Monday, 23 December 2013
ផាក់ ស៊ាងលី
ភ្នំពេញ ប៉ុស្តិ៍
ព្រះវិហារៈ ឈើប្រណីតជាង ៦០ ម៉ែត្រគុបតម្លៃរាប់ម៉ឺនដុល្លារត្រូវបានក្រុមអ្នកកាសែតប្រទះឃើញនៅនឹងប៉ុស្តិ៍នគរបាលក្នុងស្រុក សង្គមថ្មី ខេត្ត ព្រះវិហារ កាលពីថ្ងៃសៅរ៍ ខណៈដែលពួកឈ្មួញកំពុងដឹកឈើទំាងនោះចេញទៅលក់នៅប្រទេស វៀតណាម ដោយគ្មានការទប់ស្កាត់ពីអាជ្ញាធរ និងមន្រ្តីជំនាញឡើយ។
លោក ឡោ ចាន់ អ្នកសម្របសម្រួលអង្គការសិទ្ធិមនុស្ស អាដហុក ខេត្ត ព្រះវិហារ បានឲ្យដឹងថាក្រុមអ្នកកាសែតក្នុងស្រុកមួយក្រុមមាន ៧ ស្ថាប័ន ប្រចាំនៅខេត្ត ព្រះវិហារ បានចុះយកព័ត៌មានពីបទល្មើសព្រៃឈើក្នុង ស្រុក សង្គមថ្មី កាលពីថ្ងៃសុក្រ និងថ្ងៃសៅរ៍សប្តាហ៍មុន ហើយបានប្រទះឃើញគំនរឈើប្រណីតប្រភេទធ្នង់ជាង ៦០ ម៉ែត្រគុប នៅទីស្នាក់ការប៉ុស្តិ៍នគរបាល ស្តៅ និងជិតសាលាអនុវិទ្យាល័យ ស្តៅ។
លោកបញ្ជាក់ថា៖ «ក្រុមអ្នកកាសែត បានសុំអន្តរាគមន៍ភ្លាមៗទៅមន្ត្រីជំនាញ តែគ្មានអ្នកណាទៅចាប់ឈើទាំងនោះឡើយ រហូតដល់ឈ្មួញដឹកឈើតាមគោយន្ត និងឡានចេញអស់ទើបគេទៅ»។
លោកបានបន្តថា ឈើទាំងនោះត្រូវបានឈ្មួញប្រមូលទិញក្នុងមួយម៉ែត្រគុបតម្លៃ ៥០០ ដុល្លារ ហើយមន្រ្តីអាជ្ញាធររួមនឹងរដ្ឋបាលព្រៃឈើអាចជាប់ពាក់ព័ន្ធនៅក្នុងបទល្មើសព្រៃឈើនេះ ជាពិសេសគឺនគរបាលប៉ុស្តិ៍ ស្តៅ ដែលជាកន្លែងស្តុកឈើ តែម្តង។
ក្រុមអ្នកកាសែតបានផ្ញើលិខិតរួមមួយច្បាប់ទៅអង្គការ អាដហុក ខេត្ត ដើម្បីសុំអន្តរាគមន៍កាលពីថ្ងៃសៅរ៍ ដោយបានសរសេររៀបរាប់ពីការរកឃើញឈើជាង ៦០ ម៉ែត្រគុបនោះ ហើយអះអាងថាឈើទាំងនោះត្រូវបានឈ្មោះ ស្រេង ម៉េង ជាឈ្មួញដុះស្លែប្រមូលទិញពីប្រជាពលរដ្ឋ។
លិខិតនោះបានបញ្ជាក់ថា៖ «មេឈ្មួញនេះប្រមូលទិញឈើគរដូចភ្នំ ហើយដឹកជញ្ជូនយ៉ាងគគ្រឹកគគ្រេងពុំឃើញមានស្ថាប័នពាក់ព័ន្ធណា ម្នាក់ធ្វើការបង្រ្កាបទាល់តែសោះ»។
