយន្ត ឬម៉ូតូ តាមផ្លូវជាតិលេខ៤ ប្រើពេលមិនយូរប៉ុន្មាន ដែលមានចម្ងាយត្រឹមតែ ៤៨ គីឡូម៉ែត្រ ពីទីក្រុងភ្នំពេញ នោះអ្នកនឹងដល់រមណីយដ្ឋានអំពែភ្នំស្ថិតនៅខាងឆ្វេងដៃ បត់ចូលតាមផ្លូវកៅស៊ូប្រមាណជា ២គីឡូម៉ែត្រ នៅទីរួមខេត្តកំពង់ស្ពឺតែម្តង។
រមណីយដ្ឋាន ដែលសម្បូរទៅដោយសត្វស្វានេះ អ្នកអាចឈរលើស្ពានយោលសម្លឹងទៅទឹកស្ទឹង ដែលកំពុងហូរត្រដុសនឹងផ្ទាំងថ្មធំៗ ដើម្បីស្រូបយកខ្យល់ដ៏បរិសុទ្ធបន្ធូនូវអារម្មណ៍ស្មុគស្មាញទាំងឡាយ។
ប៉ុន្តែអ្វីដែលគួរសោកស្តាយជាខ្លាំងបំផុតនោះគឺ នៅរមណីយដ្ឋាននេះ សព្វថ្ងៃ ពុំមានអ្វីគួរឱ្យទាក់ទាញភ្ញៀវនោះឡើយ ក្រៅពីស្ពានយោល ដែលមានរាងទ្រុឌទ្រោម ដែលសាងសង់ជាច្រើនឆ្នាំមកហើយនោះ គ្មានការជួសជុលជាថ្មីឡើងវិញ ដែលអាចធ្វើប៉ះពាល់អារម្មណ៍ភ្ញៀវទេសចរ ដែលចង់ធ្វើដំណើរឆ្លងកាត់ស្ពានយោល ក្នុងការនឹកគិតពីសន្តិសុខសុវត្ថិភាព។
រមណីយដ្ឋានអំពែភ្នំ ដែលធ្លាប់មានឈ្មោះល្បី កាលពីទសវត្សឆ្នាំ១៩៨០នោះ ឥឡូវនេះភ្ញៀវទេសចរ មិនសូវជាចាប់អារម្មណ៍ច្រើនដូចកាលពីមុនឡើយ ដោយសារតែនៅទីនោះ សព្វថ្ងៃ ពុំមានការអភិវឌ្ឍអ្វីថ្មីបន្ថែម សម្រាប់ជាការទាក់ទាញនោះទេ។ របស់ចាស់ៗ និងសត្វស្វារត់ប្រសេចប្រសាច និងមានសត្វស្វា ដែលមានមាឌឌំៗ បានចុះពីលើដើមឈើ មកលួចឥវ៉ាន់ភ្ញៀវទៀតផង។
យ៉ាងណាក៏ដោយ អ្នកដែលធ្លាប់ទៅទស្សនារមណីយដ្ឋានអំពែភ្នំ កាលពីលើកមុន ហើយជាប់ចិត្ត ដិតអារម្មណ៍ បាននាំគ្នាទៅម្តងទៀត បែរស្រងាកចិត្តខុសពីអារម្មណ៍ ដែលធ្លាប់មាននោះ។ ពួកគេ បាននិយាយរិះគន់ថា ខាងមន្ទីរទេសចរណ៍ខេត្តកំពង់ស្ពឺ ហាក់ដូចជាមិនឃើញបង្កើតស្អីថ្មីមួយ ឬពីរបីថ្មីទេ គឺនៅចាស់ដដែល ហើយរបស់ចាស់ គឺកាន់តែចាស់ទៅទៀត ដូច្នេះសូមធ្វើដាំដើមឈើឱ្យបានច្រើន ធ្វើស្ពានយោលថ្មីឲ្យធំទូលាយ ទឹកស្ទឹងធ្វើឱ្យថ្លា កុំឱ្យមានកំប្លោក សំរាម ទាំងនេះ វាក៏ជាទាក់ទាញមួយដែរ ព្រោះវាមិនចាំបាច់ចំណាយទុនច្រើន។ ម្យ៉ាងភ្ញៀវដែលបានឃើញមានការរៀបចំបន្តិចម្តងៗ ក៏គេអបអរសាទរជាមួយដែរ ព្រោះចំណូលត្រូវបានគេមើលឃើញថា ត្រូវបានយកមកអភិវឌ្ឍន៍ នៅនឹងកន្លែងនេះផ្ទាល់ខ្លះ និងសម្រាប់បង់ចូលរដ្ឋខ្លះ។ គេធ្វើបែបនេះបាន ទើបភ្ញៀវចេះតែចង់នាំក្រុមគ្រួសារមកលេង ដោយមិនធុញទ្រាន់ផងដែរ។
