ដោយ៖​ ពេជ្រ សុធារី​
ថ្ងៃអាទិត្យ ទី10 ខែវិច្ឆិកា ឆ្នាំ2013
http://vodhotnews.com

វេទិកាផ្លាស់ប្តូរព័ត៌មាន​​របស់ CCIM (រូបថត ពេជ្រ សុធារី)

មជ្ឈមណ្ឌល​កម្ពុជា​ដើម្បី​ប្រព័ន្ធ​ ផ្សព្វផ្សាយ​​ឯករាជ្យ CCIM នៅថ្ងៃ​ទី​១០ខែវិច្ឆិកា​នេះ បាន​​​បើក​​វេទិកា​​​ផ្លាស់​ប្តូរ​ព័ត៌មាន​​​ ស្តីពី​«​សុខភាព សុវត្ថិភាព និង​សន្តិ​សុខ​របស់​កម្មករ​រោង​ច​ក្រ​កាត់​​ដេរ​» នៅ​រាជធានី​ភ្នំពេញ ដែល​​មាន​មន្ត្រី​ពាក់ព័ន្ធ​និង​កម្មករ​​ចូលរួម ដើម្បី​រិះរក​អនុ​សាសន៍ ជំរុញ​​ឲ្យ​មាន​​លក្ខខណ្ឌ​​ការ​ងារ​ប្រសើរ​ក្នុង​សង្វាក់​ផលិតកម្ម វិស័យ​ឧស្សាហកម្ម​កាត់ដេរ​នៅ​កម្ពុជា​។​

​វេទិកា​​សាធារណៈស្តីពី​«​សុខភាព សុវត្ថិភាព និង​សន្តិសុខ​របស់​កម្មករ​រោង​ច​ក្រ​កាត់ដេរ​» ​ធ្វើឡើង​ពី​ម៉ោង ៨:៣០ ដល់​​ម៉ោង ១២:០០​​​ថ្ងៃ​​ត្រង់ នៅ​ការិយា​​​ល័យ​​​​មជ្ឈ​​មណ្ឌល​​​អប់​​រំ​​ច្បាប់​​​​សម្រាប់​សហគមន៍​ CLEC ស្ថិត​នៅក្នុង​ភូមិ​ថ្មី សង្កាត់​ដង្កោ ខណ្ឌដង្កោ រាជធានី​ភ្នំពេញ ដោយ​មាន​ការ​បង្ហាញ​​នូវ​វីដេអូ ពីបញ្ហា​កម្មករ និង​បែងចែកក្រុមពិភាក្សា​ស្វែង​រក​អនុ​សាសន៍​ ដាក់ជូន​រាជរដ្ឋាភិបាល​​។​

វេទិកា​នោះ មាន​អ្នកចូលរួម​ពីសំណាក់​ កម្មករ កម្ម​ការ​នី មន្ត្រី​សហជីព តំណាង​​មក​ពី​​សមាគម​រោងចក្រ​កាត់ដេរ និង​អង្គការ​​សង្គម​​ស៊ីវិល ​ដែល​ពាក់​ព័ន្ធ ប្រមាណ​១០០​​នាក់។​

​កាលពី​ថ្ងៃអាទិត្យ ទី​២០​ ​ខែតុលា និង​ថ្ងៃ​ទី ២៧​ ខែតុលា កន្លងទៅ​នេះ CCIM បាន​បើក​វេទិកា​សាធារណៈ​ចំនួន​ពីរ​រួច​មកហើយ នៅ​ខេត្ត​កំពង់​ស្ពឺ និង​នៅ​រាជ​ធានីភ្នំពេញ ដោយ​បាន​អនុញ្ញាត​ឲ្យកម្ម​ករ​​​លើ​នូវ​បញ្ហា​ដែល​ពួក​គេ​ជួប​ប្រទះ​នៅ​ក្នុង​កន្លែង​ធ្វើការ និង​ក្រៅ​កន្លែង​ធ្វើ​ការ ជម្រាប​ជូន​ទៅ​តំណាង​ក្រសួង​ការងារ​ និងបណ្តុះ​បណ្តាល​វិជ្ជា​ជីវៈ និង​ស្ថាប័ន​ពាក់​ព័ន្ធ​នានា ដើម្បីជួយ​ដោះស្រាយ​​ ខណៈ​ប្រាក់​ឈ្នួល​កម្មករ​នៅ​មាន​​​កម្រិត​ទាប ដែល​មិន​អាច​ផ្គត់​ផ្គង់​​ជីវភាព​បាន​​គ្រប់គ្រាន់​៕
​ ​
​សរសរមកាន់កញ្ញា ពេជ្រ សុធារី​ តាមរយៈ sotheary@vodhotnews.com