ក្រុមអ្នកកាសែតសរសេរក្នុងលិខិតនោះថា ពួកគាត់បានទាក់ទងសុំអន្តរាគមន៍ចំនួនពីរថ្ងៃទៅលោក អ៊ិត ភូម្រា នាយខណ្ឌរដ្ឋបាលព្រៃឈើ ព្រះវិហារ លោក លី លន់ ព្រះរាជអាជ្ញាតុលាការខេត្ត លោក អ៊ុំ ម៉ារ៉ា អភិបាលខេត្ត និងលោក ឯម មុនី នាយរងរដ្ឋបាលព្រៃឈើខាងជើងបឹងទន្លេសាប និងលោក ឆេង គឹមស៊ុន ប្រធានរដ្ឋបាលព្រៃឈើនៃក្រសួង កសិកម្ម ប៉ុន្តែ គ្មានមន្រ្តីណាម្នាក់បង្រ្កាបបទល្មើសនេះនោះទេ។
អ្នកកាសែតម្នាក់ក្នុងចំណោមអ្នកកាសែតទាំង ៧ ស្ថាប័នដែលបានប្រទះឃើញឈើបានថ្លែងដោយសុំមិនបញ្ចេញឈ្មោះថា ឈើទាំងនោះត្រូវពួកឈ្មួញដឹកទាំងយប់កាត់តាមខេត្ត កំពង់ធំ កំពង់ចាម និងចុងក្រោយទៅប្រទេស វៀតណាម ដោយគ្មានមន្រ្តីជំនាញណាម្នាក់ហ៊ានចាប់ឡើយ ដោយសារឈ្មួញបានអះអាង ថាគេមានអាជ្ញាប័ណ្ណទិញឈើ។
លោកថា៖ «ពលរដ្ឋនាំគ្នាកាប់ឈើលក់ ឲ្យឈ្មួញឈ្មោះ ស្រេង ម៉េង ខ្ទេចខ្ទីគ្មានសល់ទេ ហើយឈ្មួញនេះថាគេទិញឈើឲ្យក្រុមហ៊ុន ទ្រី ភាព»។
លោក ណែម សៀក នាយប៉ុស្តិ៍ ស្តៅ អះអាងថា ឈើនោះជាឈើស្របច្បាប់របស់ក្រុមហ៊ុន ទ្រី ភាព ដែលក្រុមហ៊ុននេះបានប្រមូលទិញពីប្រជាពលរដ្ឋតាមភូមិហើយពេលបានច្រើន ទើបក្រុមហ៊ុនយកឡានទៅដឹក។ លោកបញ្ជាក់ថា៖ «វាជាឈើស្របច្បាប់ទេ ទើបយើងឲ្យដាក់នៅខាងក្រោយប៉ុស្តិ៍ មិនមែនក្នុងទីស្នាក់ការប៉ុស្តិ៍ទេ»។
លោក រស់ ហេង អភិបាលស្រុក សង្គមថ្មី បានអះអាងថា លោកមិនទាន់បានដឹងពីព័ត៌មាននេះនៅឡើយទេ ហើយកន្លងមក លោកក៏មិនទាន់ឃើញក្រុមហ៊ុនណាមួយមានអាជ្ញាប័ណ្ណដើរទិញឈើក្នុងស្រុក សង្គមថ្មី នេះដែរ។
មិនអាចទាក់ទងលោក ស្រេង ម៉េង និងលោក អ៊ិត ភូម្រា នាយខណ្ឌរដ្ឋបាលព្រៃឈើព្រះវិហារដើម្បីសុំការអត្ថាធិប្បាយបានទេ។
លោក លី លន់ ព្រះរាជអាជ្ញាតុលាការខេត្តបានឲ្យដឹងថា៖ «ឈើនោះជារបស់ ក្រុមហ៊ុនដែលបានប្រមូលទិញពីប្រជាពលរដ្ឋមូលដ្ឋាននិងមានបង់ពន្ធទើបគេដឹកចេញ»៕