ចំណែកអ្នកលក់ម្ហូបអាហារប្រចាំរមណីយដ្ឋានអំពែភ្នំ ដែលបច្ចុប្បន្ន មិនសូវសម្បូរភ្ញៀវ ដូចពីមុនទៀតទេ ពោលគឺមានរាល់ពេលសម្រាកថ្ងៃសៅរ៍ អាទិត្យ មានភ្ញៀវ ក្នុងស្រុក តែប្រមាណ ១០០ ទៅជាង ១០០នាក់ប៉ុណ្ណោះ ចូលមកកម្សាន្ត។ រីឯភ្ញៀវបរទេស មានចូលមកកម្សាន្តតិចតូចណាស់។
អ្នកលក់ដូរ បានបន្ថែមថា កាលពី២-៣ ឆ្នាំកន្លងមក មានភ្ញៀវក្នុងស្រុកមកលេងទីនេះ ប្រមាណរាប់ពាន់នាក់ ក្នុងមួយសប្តាហ៍។ តែឥឡូវនេះ មិនដូច្នេះទេ។ រីឯម្ហូបអាហារនៅអំពែភ្នំ មានតម្លៃសមរម្យ ហើយថែមទាំងមានម្ហូប សត្វស្រុក សត្វព្រៃ ដូចជា ទន្សាយ ក្តាន់ញ៉ែង ត្រកួត ជាដើម គឺភ្ញៀវអាចកុម្មង់បានតាមចំណង់ចំណូលចិត្ត គឺសេវារហ័សទាន់ចិត្តតែម្តង។
ភ្ញៀវក្នុងស្រុកដែលទៅកម្សាន្តនៅអំពែភ្នំ គឺភាគច្រើន គេនិយមកុម្ម៉ង់ ម្ហូបសត្វព្រៃ ដូចជា សម្លម្ជូរស្លឹកថ្នឹង សាច់ឈ្លួស និងឆាក្តៅ ឬសម្ល ម្ជូរក្តៅជ្រូកព្រៃ ជាដើម។ ក្រៅពីនេះ ភ្ញៀវចូលចិត្តផងដែរ ម្ហូបខ្មែរធម្មតាៗ ដូចជា ត្រីអណ្តែងអាំង ត្រីរ៉ស់ដុត ជាដើម។
រមណីយដ្ឋានវប្បធម៌ និងធម្មជាតិនេះ មានទីតាំងនៅភូមិតាំងទន្លេ និងភូមិអំពែភ្នំ ឃុំសុព័រទេព និងឃុំស្វាយក្រវាន់ ស្រុកច្បារមន ខេត្តកំពង់ស្ពឺ។ រមណីយដ្ឋាននេះ មានវត្ត មានទឹកស្ទឹងហូរឆ្លងកាត់ហែហមដោយឈើតូចធំដុះប្រជ្រៀតគ្នាប្របតាមដងស្ទឹង បង្កើតបានជាសោភ័ណ្ឌភាពបែបធម្មជាតិ ដែលមិនអាចងាកនេត្រាចេញបានអំឡុងពេលទស្សនា។
ទោះជាយ៉ាងណាក៏ដោយ គេសង្កេតឃើញថា កាលពីរដូវបុណ្យចូលឆ្នាំថ្មី និងបុណ្យភ្ជុំ ឆ្នាំ២០១២នេះ គឺភ្ញៀវទេសចរមានការកើនឡើងជាងឆ្នាំមុនៗ ដូច្នេះហើយចំណូលបានមកពីវិស័យទេសចរណ៍កើនឡើង បើប្រៀបធៀបជាមួយឆ្នាំ២០១១ កន្លងទៅ។ អ្នកទេសចរដែលទៅដល់ទីនោះបានលើកឡើងថា បច្ចុប្បន្នស្ពានយោលមានការទ្រុឌទ្រោមខ្លាំង បើគ្មានការជួសជុលថែទាំទេទៅថ្ងៃមុខច្បាស់ជាឆ្លងទៅកម្សាន្តនៅត្រើយខាងត្បូងលែងកើតហើយ៕
អភិវត្តន័ រមណិដ្ឋានជាយក្រុង អនុញ្ញាតឱ្យ ប្រជាពលរដ្ឋ ក្នុងក្រុង មានឱកាស ចេញកំសាន្ត ចុងសបា្តហ័ បន្ធូរបរិយាកាសតានតឹង ពេលធ្ធើការ ។